ساتبايەۆ كانالىنان استانا قالاسىنا سۋ تارتۋ قۇرىلىسى باستالادى
استانا. KAZINFORM - استانا قالاسىندا ق. ي. ساتبايەۆ اتىنداعى كانالدان استانا قالاسىنا دەيىن سۋ تارتقىش پەن №4 سورعى-سۇزگى ستانساسىنىڭ قۇرىلىسىنا ارنالعان EPC- كەلىسىمشارتقا سالتاناتتى قول قويىلدى.
بۇل تۋرالى ۇكىمەتتىڭ باسپا ءسوز قىزمەتى حابارلادى.بۇل جوبا ەلوردا ءۇشىن ماڭىزدى ينفراقۇرىلىمدىق باستامالاردىڭ ءبىرى بولىپ سانالادى.
ءىس-شاراعا قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى رومان سكليار جانە قازاقستان رەسپۋبليكاسىنداعى قىتاي حالىق رەسپۋبليكاسىنىڭ توتەنشە جانە وكىلەتتى ەلشىسى حان چۋنلين مىرزا قاتىستى.
ق. ي. ساتبايەۆ اتىنداعى كانالدان استانا قالاسىنا دەيىن سۋ تارتقىش پەن №4 سورعى-سۇزگى ستانساسىنىڭ قۇرىلىسى - استانانى تۇراقتى ءارى ساپالى اۋىزسۋمەن قامتاماسىز ەتۋگە باعىتتالعان ستراتەگيالىق جوبا.
سۋ تارتقىشتىڭ جالپى ۇزىندىعى - 203,06 شاقىرىم (ەكى جەلى). جوبانىڭ جۇزەگە اسىرىلۋى قالانىڭ كوممۋنالدىق ينفراقۇرىلىمىن جاڭعىرتۋعا، سۋ تۇتىنۋدىڭ ارتۋىنا توتەپ بەرۋگە جانە الەۋمەتتىك-ەكونوميكالىق دامۋعا جاعداي جاساۋعا مۇمكىندىك بەرەدى.
EPC- كەلىسىمشارتتى دايىنداۋ قازاقستاندىق جانە قىتايلىق تاراپتاردىڭ تىعىز ءوزارا ءىس-قيمىلى نەگىزىندە، جوبالاۋدىڭ حالىقارالىق ستاندارتتارىن، ەكولوگيالىق قاۋىپسىزدىك پەن قۇرىلىس تيىمدىلىگىن ساقتاي وتىرىپ جۇرگىزىلدى. قۇرىلىس جۇمىستارى 2025 -جىلدىڭ ءساۋىر ايىندا باستالادى دەپ جوسپارلانىپ وتىر.
China Energy International Group جانە ونىڭ ەنشىلەس كومپانياسى China Gezhouba Group Company Ltd. الەمنىڭ ءتۇرلى وڭىرلەرىندە ءىرى ينفراقۇرىلىمدىق جانە ينجەنەرلىك جوبالاردى ىسكە اسىرۋدا مول تاجىريبەگە يە.
EPC- كەلىسىمشارتقا قول قويۋ - قالالىق ورتانى ورنىقتى دامىتۋ جانە ينفراقۇرىلىم سالاسىنداعى قازاقستان- قىتاي ارىپتەستىگىن ودان ءارى نىعايتۋ جولىنداعى ماڭىزدى قادام بولدى.
پرەمەر-مينيستر پەتروپاۆلداعى سورعى ستانسياسىنا بارعانىن جازعان بولاتىنبىز.