ساۋمالدان تابيعي كوسمەتيكا شىعارادى

استانا. KAZINFORM - وتكەن جىلدىڭ جەلتوقسان ايىندا قوستاناي وبلىسىنىڭ سولتۇستىگىندە ورنالاسقان مەڭدىقارا اۋدانىندا قۇرعاق ساۋمال شىعاراتىن زاماناۋي فەرما ىسكە قوسىلعان. وندا جىلقى ءسۇتى نەمىس تەحنولوگياسى ارقىلى تەرەڭدەتە وڭدەلەدى. «S- Agro-Borovskoe» جاۋاپكەرشىلىگى شەكتەۋلى سەرىكتەستىگى قۇرعاق ساۋمالدى مامىر ايىندا ساۋداعا شىعارۋدى جوسپارلاپ وتىر.

اتالعان سەرىكتەستىك پەن نەمىستىڭ «Zollmann Stutenmilch GmbH» كومپانياسى تاياۋدا تاعى ءبىر جاڭا جوبانى قولعا الماق. قوس تاراپ قوستاناي وبلىسىندا تابيعي كوسمەتيكا شىعاراتىن وندىرىستىك جەلىنى ىسكە قوسۋ تۋرالى كەلىسىمگە كەلىپ وتىر.

«نەمىس كومپانيامەن ارىپتەستىك اياسىندا جۇمىس ىستەپ جاتقانىمىزعا ەكى جىلدان استى. وتكەن جىلى وندىرىستىك سەح، اكىمشىلىك عيمارات پايدالانۋعا بەرىلدى. سالقىنداتقىش تانكتەر، پاستەريزاتور، 100 ليترلىك سۋبليماتور، ساۋۋ جۇيەسى ىسكە قوسىلدى. بولاشاقتا جىلىنا 40 تونناعا دەيىن ءونىم ءوندىرۋدى كوزدەپ وتىرمىز. فەرما 150 ادامدى تۇراقتى جۇمىسپەن قامتيدى. جوبانىڭ جالپى قۇنى - 10 ميلليارد تەڭگە. تاياۋدا بەرلين قالاسىندا كومپانيا باسشىسى گانس سولمان مىرزا ەكەۋمىز ءاۋ باستا ويلاستىرىلعان كەلىسىمشارتتىڭ ەكىنشى كەزەڭىنە قول قويىپ، جوبانى جۇزەگە اسىرۋ مەرزىمىن ۇزارتتىق. وسىلايشا، وسى جىلدىڭ ءۇشىنشى توقسانىندا بيە سۇتىنەن ورگانيكالىق كوسمەتيكا زاتتارىن جاساپ شىعاراتىن بىرلەسكەن ءوندىرىستى ىسكە قوسايىق دەپ جاتىرمىز. تسولمان مىرزا كەلىسىمشارتقا قول قويىپ جاتقان كەزدە قىمىزدىڭ وتانى بولىپ سانالاتىن قازاقستاننىڭ بيە ءسۇتىن وڭدەۋگە ەڭ قولايلى ەل ەكەنىن ايتتى. مەن دە ول كىسىنىڭ وسى ءسوزىن قولدايمىن. سوندىقتان ەكى تاراپ بولىپ بىرلەسىپ قولعا الىپ جاتقان جوبامىزدىڭ جەمىستى بولاتىنىنا ەش كۇمان جوق»، دەيدى «S-Agro-Borovskoe» ج ش س ديرەكتورى مەيرام احمەتجانوۆ.

سەرىكتەستىك باسشىسىنىڭ ايتۋىنشا، فەرما ۇنتاقتالعان قۇرعاق ساۋمالدىڭ حالىقارالىق سەرتيفيكاتى مەن جاڭا ءونىمنىڭ حالىقارالىق ساپاعا سايكەس كەلەتىنى تۋرالى دەكلاراتسيا العان.

«ءبىز العاشقى ءونىمدى شىعاردىق. ءبىراق ونى ساتۋعا جىبەرمەيمىز، الدىمەن ءوزىمىزدىڭ شەتەلدىك جانە وتاندىق ارىپتەستەرىمىزگە، ديستريبيۋتەرلەرىمىزگە ۇلەستىرىپ بەرەمىز. ولار ونىممەن تانىسىپ، ءوز تالداۋلارىن جاسايدى. ال مامىر ايىندا قۇرعاق ساۋمالدى رەسمي تۇردە ساۋداعا شىعارامىز. ول ۇنتاق تۇرىندە بولادى. سونىمەن قاتار ءبىز كاپسۋلاعا سالىنعان قۇرعاق ساۋمال شىعارىپ كورمەكپىز. باستى ماقساتىمىز - قازىرگى جاڭا تەحنولوگيا مەن اتا-بابامىزدان مۇرا بولىپ قالعان كاسىپتى ۇشتاستىرىپ، قازاق قىمىزىنىڭ ءدامى مەن قاسيەتىن حالىقارالىق دەڭگەيدە تانىتۋ. ساۋمال ادام دەنساۋلىعىنا پايداسى مول قاسيەتكە يە، سوندىقتان الداعى ۋاقىتتا بالالار مەن سپورتشىلارعا ارنالعان ونىمدەردى دە شىعارۋ ويدا بار»، دەيدى م. احمەتجانوۆ.

قوستاناي وبلىسى

egemen.kz