ساياجايعا ارنالعان جەردەگى ۇيلەردى مەملەكەت ەسەبىنەن تولىق كوشىرۋ كەرەك - ابزال قۇسپان

استانا. KAZINFORM - ءماجىلىس دەپۋتاتى ابزال قۇسپان ورال قالاسىنداعى تاسقىن قاۋپى بار ساياجاي ۇيلەرىن جەمقورلىقپەن ۇلەستىرىپ كەتكەن تەلىمدەرگە مەملەكەت ەسەبىنەن كوشىرۋدى ۇسىندى.

«باتىس قازاقستان وبلىسىندا سۋ تاسقىنى سالدارى بويىنشا بىرىنشە كەزەكتە ەلدى سۋدان قاۋىپسىز ايماققا كوشىرۋ كەرەك دەپ ەسەپتەيمىن. ءبىز ءبىر نارسەنى انىق ءتۇسىنۋىمىز كەرەك. جاھاندىق جىلىنۋ جاعدايىندا مۇنداي سۋ تاسقىندارى قازاقستاندا ەندى جيىلەي بەرمەك. ول - اكسيوما. سول سەبەپتى ساياجايعا ارنالعان جەردەگى ۇيلەردى مەملەكەت ەسەبىنەن تولىق كوشىرۋ عانا جالعىز ءارى دۇرىس شەشىم بولماق. ول ءۇشىن وبلىستا، جالپى قازاقستاندا جەر جەتەدى. ءبىراق وعان جاڭادان جەر ءبولىپ، ەگجەي-تەگجەيلى جوسپارلاۋ جوباسىن جاساتىپ، كوممۋنيكاتسيا تارتىپ قاجەت ەمەس. كەزىندە سىبايلاس جەمقورلىقپەن زاڭسىز بەرىلگەن جەرلەر ەسەبىنەن جاڭادان قۇرىلىس باستاپ كەتۋگە ابدەن بولادى. باتىس قازاقستان وبلىسىندا ونداعان جىلدار بويى كەيبىر پىسىقتار مەن پىسىقايلار جۇزدەگەن، مىڭداعان گەكتار جەردى مەملەكەتتەن تەگىن الىپ، ونى 10 «سوتىقتان» ءبولىپ، حالىققا ساتىپ كەلدى. ول جەرلەردە ەگجەي-تەگجەيلى جوسپارلاۋ جوباسى بار، كەيبىرىنە كوممۋنيكاتسيا دا تارتىلعان. ءبىر تاڭعالارلىعى، ولاردىڭ ارەكەتىنەن جەرگىلىكتى قۇقىق قورعاۋ ورگاندارى ەشقانداي زاڭعا قايشى ارەكەت كورمەيدى»، - دەگەن دەپۋتات ورال قالاسىنداعى ورەسكەل زاڭسىزدىقتى ەسكە الدى.

ونىڭ ايتۋىنشا مۇنداي زاڭسىزدىقتارعا وبلىس باسشىلعىنىڭ دا قاتىسى بار.

«جالپى باتىس قازاقستان وبلىسىنا اكىم بوپ كەلگەن ازاماتتار جەر ساتۋدى كاسىپكە اينالدىرىپ الدى. ناقتى مىسال، ەكى مىڭىنشى جىلداردىڭ باسىندا گايدەنكو دەگەن پىسىق وبلىس اكىمشىلىگى ارقىلى جۇزدەگەن گەكتار جەر الىپ، ونى كۇنى بۇگىنگە دەيىن ساتىپ تاۋىسا الماي جۇرگەنىن قۇقىق قورعاۋشىلار ەمەس، قاراپايىم بلوگەر ايبولات بوكەنوۆ انىقتادى»، - دەدى ابزال قۇسپان.

دەپۋتات وسىعان ۇقساس زاڭسىزدىقتار اتىراۋ وبلىسىندا دا بولعانىمەن، قۇقىق قورعاۋ ورگاندارى دەرەۋ دەن قويىپ، ىستەر سوتقا جەتكەنىن ايتادى. ال باتىس قازاقستاندا مۇناي قوزعالىس بايقاماعان. سونداي-اق ول وڭىردەگى وسى زاڭسىزدىقتاردى كورسەتىپ باس پروكۋراتۋراعا جولداعان ساۋالى وبلىستىق پروكۋراتۋرادان ءبىراق شىققانىن ايتادى.

«مىڭداعان دەردى جەمقورلىق جولمەن تاراتقان دا، 10 «سوتىق» جەرگە قول جەتكىزە الماي وتىرعان قاراپايىم ادامدارعا ساياجاي جەرىنەن ءۇي سالۋعا رۇقسات بەرگەن دە اكىمدەر. ەندەشە اكىمدەر ءوز قاتەلەرىن وزدەرى تۇزەسىن. حالىقتى سۋعا كەتپەيتىن، ءقاۋىپسىز جەرگە كوشىرسىن. جەر يەسى - مەملەكەت. ال كونستيتۋتسيا بويىنشا مەملەكەتتىك بيلىكتىڭ قاينار كوزى - حالىق. سوندىقتان ورال قالاسىنداعى سۋعا كەتكەن ساياجاي تۇرعىندارىن قاۋىپتى ايماقتان كوشىرۋ كەزەك كۇتتىرمەس شارۋا. ول ءۇشىن ەكى كەزەكتى ەكى جىلعا ارنالعان شاعىن باعدارلاما قاجەت. ءبىرىنشى كەزەكتە ءۇيى تۇرۋعا جارامايتىن ازاماتتارعا بيىل سالىنىپ، كەلەسى جىلى قالعان ادامداردى كوشىرسەك، ءبىز ازاماتتارىمىزدىڭ دا قۇقىعىن قورعايمىز جانە بولاشاقتا مەملەكەت ەسەبىنەن تاعى دا ميللياردتاعان شىعىنداردىڭ الدىن الامىز. دەپۋتاتتىق ساۋالعا باتىس قازاقستان وبلىسىنداعى جەرگە قاتىستى ماتەريالدارىمدى قوسا جولدايمىن»، - دەدى ابزال قۇسپان.

اۆتور

ەسىمجان ناقتىباي