ساق ستيلىندە جاسالعان 5000 تەڭگەلىك جاڭا بانكنوتالار اينالىمعا شىقتى
قازاقستان ۇلتتىق بانكى 25- جەلتوقساننان باستاپ جاڭا ديزاينداعى، 2023-جىلعى ۇلگىدەگى نومينالى 5000 تەڭگەلىك بانكنوتالاردى اينالىمعا شىعاردى، دەپ حابارلايدى Kazinform.
بۇل - «ساق ءستيلى» جاڭا سەرياسىنىڭ العاشقى بانكنوتاسى.
ول ءداستۇرلى قازاق ويۋ-ورنەگىنىڭ باستاۋشىسى بولىپ سانالاتىن جانە كوشپەندىلەردىڭ بىرەگەي مادەنيەتىنەن باستاپ بۇگىنگى قازاقستانعا دەيىنگى ەل مۇراسىن بەينەلەيتىن «ساق ءستيلى» ەلەمەنتتەرىنە نەگىزدەلگەن.
ءتۇسى - قىزىل-قىزعىلت سارى. بانكنوتانىڭ بەتكى جاعىندا:
- كوكتە قالىقتاپ ۇشقان قۇس پەن ءومىر اعاشىنىڭ بۇتاعى (ەسىك قورعانى، ب. د. د. 5-4 ع ع.، التىن ادام باس كيىمىنىڭ ءبىر بولىگى، تابيعات پەن نانىم بايلانىسىنىڭ قاسيەتتى ماعىناسى)؛
- د ن ق ءسپيرالى جانە ادامنىڭ تابيعاتپەن بايلانىسىن بىلدىرەتىن ويۋ-ورنەكپەن ستيلدەندىرىلگەن شەكسىزدىك سيمۆولى؛
- جادىگەر-بۇركىت فيگۋراسى تۇرىندەگى بەزەندىرۋ (قورعان تالدى II، ب. د. د. 7-6 ع ع.؛ بۇركىت شەكسىز ەركىندىكتىڭ، كۇش پەن ەپتىلىكتىڭ سيمۆولى رەتىندە).
بانكنوتانىڭ سىرت جاعىندا ويۋ-ورنەكپەن بەزەندىرىلگەن قالقان فونىنداعى بۇركىت بەينەلەنگەن. نەگىزگى بەينەنىڭ ارتىندا دوڭگەلەك قازاقتىڭ ويۋ- ورنەگى ورنالاسقان.
نومينالى 5000 تەڭگە بولاتىن جاڭا بانكنوتالار 2023-جىلعى 25- جەلتوقساننان باستاپ اينالىمعا ەنەدى جانە جىل بويى اينالىمداعى 2011-جىلعى ۇلگىدەگى نومينالى 5000 تەڭگە بولاتىن ۇلتتىق ۆاليۋتا بانكنوتالارىمەن اۋىستىرىلادى.
ياعني، ەسكى ۇلگىدەگى بارلىق بانكنوتالار ءبىر جىلدىڭ ىشىندە اينالىمنان بىرتىندەپ الىنادى. تيىسىنشە، بانكنوتالار اينالىمدا قاتار جۇرگەن ۋاقىتتا حالىققا ەسكى ۇلگىدەگى بانكنوتالاردى ەكىنشى دەڭگەيلى بانكتەردەگى نەمەسە قۇب فيليالدارىنداعى جاڭا بانكنوتالارعا ايىرباستاۋدىڭ قاجەتى جوق.
2023-جىلدىڭ 25- جەلتوقسانىنان 2024-جىلدىڭ 24- جەلتوقسانىنا دەيىن ەسكى جانە جاڭا ۇلگىدەگى بانكنوتالار اينالىمدا قاتار ءجۇرىپ، ەسەپ ايىرىسۋعا جارامدى سانالادى.
بۇل ورايدا جاڭا ۇلگىدەگى بانكنوتالار 2024-جىلدىڭ ناۋرىز ايىندا عانا جاپپاي اينالىمعا تۇسەدى. سەبەبى ولاردى ەلىمىزدىڭ بارلىق وڭىرىنە جەتكىزىپ، جابدىقتاردى (بانكوماتتار، تەرمينالدار جانە كاسسالىق تەحنيكا ت. ب.) بەيىمدەۋ ءۇشىن بەلگىلى ءبىر ۋاقىت قاجەت.
قاتار اينالىم كەزەڭى اياقتالعاننان كەيىن، ياعني 2024-جىلعى 25- جەلتوقساننان باستاپ بارلىق بانك پەن قازپوشتادا ەسكى ۇلگىدەگى بانكنوتالاردى 3 جىل ىشىندە جاڭا ۇلگىدەگى بانكنوتالارعا ايىرباستاۋعا مۇمكىندىك بار. ال ق ۇ ب فيليالدارىندا ولاردى مەرزىمسىز ايىرباستاۋعا بولادى.