سارايشىقتىڭ تاريحىن زەرتتەۋ، قۇندىلىعىن ناسيحاتتاۋ جەتىسپەيدى - مەرەكە قۇلكەنوۆ
اتىراۋ. KAZINFORM - اتىراۋ وبلىسىنداعى ورتاعاسىرلىق سارايشىق قالاسىنىڭ تاريحىن زەرتتەۋ، قۇندىلىعىن ناسيحاتتاۋ جەتىسپەيدى. بۇل جونىندە ۇلتتىق قۇرىلتاي مۇشەسى، قازاقستان جازۋشىلار وداعىنىڭ ءتوراعاسى مەرەكە قۇلكەنوۆ ايتتى.
قالامگەردىڭ ايتۋىنشا، جەتى نوميناتسيا بويىنشا «قۇلاگەر» بايگەسى جاريالانعان. ۇلتتىق ويىنداردى، سالت-ءداستۇردى ۇلىقتاۋ ءۇشىن جاڭا كوركەم شىعارمالار انىقتالادى.
«ءبىز قازاقستانداعى كوركەم شىعارمانىڭ دەڭگەيىن كوتەرەمىز. الايدا، قازاق ادەبيەتىنىڭ كەمشىن تۇسى كوپ. اسىرەسە، قازاق پروزاسى مەن پوەزياسى شەت تىلىنە دۇرىس اۋدارىلماي جاتىر»، - دەدى مەرەكە قۇلكەنوۆ.
ونىڭ پىكىرىنشە، جايىق وزەنىنىڭ جاعالاۋىنداعى كونەنىڭ كوزى - سارايشىق قالاشىعىنا ماڭىز بەرىلىپ وتىر.
«ءبىراق، سارايشىقتىڭ زەرتتەلۋ جاعى، قۇندىلىقتارىن دارىپتەۋ جاعى ءالى جەتىسپەيدى. ونىڭ سەبەپتەرىن انىقتاعان ءجون. جالپى، مۇنايلى ولكەدە ەكى نارسە قولعا الىنۋعا ءتيىس. ونىڭ ءبىرى - بەيبارىستىڭ عىلىمي ورتالىعى بولۋى قاجەت دەپ ەسەپتەيمىن. بىلتىر ءبىز اراب ەلىندە بولعان كەزىمىزدە سونداي ورتالىق قۇرىلعان ەدى. ارابتىق ارىپتەستەر ونى قازاقستانمەن بىرلەسىپ قۇرۋعا ىنتالى بولىپ وتىر. ويتكەنى، عالىمداردى جىبەرۋ، قارجىلاندىرۋ ماسەلەسى قامتىلعان ەدى. ءبىز داۋىلپاز اقىن ماحامبەتتى ۇمىتىپ كەتتىك. سول سەبەپتەن، وعان دا ءبىر ورتالىق كەرەك سەكىلدى. مەنىڭشە، اتىراۋ وڭىرىندەگى جوعارى وقۋ ورىندارى وسىعان جەتە كوڭىل ءبولۋى كەرەك. ارينە، تەك ۋنيۆەرسيتەتتەر عانا ەمەس، وبلىستاعى مادەنيەت باسقارماسى، باسقا دا ورتالىقتار وسى ماسەلەنى قولعا السا دەگەن ۇسىنىسىمىز بار»، - دەدى مەرەكە قۇلكەنوۆ.
ەسكە سالا كەتەلىك، بۇدان بۇرىن ۇلتتىق قۇرىلتاي ەل دامۋىنىڭ باعىتىن ايقىندايتىن بىرەگەي پلاتفورماعا اينالعانىن جازعان ەدىك.
سونداي-اق، قازاقستاندا وتەتىن V دۇنيەجۇزىلىك كوشپەندىلەر ويىندارىنا 58 ەل قاتىسادى.
مادەنيەت جانە اقپارات ءمينيسترى كرەاتيۆتى يندۋستريا وكىلدەرى ءۇشىن ارنايى سالىقتىق جەڭىلدىكتەر ەنگىزىلگەنىن ايتتى.