سالىمشىلار ءۇي مەن كولىكتەرىن كەپىلگە قويعان: شىمكەنتتە قارجى پيراميداسى اشكەرەلەندى
شىمكەنت. KAZINFORM - شىمكەنت قالاسى بويىنشا ق م ا «Mooni Gold» قارجى پيراميداسىنىڭ زاڭسىز ارەكەتىن اشكەرەلەدى.
- تەرگەۋ دەرەكتەرىنە ساي كۇدىكتىلەر وزدەرىن زەرگەرلىك بۇيىمدار ساتاتىن كومپانيا رەتىندە كورسەتىپ، ازاماتتارعا 5 اي بويى سالىم سوماسىنىڭ -30- ىن اي سايىن تابىس رەتىندە بەرۋگە جانە نەگىزگى قاراجاتتىڭ ساقتالۋىنا كەپىلدىك بەرگەن. الايدا، تولەمدەر ناقتى ساتۋدان تۇسكەن پايدادان ەمەس، جاڭا قاتىسۋشىلاردىڭ سالىمدارى ەسەبىنەن جۇزەگە اسىرىلعان. ناتيجەسىندە قارجى پيراميداسىنا قاتىسۋشىلار سانى مىڭنان استى. زالال كولەمى 500 ميلليون تەڭگەدەن استى، - دەلىنگەن ق م ا حابارلاماسىندا.
كۇدىكتىلەر قىلمىستىق جولمەن الىنعان تابىسقا جالپى قۇنى 280 ميلليون تەڭگە بولاتىن ەليتالىق ءۇي مەن اۆتوكولىك ساتىپ العان. بۇل مۇلىككە سوت شەشىمىمەن تىيىم سالىندى.
- ءتىنتۋ كەزىندە 15 ميلليون تەڭگە قولما-قول اقشا جانە قۇنى 28 ميلليون تەڭگەدەن اساتىن 67 ءتۇرلى التىن بۇيىم تاركىلەندى. ماڭىزدىسى، سالىمشىلاردىڭ كوپشىلىگى ءوز ۇيلەرى مەن كولىكتەرىن كەپىلگە قويىپ، نەسيە راسىمدەي وتىرىپ، پيراميداعا اقشا سالعان. زارداپ شەككەندەردىڭ ءبىرى - زەينەتكەر ايەل، ول پاتەرىن كەپىلگە قويىپ، ۇيىمداستىرۋشىلارعا 67 ميلليون تەڭگە بەرگەن. سونىمەن قاتار، كۇدىكتىلەر سالىمشىلاردى «دروپپەر» رەتىندە پايدالانعان. باسقا قاتىسۋشىلاردان تۇسكەن قاراجاتتى وزگە سالىمشىلاردىڭ بانك شوتتارى ارقىلى قولما-قول اقشاعا اينالدىرعان، - دەلىنگەن حابارلامادا.
كۇدىكتىلەر ەكى ايعا قاماۋعا الىندى.
قازاقستان رەسپۋبليكاسىنىڭ قىلمىستىق- پروتسەستىك كودەكسىنىڭ 201-بابىنا سايكەس، باسقا اقپارات جاريا ەتىلمەيدى.