«سامۇرىق-قازىنا» وكىلدەرى قوردى تاراتۋدى ۇسىنعان دەپۋتاتتىڭ سىنىنا جاۋاپ بەردى

استانا. KAZINFORM - «سامۇرىق-قازىنا» اكسيونەرلىك قوعامى ساتىپ الۋلاردىڭ ءادىسناماسى، باقىلاۋ جانە مونيتورينگ دەپارتامەنتىنىڭ ديرەكتورى ازامات سەمباي ءماجىلىس دەپۋتاتى ءادىل جۇبانوۆتىڭ سىنىنا جاۋاپ بەردى.

ەسكە سالساق، دەپۋتات «سامۇرىق-قازىنا» ساتىپ الاتىن تاۋارلار مەن قىزمەتتەردىڭ 60 پايىزىن ءبىر كوزدەن الاتىنىن ايتىپ، قوردى تاراتىپ جىبەرۋدى ۇسىنعان بولاتىن. قوردىڭ ساتىپ الۋ ساياساتى تۋرالى باسپا ءسوز ءماسليحاتىندا جۋرناليستەر وسى سىندى كورپوراتسيا وكىلدەرىنىڭ ەسىنە سالدى.

- جالپى ساتىپ الۋلار ۇلەسى تۋرالى اڭگىمە بولعاندا نەگىزگى ءۇش الپاۋىتتى سالىستىرىپ جاتادى. بۇل - مەملەكەتتىك ساتىپ الۋلار، كۆازيمەملەكەتتىك ساتىپ الۋلار جانە «سامۇرىق- قازىنا» قورىنىڭ ساتىپ الۋلارى. ءبىزدىڭ قوردىڭ ساتىپ الۋلارىنا كەلسەك، مەملەكەتتىك ساتىپ الۋلارعا قاراعاندا ۇلكەن ايىرماشىلىقتار بار. ءبىز ءبىرىنشى كەزەكتە وندىرىستىك- كوممەرتسيالىق مىندەتتەرگە باسىمدىق بەرەمىز. ويتكەنى پورتفەلدىك قورىمىز نەگىزىنەن وندىرىستىك كومپانيالار مەن جۇيە قۇراۋشى كومپانيالاردان تۇرادى. سوندىقتان ساتىپ الاتىن تاۋارلارى مەن قىزمەتتەردىڭ نومەنكلاتۋراسى مۇلدە باسقاشا. تيىسىنشە ساتىپ الۋلار ءتاسىلى دە باسقاشا، - دەدى ازامات سەمباي.

ايتۋىنشا، قور 2022 -جىلدان بەرى ءبىر كوزدەن ساتىپ الۋعا نەگىز بولاتىن فاكتورلاردى قىسقارتىپ جاتقان كورىنەدى.

- نەگىزدەمەلەر سانى 47-دەن 18 دەيىن 47 پايىز قىسقاردى. ءبىر كوزدەن ساتىپ الۋدىڭ نەگىزگى ۇلەسىن حولدينگتىڭ ءوز ىشىندەگى كووپەراتسيالىق ساتىپ الۋلار الىپ جاتىر. مىسالى، مۇناي- گاز سالاسىندا شيكى مۇنايدى وڭدەۋشى زاۋىتقا دەيىن تاسىمالداۋ كەرەك. وسى مۇناي تاسيتىن قۇبىردىڭ وپەراتورى «قازترانسويل» دا «قازمۇنايگازدىڭ ەنشىلەس كومپانياسى. گاز تاسىمالدايتىن قۇبىردىڭ نەگىزگى وپەراتورى دا QazaqGaz-دىڭ قۇرامىنداعى قوردىڭ ەنشىلەس كومپانياسى. تيىسىنشە، حولدينگ ىشىندەگى كووپەراتسيا اياسىندا كەلىسىمشارتتار جاسايدى. ەلەكتر ەنەرگياسىنا كەلسەك، ەلەكتر قۋاتىن گەنەراتسيالاۋ ءۇشىن كومىر ساتىپ الۋ كەرەك. ءبىزدىڭ قوردىڭ قۇرامىنا «بوگاتىر كومىر» كىرەدى. كەيىن وسى كومىردەن وندىرىلگەن ەلەكتر قۋاتىن ەلدى مەكەندەردەگى تۇتىنۋشىلارعا جەتكىزۋ كەرەك. بۇل جەردەگى ۇلتتىق وپەراتور KEGOK تا دا ءبىزدىڭ ەنشىلەس كومپانيا. قورعا كىرەتىن كاسىپورىنداردىڭ ءبارى دە ەلەكتر قۋاتىن تۇتىنادى. سايكەسىنشە، ولار دا ءبىر كوزدەن ساتىپ الادى. تەمىرجول تاسىمالى دا وسىعان ۇقساس. «قازاقستان تەمىرجول» كومپانياسى دا قوردىڭ قۇرامىنا كىرەدى. سايكەسىنشە، تەمىرجول تاسىمالىنا بايلانىستى ساتىپ الۋلاردىڭ ءبارى حولدينگ ىشىندەگى كووپەراتسيا اياسىندا ءبىر كوزدەن ساتىپ الىنادى، - دەدى ول.

«سامۇرىق-قازىنا» وكىلى بۇكىل ساتىپ الۋ پروتسەسى قارجى مينيسترلىگى مەن باسەكەلەستىكتى قورعاۋ جانە دامىتۋ اگەنتتىگىنىڭ ماقۇلداۋىنان وتەتىنىن ايتادى.

- بۇكىل ساتىپ الۋ تاسىلدەرىن مەملەكەتتىك ورگاندار ماقۇلداعان. ءبىز ءبىر كوزدەن ساتىپ الۋ ۇلەسىن جوسپارلى تۇردە قىسقارتا بەرەمىز. كەيىنگى ەكى جىلدا 50 پايىزدان ارتىق قىسقارتتىق. بۇرىن حولدينگ ىشىندەگى كووپەراتسيا اياسىندا ءبىر كوزدەن ساتىپ الۋدىڭ 208 نەگىزدەمەسى بولسا، قازىر 100 عانا. وسى 108 نەگىزدەمەدەن باسقا سەبەپتەرگە بايلانىستى ءبىر كوزدەن ساتىپ الۋعا جول جوق، - دەدى ازامات سەمباي.

بۇعان دەيىن بەكتەنوۆ سامۇرىق-قازىنانىڭ وتاندىق وندىرۋشىلەردەن تاۋار ساتىپ الۋ كورسەتكىشىن سىناعانىن جازدىق.

اۆتور

ەسىمجان ناقتىباي