سالىقتىڭ ەكى تەڭگەسى تولەنبەي قالسا، ەسەپشوتتى بۇعاتتاپ تاستايدى - قازاقستاننىڭ جازۋشىلار وداعىنىڭ ءتوراعاسى

الماتى. KAZINFORM - الماتىداعى جازۋشىلار وداعىنىڭ عيماراتىندا اقىن-جازۋشىلار ق ر پرەزيدەنتىنىڭ جولداۋىن تالقىلادى.

جينالعاندار مەملەكەت باسشىسىنىڭ 2-قىركۇيەكتە جاريالانعان «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» جولداۋىنداعى ايتىلعان ماڭىزدى باعىتتاردى تالقىلادى.

«بىزدە سالىق ساياساتى وتە قاتال. سالىقتىڭ ەكى تەڭگەسى تولەنبەي قالسا، ەسەپشوتتى بۇعاتتاپ تاستايدى. پرەزيدەنتىمىز جولداۋىندا سونى ايتىپ وتىر. ءبىز جازۋشىلار مەن اقىندار كىتاپ شىعارامىز عوي. سول كەزدە قوسىمشا  سالىق تولەيمىز. ال ولار ءبىزدىڭ كىتاپتى شىعارۋ ءۇشىن قاعاز، بوياۋ ساتىپ الاتىنىمىزدى بىلمەيدى. بۇل كەرەك-جاراقتار شەت ەلدەن كەلەتىنى تاعى بار. مەنىڭ ويىمشا، بانك جۇيەسىنە زاڭ شىعارۋ كەرەك، ءبىر باعىتقا جۇيەلەۋ قاجەت. پرەزيدەنتتىڭ جولداۋىنداعى 8-9- پۋنكتتەردە كوكەيدە جۇرگەن ماسەلەنىڭ بارلىعى ايتىلعان. سونداي-اق جولداۋدا ايتىلعان ا ە س ماسەلەسىنە قاتىستى جازۋشىلارىمىز دا شەت قالماي ءوز پىكىرىن ءبىلدىرۋ كەرەك»، - دەدى قازاقستاننىڭ جازۋشىلار وداعىنىڭ ءتوراعاسى مەرەكە قۇلكەنوۆ.

باسقوسۋ بارىسىندا اقىن-جازۋشىلار جولداۋداعى بانك، قارجى جۇيەسى جايلى توقتالىپ ءوتتى.

«جولداۋدا كوپتىڭ كوكەيىندە جۇرگەن ماسەلە كوتەرىلدى. مەملەكەت باسشىسى Amanat پارتياسىنىڭ «قارىزسىز قوعام»، «اۋىل اماناتى» جوباسىنا قاتىستى ويىن جەتكىزدى. سونداي-اق سۋبسيديالاردى اگروونەركاسىپكە، اۋىل شارۋاشىلىعىنا باعىتتاۋ كەرەكتىگىن ايتتى. مەنىڭشە، بۇل ۇسىنىستار كەلەشەكتە جۇزەگە اسىپ، ەلىمىزدىڭ اۋىل شارۋاشىلىعى مەن ونەركاسىبى دامىپ، تاسى ورگە دومالايدى»، - دەدى اقىن الماس احمەتبەك ۇلى.

وسىعان دەيىن ق ر پارلامەنتى سەناتىنىڭ ءتوراعاسى ماۋلەن اشىمبايەۆ پرەزيدەنت جۇكتەگەن تاپسىرمالاردى ىسكە اسىرۋ ءۇشىن ساپالى زاڭدار قابىلداۋ مىندەتى تۇرعانىن ايتقان بولاتىن.

اۆتور
الما مۇقانوۆا