سارىاعاشتىق شارۋالار كارتوپ ەگىپ جاتىر

تۇركىستان. KAZINFORM - سارىاعاشتىق ديقاندار ءبىر القاپتان ەكى رەت ءونىم الادى.

سارىاعاش اۋدانىنىڭ شارۋالارى ەرتە پىسەتىن كارتوپ ەگۋدى باستاپ كەتتى. ناۋقاندى العاشقى بولىپ قابلانبەك اۋىلدىق وكرۋگىندە ورنالاسقان «وسكەنباي» شارۋا قوجالىعى قولعا الدى.

مۇندا 2 گەكتار جەرگە «ريەۆەريا» سۇرىپتى كارتوپ ەگىلۋدە. الداعى ۋاقىتتا شارۋا 45 توننا ءونىم الۋدى جوسپارلاپ وتىر.

قوجالىق ءتوراعاسى ءو. رىسمامبەتوۆ كارتوپ ءونىمىن جيناپ العاننان كەيىن ورنىنا قىرىققابات، بولگار بۇرىشىن جانە كەش پىسەتىن كارتوپ وسىرەتىنىن ءسوز ەتتى. ياعني، سارىاعاشتىق ديقاندار ءبىر جىلدا ءبىر القاپتان ەكى-ءۇش رەت ءونىم جينايدى.

جالپى، بيىل اۋدان شارۋالارى 2,9 مىڭ گەكتارعا جۋىق جەرگە كارتوپ وسىرەدى دەپ كۇتىلۋدە. ونىڭ ىشىندە 1,8 مىڭ گەكتارىنا ەرتە پىسەتىن كارتوپ ەگىلمەك.

ايتا كەتەيىك، بۇدان الدىن كەلەستىك شارۋالار قاڭتار ايىندا قىرىققابات ەككەنىن جازعان بولاتىنبىز.