سالىق تولەمەۋدىڭ قانداي كەرى سالدارى بار

استانا. KAZINFORM - سالىق تولەمەۋدىڭ سالدارى اۋىر بولۋى مۇمكىن. ءوسىمپۇل ەسەلەنىپ، ءتىپتى قىلمىستىق تا جاۋاپكەرشىلىككە تارتىلۋىڭىز ىقتيمال.

وسى ورايدا سالىق كونسۋلتانتى Kazinform اگەنتتىگىنىڭ تىلشىسىمەن سۇحباتتاسۋ بارىسىندا بورىشكەرلەرگە قانداي شارالار قولدانىلاتىندىعىن ءتۇسىندىردى.

مۇلىك، كولىك جانە جەر سالىعى بويىنشا قارىز

جەكە تۇلعالار سالىقتى دەر ۋاقىتىندا تولەمەگەن جاعدايدا قايتا قارجىلاندىرۋدىڭ 1,25 ەسەلەنگەن رەسمي مولشەرلەمەسى كولەمىندە ءوسىمپۇل ەسەپتەلىنەدى.

تولەۋدەن باس تارتقان جاعدايدا ماتەريال ماجبۇرلەپ ءوندىرىپ الۋ ءۇشىن جەكە سوت ورىنداۋشىلارىنا بەرىلەدى. ءوز كەزەگىندە جەكە سوت ورىنداۋشىلارى مىناداي شارالاردى قولدانادى:

قازاقستان اۋماعىنان تىسقارى جەرگە شىعۋعا شەكتەۋ قويۋ
تىركەۋ ءىس- قيىل جاساۋعا شەكتەۋ قويۋ
سالىق تولەۋشىنىڭ مۇلكىن بۇعاتتاۋ
بانك ەسەپشوتتار بويىنشا شىعىس وپەراتسيالارىن توقتاتۋ
بورىشكەردىڭ ءوزىن تۇتقىنعا الۋ.
جەكە كاسىپكەرلەر مەن زاڭدى تۇلعالار سالىق تولەمىن كەشىكتىرسە...

ق ر اكىمشىلىك قۇقىق بۇزۋشىلىق تۋرالى كودەكسىنىڭ 279-بابى 2-تارماعىندا سالىقتى تولەۋ مەرزىمىن كەشىكتىرۋ نەمەسە سومانى تولىقتاي تولەمەگەنى ءۇشىن مىناداي ايىپپۇلدار كوزدەلگەن:

جەكە نوتاريۋستار، جەكە سوت ورىنداۋشىلارى، ادۆوكاتتار، شاعىن بيزنەس سۋبەكتىلەرى نەمەسە كوممەرتسيالىق ەمەس ۇيىم - 5 ا ە ك (19660 تەڭگە)
ورتا كاسىپكەرلىك سۋبەكتىلەرى - 10 ا ە ك (39320 تەڭگە)
ءىرى كاسىپكەرلىك سۋبەكتىلەرى - 20 ا ە ك (78640 تەڭگە) .
بۇل رەتتە ەگەر سالىق تولەۋشى تولەم سوماسىن ءوزى انىقتاپ، 3 جۇمىس كۇنى ىشىندە قوسىمشا سالىق ەسەپ- قيسابىن بەرۋ ارقىلى تولىق اۋدارسا ايىپپۇل تولەمەيدى.
سالىق دەكلاراتسياسىن دەر ۋاقىتىندا تاپسىرماۋ

ق ر اكىمشىلىك قۇقىق بۇزۋشىلىق تۋرالى كودەكسىنىڭ 272-بابىنا سايكەس، مەملەكەتتىك كىرىس ورگانىنا سالىق ەسەپتىلىگىن قازاقستان رەسپۋبليكاسىنىڭ زاڭنامالىق اكتىلەرىندە بەلگىلەنگەن مەرزىمدە ۇسىنباۋ - ەسكەرتۋ جاساۋعا اكەپ سوعادى. ال قايتالانعان جاعدايدا مىناداي سومادا ايىپپۇل تولەۋگە تۋرا كەلەدى:

جەكە تۇلعالار - 15 ا ە ك (58980 تەڭگە)
جەكەشە نوتاريۋستار، جەكە سوت ورىنداۋشىلارى، ادۆوكاتتار، شاعىن كاسىپكەرلىك سۋبەكتىلەرى نەمەسە كوممەرتسيالىق ەمەس ۇيىمدار - 30 ا ە ك (117960 تەڭگە)
ورتا كاسىپكەرلىك سۋبەكتىلەرى - 45 ا ە ك (176940 تەڭگە)
ءىرى كاسىپكەرلىك سۋبەكتىلەرى - 75 ا ە ك (272240 تەڭگە) .
دەكلاراتسياداعى قاتە

ەگەر قۇجاتتا قاتە نەمەسە دۇرىس ەمەس دەرەك كەتسە، وندا سالىق تولەۋشى ونى ءوز بەتىنشە تۇزەتە الادى. ول ءۇشىن 3 جىلدىق تالاپ مەرزىمى شەگىندە قوسىمشا دەكلاراتسيا تاپسىرۋ قاجەت.

شەتەلدەگى اكتيۆتەردى جاسىرۋ

شەتەلدەگى كىرىسىن جاسىراتىن نەمەسە شەتەلدەگى مۇلكىن دەكلاراتسيالاماعان جەكە تۇلعالار ءۇشىن 100 ا ە ك مولشەرىندە (393200 تەڭگە) ايىپپۇل كوزدەلگەن. وسى ورايدا 2025 -جىلدان باستاپ قازاقستان حالىقارالىق سالىق اقپاراتتارىن الماسۋ جۇيەسىنە بەلسەندى قاتىساتىندىعىن قاپەردە ۇستاۋ ماڭىزدى.

قانداي جاعدايدا بانك ەسەپشوتتى بۇعاتتايدى؟

سالىق بەرەشەگىنە بايلانىستى ەسەپشوتتاردى بۇعاتتاۋ تەك جەكە كاسىپكەرلەر مەن زاڭدى تۇلعالارعا قاتىستى. بۇل شارالار جەكە تۇلعالارعا قولدانىلمايدى.

پروتسەدۋرا كەلەسىدەي: الدىمەن، سالىق تولەۋشىگە قارىز تۋرالى حابارلاما جىبەرىلەدى. ەگەر سالىق تولەۋشى حابارلامانى ەلەمەسە جانە بەرەشەگىن وتەمەسە، وندا سالىق ورگانى سالىق تولەۋشىنىڭ بانكتىك ەسەپشوتتارى مەن سالىق تولەۋشى كاسساسى بويىنشا وپەراتسيالاردى توقتاتادى.

بۇعاتتاۋ جەدەلدىگى سالىق تولەۋشىنىڭ قانداي تاۋەكەل ساناتىنا كىرەتىندىگىنە بايلانىستى:

تاۋەكەلدىڭ جوعارى دەڭگەيى - حابارلامادان سوڭ 1 جۇمىس كۇنىنەن كەيىن
تاۋەكەلدىڭ ورتا دەڭگەيى - 10 جۇمىس كۇنىنەن كەيىن.
قارىز وتەلگەننەن كەيىن 1 جۇمىس كۇنىنىڭ ىشىندە بۇعات الىنادى.

قانداي جاعدايدا قىلمىستىق جاۋاپكەرشىلىككە تارتۋى مۇمكىن؟

سالىق قىلمىستارىن ىزگىلەندىرۋ ماقساتىندا قر قىلمىستىق كودەكسىندە قىلمىستىق ءىس قوزعاۋدىڭ شەكتى ءمانى ۇلعايتىلدى. وسىعان بايلانىستى سالىق سالۋ سالاسىنداعى اكىمشىلىك قۇقىق بۇزۋشىلىق تۋرالى باپتىڭ سانكتسياسىنداعى ايىپپۇلدار مولشەرى ۇلعايتىلدى (ا ق ب ت ك- ءنىڭ 275، 278، 280-باپتارى) .

ەندى ا ق ب ت ك- ءنىڭ 275-بابىندا جاسىرىن سالىق سالۋ وبەكتىسى بويىنشا تولەۋگە جاتاتىن سالىق جانە باسقا دا مىندەتتى تولەمدەر سوماسىنىڭ 200 پايىزى مولشەرىندە اكىمشىلىك جاۋاپكەرشىلىك كوزدەلگەن. بۇعان دەيىن ايىپپۇل 150 پايىز ەدى.

ءبىر جىل ىشىندە قايتالاپ جاسالعان قۇقىق بۇزۋشىلىق سالىق جانە باسقا دا مىندەتتى تولەمدەر سوماسىنىڭ 200 پايىز ەمەس، 300 پايىز مولشەرىندە ايىپپۇل سالۋعا اكەپ سوعادى.

سالىق تولەۋشى ءۇشىن قىلمىستىق جاۋاپتىلىق ءىرى سومادا - 50000 ا ە ك- تەن استام سالىقتاردى تولەمەگەن جاعدايدا تۋىندايدى، ەگەر سوما ءبىر جىلداعى بارلىق سالىقتاردىڭ 10 پايىزدان استامىن قۇراسا.

دەكلاراتسيانى ۇسىنباۋ، دەكلاراتسياعا كىرىستەر نەمەسە شىعىستار تۋرالى ادەيى بۇرمالانعان مالىمەتتەردى ەنگىزۋ، سالىق سالۋدىڭ باسقا وبەكتىلەرىن نەمەسە باسقا دا مىندەتتى تولەمدەردى جاسىرۋ جولىمەن سالىقتى نەمەسە بيۋدجەتكە تولەنەتىن باسقا دا مىندەتتى تولەمدەردى تولەۋدەن جالتارۋ، ەگەر بۇل ءىس- ارەكەت ىرى مولشەردە سالىقتى تولەمەۋگە اكەپ سوقسا، 2000 ايلىق ەسەپتىك كورسەتكىش مولشەرىنە دەيىن ايىپپۇل سالۋعا نەمەسە:

ءدال سونداي مولشەردە تۇزەتۋ جۇمىستارىنا تارتۋعا
800 ساعاتقا دەيىن مەرزىمگە قوعامدىق جۇمىسقا تارتۋعا
3 -جىلعا دەيىن باس بوستاندىعىن شەكتەۋگە
ءدال سونداي مەرزىمگە بەلگىلى لاۋازىمدا قىزمەت اتقارۋ قۇعىنان ايىرا وتىرىپ باس بوستاندىعىنان ايىرۋعا الىپ كەلەدى.
ايتا كەتەيىك، 25 -ماۋسىمدا پارلامەنت جاڭا سالىق كودەكسىن بەكىتكەن ەدى.