ساربازدارعا قانشا ۋاقىتقا دەيىن كرەديت تولەمەۋگە مۇمكىندىك بەرىلەدى؟

استانا. KAZINFORM - ۇكىمەت قاۋلىسىمەن ساربازداردىڭ بانكتەگى قارىزدارى بويىنشا تولەمدى كەيىنگە قالدىرۋ كەپىلدىكتەرى بەكىتىلمەك، - دەپ حابارلايدى Massaget.kz ءتىلشىسى.

قورعانىس مينيسترلىگى ۇكىمەت قاۋلىسىنىڭ جوباسىن ازىرلەدى. قۇجات بيىل 19-ماۋسىمدا پرەزيدەنت قول قويعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كرەديت بەرۋ كەزىندە تاۋەكەلدەردى بارىنشا ازايتۋ، قارىز الۋشىلاردىڭ قۇقىقتارىن قورعاۋ، قارجى نارىعىن رەتتەۋ جانە اتقارۋشىلىق ءىس جۇرگىزۋدى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ق ر زاڭىن ىسكە اسىرۋ ءۇشىن قابىلدانادى.

«بۇل مەرزىمدى اسكەري قىزمەتتەگى ساربازدارعا بانكتەگى قارىزدارى مەن ميكروكرەديتتەرى بويىنشا تولەمدى كەيىنگە قالدىرۋ بويىنشا كەپىلدىك بەرۋگە باعىتتالعان. نورماتيۆتىك قۇقىقتىق اكتىنىڭ نەگىزىندە مەرزىمدى اسكەري قىزمەتشىلەرگە اسكەري بورىشىن وتەپ جۇرگەن كەزىندە جانە ول اياقتالعاننان كەيىن 60 كۇن ىشىندە بانكتەگى قارىزدارى مەن ميكروكرەديتتەرى بويىنشا كرەديتتىك دەمالىستار بەرىلەدى. سونىمەن قاتار، وسى ساناتتاعى ازاماتتاردان كەيىنگە قالدىرۋ تۋرالى ءوتىنىش تالاپ ەتىلمەيدى. كەيىنگە قالدىرۋ پروتسەدۋراسى اۆتوماتتى تۇردە ىسكە اسادى»، - دەپ جازىلعان حابارلامادا.

ەسكە سالايىق، بۇعان دەيىن ساربازدارعا كرەديتىن تولەمەۋگە 2 اي ۋاقىت بەرىلەتىنى حابارلاندى.