سامودەلكينا قازاقستان ءانۇرانى شىرقالعان ساتتەگى سەزىمى جايلى ايتتى

استانا. قازاقپارات - 17 جاستاعى مانەرلەپ سىرعاناۋشى سوفيا سامودەلكينا جازعى قازاقستان چەمپيوناتىندا جەڭىمپاز اتاندى. سپورتشى جەڭىس تۇعىرىنا كوتەرىلىپ، العاش رەت قازاقستان ءانۇرانىن ەستىگەندەگى سەزىمى جايلى Tengri Sport سايتىنا بەرگەن سۇحباتىندا ايتا كەتتى.

«قاراعاندى ارەنادا» جەڭىمپازداردى ماراپاتتاۋ الدىندا قازاقستاننىڭ ءانۇرانى شىرقالدى. سوفيا وڭ قولىن جۇرەك تۇسىنا قويىپ، كوك تۋعا بەتىن بۇردى. بۇل ارەكەتى جينالعان جانكۇيەرلەرگە ەرەكشە اسەر ەتتى.

بۇل، ەڭ بىرىنشىدەن - قۇرمەت، مەن ءانۇراندى جاتتاپ شىقتىم. ءبىراق ءالى تولىق ەمەس، العاشقى شۋماعى مەن قايىرماسىن جاقسى بىلەمىن، - دەدى سۇحباتىندا.

- ال قازاق ءتىلىن شە؟

مەن قازىر مۇنى تەرەڭدەتە باستاعىم كەلەدى. ازىرگە ۇيرەتەتىن مامان جالداعان جوقپىن. اقىرىنداپ ءوزىم باستايمىن دەپ ويلايمىن، سوسىن ادامدارمەن سويلەسىپ، قاراپايىم تىلدەسۋ ارقىلى ۇيرەنە تۇسەمىن. قازىر ەۆگەني ۆيكتوروۆيچ قانا كەي سوزدەردى ايتىپ، قالجىڭداپ تۇرادى، - دەيدى سوفيا.

- سىزبەن ەۆگەني پليۋشەنكو جاتتىعۋ كەزىندە قازاقشا تىلدەسە مە؟

- ءيا، اراسىندا. قازاقشا ءبىر سوزدەردى ايتادى، مەن تۇسىنبەگەنىمدى ايتامىن، ول سوسىن «كەيىن تۇسىنەتىن بولاسىڭ» دەيدى. كەيدە قىسقا باعدارلامانى ورىنداۋعا شىققاندا، كەتتىك دەيدى. مەن جارايدى دەگەندە، ول «راقمەت» دەپ جاۋاپ بەرەدى. وسىلايشا اقىرىنداپ قازاق ءتىلىن ۇيرەنىپ جاتىرمىز، - دەيدى سپورتشى.

سپورتشىمەن تولىققاندى سۇحبات Tengri Sport سايتىندا وسى اپتادا جاريالاناتىن بولادى.

ايتا كەتەيىك، 17 جاستاعى سوفيا تورتتىك سەكىرۋ مەن قاتارىنان ءۇش اكسەل جاساي الاتىن ساناۋلى سپورتشىلار قاتارىنان. بىلتىر قازاقستان ازاماتتىعىن العان سپورتشى الداعى ماۋسىمنان باستاپ الەمدىك جارىستاردا قازاقستان اتىنان باق سىنايدى.

سوفيا سامودەلكينا جۋىردا عانا قازاقستان ءانۇرانىن جاتتاپ جۇرگەنىن ايتقان بولاتىن. العاشقى رەسمي جارىسىندا جەڭىمپاز اتاندى.