ساتى اۋىلىنداعى جەر داۋى: اكىمدىك تەكسەرۋ جۇمىستارىن باستادى
قونايەۆ. KAZINFORM - كەگەن اۋدانىنىڭ اكىمدىگى كولساي كولدەرىنىڭ ەتەگىندە ورنالاسقان ساتى اۋىلىنداعى جەر داۋىنا قاتىستى پىكىر ءبىلدىردى.
اۋدان اكىمدىگىنەن ءمالىم ەتكەندەي، جەرگىلىكتى تۇرعىنداردىڭ اۋىل شارۋاشىلىعى ماقساتىنداعى ۋچاسكەلەردىڭ ءۇشىنشى تۇلعاعا زاڭسىز بەرىلۋى تۋرالى شاعىمدارى نەگىزىندە پروكۋراتۋرا قازاقستان رەسپۋبليكاسى جەر كودەكسىنىڭ 146-بابىنا سايكەس تەكسەرۋ جۇرگىزىپ جاتىر.
- داۋلى جەر تەلىمدەرىنە قاتىستى ماتەريالدار الماتى وبلىسىنىڭ جەر قاتىناستارى باسقارماسىنا جولداندى. تەكسەرۋ ناتيجەلەرى بويىنشا تۇپكىلىكتى شەشىم قابىلدانادى، - دەپ جاۋاپ بەردى اكىمدىكتەن Kazinform اگەنتتىگىنىڭ ساۋالىنا.
سونداي-اق، كەگەن اۋدانىنىڭ جەر قاتىناستارى جانە ساۋلەت، قالا قۇرىلىسى بولىمدەرى اتالعان جەر تەلىمدەرىنە تۇگەندەۋ جۇمىستارىن جۇرگىزىپ جاتىر.
ساتى اۋىلى مەن ونىڭ ماڭىنداعى جەر ماسەلەلەرىن رەتتەۋ جەر كودەكسىنىڭ 43, 44 جانە 48-باپتارىنا سايكەس جۇزەگە اسىرىلادى. اۋىلدىڭ باس جوسپارى ءالى بەكىتىلمەگەندىكتەن، جەرلەردىڭ نىسانالى ماقساتىن وزگەرتۋ ۋاقىتشا شەكتەلگەن.
اكىمدىكتىڭ حابارلاۋىنشا، وسى جىلدىڭ سوڭىنا دەيىن جەرگە ورنالاستىرۋ قۇجاتتاماسىن ازىرلەۋ جانە جاڭارتۋ جۇمىستارى اياقتالىپ، باس جوسپارعا وزگەرىستەر ەنگىزىلەدى. جوسپار بەكىتىلگەننەن كەيىن ازاماتتار كوتەرگەن وزەكتى ماسەلەلەر كەزەڭ- كەزەڭىمەن شەشىلە باستايدى.
وسىعان دەيىن الماتى وبلىسى كولساي كولدەرىنىڭ ەتەگىندە ورنالاسقان ساتى اۋىلىندا جەرگە قاتىستى داۋ شىققان بولاتىن. جەرگىلىكتى تۇرعىندار اۋىلدىڭ بۇرىنعى باسشىلىعىن جەر تەلىمدەرىن زاڭسىز ساتقان دەپ ايىپتاپ وتىر.
ەسكە سالايىق، 2023 -جىلى الماتى وبلىسىنىڭ ساتى اۋىلى حالىقارالىق دەڭگەيدە ەڭ ۇزدىك تۋريستىك اۋىل رەتىندە تانىلىپ، بەدەلدى «Best Tourism Villages by UNWTO» سىيلىعىمەن ماراپاتتالدى.
سونداي-اق وڭىردە تۋريستەردىڭ قاۋىپسىزدىگىن كۇشەيتۋ ماقساتىندا قانداي جوبالار قولعا الىنعانى تۋرالى جازعان ەدىك.