ساراپشى مەكتەپ وقۋلىقتارىنداعى «اكە توردە، شەشە بوساعادا» مودەلىنەن باس تارتۋدى ۇسىندى

ەموتسيونالدىق زەيىندى دامىتۋ جونىندەگى تالىمگەر، HR- ساراپشى اسەل مۇراتوۆا مەكتەپ وقۋلىقتارىنداعى «اكە توردە، شەشە بوساعادا» مودەلىنەن باس تارتۋدى ۇسىندى، دەپ حابارلايدى Kazinform.

«مەن ءبىلىم بەرۋ سالاسىندا قۇندىلىقتاردى تاراتۋ كوميسسياسىنا قاتىستىم. سول كەزدە ءبىر ويىم بولدى. وقۋلىقتاردا وتباسى قۇندىلىعى سۋرەتتەردە قالاي بەرىلىپ جۇرگەنىن ءبارىمىز بىلەمىز. اكە توردە وتىرادى. شەشە ءۇي شارۋاسىن دوڭگەلەندىرىپ جاتادى. مەنىڭ ويىمشا، وقۋلىقتاردا وتباسىنىڭ زاماناۋي مودەلدەرىن دە بەرۋ كەرەك. «اكە توردە، شەشە بوساعادا» دەگەن مودەلدى عانا ناسيحاتتاماي، وزگە دە مودەلدەردى مىسال رەتىندە بەرۋ كەرەك. سۋرەتتەردە اكە دە شەشەمەن بىرگە ءۇي شارۋاسىنا ارالاسىپ جاتقانى، بالا كۇتىمىنە، ساباعىنا اتسالىسىپ جاتقانى بەينەلەنۋى كەرەك. ءبىلىم بەرۋ جۇيەسىندە وسىنداي نۇسقالار ناسيحاتتالسا، وقۋلىقتاردان كورىنىس تاپسا، ءبىزدىڭ بۋىنعا، اسىرەسە ەرلەرگە گەندەرلىك تەڭدىكتى قابىلداۋ جەڭىلىرەك بولاتىن ەدى»، - دەدى ول ب ا ق وكىلدەرىنىڭ سۇراعىنا بەرگەن جاۋابىندا.

ونىڭ پايىمىنشا، گەندەرلىك تەڭدىك ۇعىمىنىڭ تۇپكى ءمانىن تۇسىنبەيتىن ايەلدەر دە بارشىلىق.

«جالپى ءومىر مەن ەكونوميكانىڭ بۇكىل سالاسىنا ايەلدەردى كىرىكتىرۋگە باعىتتالعان شارالار قازىر وتە كوپ. ءبىراق كەيدە ءتىپتى اقىسىز ترەنينگتەر مەن مەنتورينگتەردىڭ وزىنە ولاردى جالىنىپ ءجۇرىپ كەلتىرەمىز. مۇنىڭ ءبارى ەسكى تۇسىنىكتەردىڭ اسەرىنەن. مەنىڭ ءوزىم دە بۇرىنعى ۇستانىمدارىمدى قايتا قاراپ، پايىمدارىمدى وزگەرتكەن اداممىن. «جۇمىس ىستەيتىن انا دۇرىس انا بولا المايدى» دەگەن قاساڭ قاعيدام بولعان. سول تۇسىنىك ماعان جەكە بيزنەس اشۋعا جىلدار بويى كەدەرگى جاساپ كەلدى. ارنايى كۋرستان ءوتىپ، ءبىلىمىمدى جەتىلدىرگەننەن كەيىن عانا جەكە بيزنەسىمدى اشتىم. كوۋچينگكە ماماندانىپ جۇرگەندە جۇمىس كوپ ىستەسەم، ول بالاما زيان دەپ ويلايتىنىمدى بايقادىم. وسى ويدى قايتا قاراۋ كەرەك بولدى. سونىڭ ارقاسىندا كوپ ەڭبەكتەنىپ، دۇرىس باعىتتا دامىسام، بالاما تىكەلەي ۇلگى بولا الاتىنىمدى ۇقتىم. قازىر نەگىزگى جۇمىسىما ۋاقىتىمنىڭ 20-30 پايىزى عانا كەتەدى. قالعان ۋاقىتىمنىڭ ءبارىن بالاما ارنايمىن. سوندىقتان ءبىزدىڭ وزىمىزگە وزگەرۋ كەرەك، وزگەرىسكە ۇمتىلۋ كەرەك. قاي جەردە جۇمىس ىستەسەم دە، ايەلدەردىڭ دامۋىنا كەدەرگى كەلتىرەتىن كەيس كورگەن جوقپىن. كەرسىنىشە قولداۋ بار. ياعني، كوپ دۇنيە وزىمىزگە بايلانىستى»، - دەيدى اسەل مۇراتوۆا.

بيزنەس- تالىمگەر ەڭبەك نارىعىنداعى ترەندتەر ايەلدەردى ەرلەرمەن باسەكەلەسە ءجۇرىپ مانساپ جاساۋعا يتەرمەلەپ وتىرعانىن ايتادى.

«دۇنيەجۇزىلىك ەكونوميكالىق فورۋمنىڭ مالىمەتى بويىنشا، 2030 -جىلعا قاراي الەمدە 85 ميلليون جۇمىس ورنى جوعالادى دا، 96 ميلليون جاڭا جۇمىس ورنى اشىلادى. جويىلاتىن جۇمىس ورىندارىنىڭ كوبىندە ايەلدەر وتىر. مىسالى، كەڭسەمەن بايلانىستى جۇمىستىڭ كوبى جاساندى زەيىنگە سەنىپ تاپسىرىلىپ جاتىر. وسى ورىنداردان بوساپ قالعان ايەلدەردى ەڭبەككە ارالاستىرۋ ءۇشىن جۇمىس بەرۋشىلەر جۇمىسقا ادام قابىلداعان كەزدە ايەلدەرگە باسىمدىق بەرە باستايدى. ويتكەنى الەۋمەتتىك تەڭگەرىمدى ساقتاۋ كەرەك»، - دەيدى ساراپشى.

ايتا كەتەيىك، ق ر پرەزيدەنت ءىس باسقارماسى مەديتسينالىق ورتالىعىنا قاراستى مەديتسينالىق تەحنولوگيالار جانە اقپاراتتىق جۇيەلەر ورتالىعىنىڭ ۇيىمداستىرۋىمەن ءوتىپ جاتقان شاراعا مەملەكەتتىك قۇرىلىمداردىڭ، بەلگىلى مەديتسينالىق حابتاردىڭ، الپاۋىت كومپانيالاردىڭ توپ- مەنەدجەرلەرى، HR جانە IT ساراپشىلار، بيزنەس- تالىمگەرلەر قاتىسىپ جاتىر.

اۆتور

ەسىمجان ناقتىباي