ساتۋشىلار قازاق تىلىندە قىزمەت كورسەتۋگە مىندەتتەلەدى - ساۋدا مينيسترلىگى

استانا. KAZINFORM - قازاقستاندا ماركەتپلەيستەر مەن ساتۋشىلار قازاق تىلىندە قىزمەت كورسەتۋگە مىندەتتەلەدى. بۇل تۋرالى ساۋدا جانە ينتەگراتسيا ءمينيسترى ارمان شاققاليەۆ ايتتى.

بۇگىن ءماجىلىستىڭ جالپى وتىرىسىندا تۇتىنۋشىلاردىڭ قۇقىقتارىن قورعاۋ تۋرالى زاڭ جوباسىن تالقىلاۋ كەزىندە دەپۋتات رينات زايتوۆ قىزمەتتەردى قازاق تىلىندە ۇسىنۋدا پروبلەما بار ەكەنىن جانە بۇل ماسەلەنى ءتيىستى زاڭمەن رەتتەۋدى ۇسىندى.

پالاتا وتىرىسىنان كەيىنگى باسپا ءسوز ءماسليحاتىندا ۆەدومستۆو باسشىسى وسى تاقىرىپقا قاتىستى تۇسىنىك بەردى.

«دەپۋتات تۇتىنۋشىلاردىڭ تولىققاندى ساپالى قىزمەت الۋ ماسەلەسىن كوتەردى جانە بۇل تۇرعىدا ونىڭ ايتقانى ابدەن ورىندى. بىزدە تىلگە بايلانىستى شەكتەۋگە نەمەسە كەمسىتۋگە جول بەرىلمەيدى. اتاپ ايتقاندا، ەلەكتروندى ساۋدادا كەيبىرى انا تىلىندە قىزمەت كورسەتپەيدى، وسىنىڭ سالدارىنان تۇتىنۋشى ونى پايدالانا المايدى. بۇل رەتتە، ادامدار نەگە زارداپ شەگۋى كەرەك؟ ! ادامدار ناقتى ءارى سەنىمدى اقپارات الۋى قاجەت. وسى ورايدا ءبىز تىلگە قاتىستى كونستيتۋتسيالىق ۇستانىم مەن زاڭ تالاپتارىن ورىنداۋ ماسەلەسىنە ەرەكشە نازار اۋدارامىز. بۇل ءوز كەزەگىندە ماركەتپلەيستەرگە دە جانە باسقا دا قىزمەتتەرگە دە قاتىستى»، - دەدى ارمان شاققاليەۆ تىلشىلەر سۇراعىنا جاۋاپ بەرە وتىرىپ.

بۇدان بۇرىن حابارلانعانداي، ق ر ساۋدا جانە ينتەگراتسيا ءمينيسترى كولىك تۇراقتارىن جاپپاي اقىلى نەگىزگە اۋىستىرۋ جونىندە سۇراقتارعا جاۋاپ بەردى.