سامات نۇرتازا: قازاقستان مەن قىتاي باسشىلارى ءبىر-بىرىنە وتە جاقىن ەكەنىن كورسەتتى

بۇگىن قىتاي ءتوراعاسى شي جينپيڭ ەلىمىزگە مەملەكەتتىك ساپارمەن كەلدى. قازاقستان پرەزيدەنتى قاسىم-جومارت توقايەۆ كورشى ەل باسشىسىن ەرەكشە قۇرمەتپەن قارسى العانى ءمالىم.

بۇل ساپاردىڭ الدىندا ەكى مەملەكەتتىڭ كوشباسشىسى بۇقارالىق اقپارات قۇرالدارىنا جىلى لەبىزگە تولى سۇحبات بەرىپ، ماقالا جاريالاعان ەدى. بۇنىڭ استارىندا قانداي ءمان جاتقانىن ءماجىلىس دەپۋتاتى، ساياساتتانۋشى سامات نۇرتازا Kazinform تىلشىسىنە ايتىپ بەردى.

- قىتاي ءتوراعاسى شي جينپيڭ قازاقستانعا بەسىنشى رەت كەلىپ وتىر. قوس مەملەكەت باسشىلارى ءبىر-بىرىنە وتە جاقىن، تىعىز بايلانىستا، ەرەكشە ءىلتيپات كورسەتىپ جۇرەتىنىن كورسەتتى. ونى مەملەكەت باسشىسى قاسىم-جومارت توقايەۆتىڭ «جەنمين جيباو» تىلشىسىنە بەرگەن سۇحباتىنان بايقادىق.

بۇدان كەيىنگى كەزەكتە ەكى تاراپ ەكونوميكالىق، ساۋدا-ساتتىق، لوگيستيكا ماسەلەلەرىن تالقىلاۋعا ىنتالى ەكەنى اڭعارىلدى. قىتاي ءتوراعاسى ساپار الدىنداعى ماقالاسىندا «ءبىر بەلدەۋ جانە ءبىر جول» باستاماسى مەن تاسىمالداۋ جايىنا ارنايى توقتالعان ەكەن. مىسالى، قازىر تىنىق مۇحيتتا، بۇعازداردا قىتايلىق كەمەلەر كوپتەگەن پروبلەمالارعا تاپ بولۋدا. سوندىقتان شىعىستاعى كورشىمىز ەۋروپامەن بايلانىستىرىپ جاتقان قازاقستان ارقىلى تاۋار جەتكىزۋگە مۇددەلى. بۇل قازاقستان ءۇشىن دە پايدالى بولماق، ترانزيتتىك جولدار ارقىلى ەلىمىز بيۋجەتىنە تۇسەتىن تابىستى مولايتا الادى. ياعني، ەكى تاراپ قازاق-قىتاي جايىن تولىق قامتىپ سويلەسپەك، - دەپ اتاپ ءوتتى ول.

سونداي-اق سامات نۇرتازا استانادا وتكەلى جاتقان شانحاي ىنتىماقتاستىق ۇيىمى ءسامميتىنىڭ جاھاندىق ساياساتتاعى ماڭىزى زور بولاتىنىن جەتكىزدى. شەشىمىن تاپپاي كەلە جاتقان كوپتەگەن تۇيتكىلدەر ايتىلىپ، ەرەكشە كەلىسىمدەر بولۋى مۇمكىن.

- ش ى ۇ- نىڭ قازىر بەدەلى ارتىپ جاتىر. ۇيىمنىڭ ساياسي سالماق العانىن باسقا ەلدەر دە ءتۇسىنىپ، مۇشە بولۋدى ويلاستىرۋدا. سامميتكە الەمدەگى ىقپالدى ەلدەردىڭ باسشىلارى قاتىسايىن دەپ وتىرعان سوڭ كوپ نارسە كۇتەمىز، گەوساياسي ماسەلەلەر دە شەشىمىن تاۋىپ، ەلىمىز حالىقارالىق ارەنادا ابىرويلى ەكەنىن كورسەتۋى مۇمكىن، - دەپ تۇيىندەدى ءماجىلىس دەپۋتاتى.

بۇعان دەيىن قازاقستان پرەزيدەنتى قاسىم-جومارت توقايەۆ قىتاي حالىق رەسپۋبليكاسىنىڭ ءتوراعاسى شي جينپيڭنىڭ قازاقستانعا ساپارى قارساڭىندا شينحۋا اگەنتتىگىنە سۇحبات بەرگەنىن حابارلاعان ەدىك.

سونىمەن قاتار مەملەكەت باسشىسى قاسىم-جومارت توقايەۆ «جەنمين جيباو» تىلشىسىنە دە سۇحبات بەردى.

ءوز كەزەگىندە قىتاي حالىق رەسپۋبليكاسىنىڭ ءتوراعاسى شي جينپيڭ مەملەكەتتىك ساپار الدىندا قازاقستاننىڭ بۇقارالىق اقپارات قۇرالدارىنا ارناپ جازعان اۆتورلىق ماقالاسىن جاريالادى.