سالماق تاستاۋشىلار اراسىندا تانىمال Ozempic پرەپاراتى تۋرالى نە بىلەمىز
استانا. قازاقپارات - Ozempic پرەپاراتى الەمدە كەڭىنەن تانىمال. ينتەرنەتتەگى اقپاراتتارعا سۇيەنسەك، ول گولليۆۋد جۇلدىزدارىنىڭ اراسىندا دا سۇرانىسقا يە سەكىلدى.
شەتەلدىك ب ا ق- تىڭ جازۋىنشا، كەيبىر ارتىستەر قىزىل كىلەمدە جارقىراپ ءجۇرۋ ءۇشىن وسى پرەپاراتقا جۇگىنەدى ەكەن. بايقاعانىمىزداي، بۇل ءتاسىل قازاقستانعا دا جەتىپتى. وسى ورايدا، اگەنتتىك ءتىلشىسى ماسەلەنى تارقاتىپ كورگەن ەدى.
پرەپاراتتى قولدانىپ جۇرگەن پاتسيەنتتىڭ پىكىرى
استانالىق بويجەتكەن ايدانا قوشقاربايدىڭ اتالعان پرەپاراتتى قولدانىپ جۇرگەنىنە ءۇش ايعا جۋىقتاپتى. وسى ۋاقىت ارالىعىندا 8 كەلى سالماق تاستاعان.
«پرەپاراتتى ەندوكرينولوگ دارىگەردىڭ نۇسقاۋى بويىنشا قابىلدايمىن، سەبەبى مەندە ينسۋلينرەزيستەنتتىلىك بار جانە اناليزدەر ناشارلادى، سوندىقتان مەنىڭ ەندوكرينولوگ دارىگەرىم وسى پرەپاراتتى تاعايىندادى. ءوز باسىم بۇل پرەپاراتتى ەشقاشان ارتىق سالماقتان ارىلۋ ماقساتىندا قابىلداۋعا كەڭەس بەرمەيمىن»، - دەيدى ەلوردا تۇرعىنى.
سونداي- اق، پاتسيەنت اڭگىمە بارىسىندا پرەپاراتتىڭ وزىنە وڭ اسەر ەتىپ جاتقانىن ايتىپ قالدى.
«ماعان وڭ اسەر ەتىپ جاتىر، ياعني تابەتتى جانە دەنساۋلىقتى باقىلاۋ تۇرعىسىنان عانا ەمەس، سونىمەن قاتار پسيحولوگيالىق جاعدايىم مەن جاقسى كوڭىل كۇيدە جۇرۋىمە سەپتىگىن تيگىزەدى. ءوزىمدى جاقسى سەزىنەمىن، ەشقانداي كەرى اسەرى بولعان جوق. ال سالماق تاستاۋ جاعىنان كەلسەك، ءدارىنى قابىلداپ جاتقالى 3 ايدىڭ ىشىندە ەشقانداي كۇش جۇمساماي 8 كەلىگە ارىقتادىم»، - دەپ جەكە تاجىريبەسىن ءبولىستى استانالىق ارۋ ايدانا قوشقارباي.
دارىگەر ماماندار نە دەيدى؟
«Ozempic®- جاڭا گيپوگليكەميالىك- فارماتسيەۆتيكالىق پرەپارات. ونى 2 ءتيپتى قانت ديابەتى، بۇرىننان قانت ديابەتىمەن كۇرەسىپ كەلە جاتقان پاتسيەنتتەرگە، وعان قوسا جۇرەك قان تامىر جۇيەسىندە اسقىنۋلارى بار ناۋقاستارعا، سەمىزدىك، ياعني دەنە سالماعى يندەكسى 30 دان جوعارى سونىمەن قاتار ينسۋلينرەزيستەنتتىلىك بەلگىلەرى بار پاتسيەنتتەرگە نۇسقاۋلىققا سايكەس تاعايىندايدى»، - دەيدى ەندوكرينولوگ ايگۇل جۇمامۇرات.
ماماننىڭ ايتۋىنشا، قازىر ارتىق سالماقتان تەز ارىلۋ ماقساتىندا بۇل پرەپاراتتى دارىگەردىڭ نۇسقاۋىنسىز قولدانىپ جۇرگەندەر جەتكىلىكتى. ول - مەديتسينالىق تۇرعىدان قاتە.
«سەبەبى، ءار دارىلىك پرەپاراتتىڭ وڭ اسەرى مەن جاناما جانە قارسى كورسەتكىشتەرى بار. سونىمەن ءار ادامنىڭ اعزاسىنا بايلانىستى، بىرەۋگە جاققانىمەن، ەكىنشىگە كەرى اسەرىن تيگىزۋى مۇمكىن. سوندىقتان دا ارىقتاۋ ماقساتىندا وسى جانە باسقا ءدارى- دارمەكتى قولدانار الدىندا اناليز تاپسىرىپ، ەندوكرينولوگ مامانىنىڭ كەڭەسىن العان ءجون»، - دەيدى ول.
سونداي-اق، مامان قانت ديابەتىمەن كۇرەسكە ارنالعان پرەپاراتتىڭ ارتىق سالماقتان ارىلۋعا قاتىسى تۋرالى ايتىپ بەردى.
«فارماكوتەراپيالىك اسەرى بويىنشا بىرىنشىدەن، ۇيقى بەزىنەن ينسۋلين گورمونىنىڭ ءوندىرىلۋىن جوعارىلاتادى جانە گليۋكاگون (ينسۋلينگە قارسى اسەر) گورمونىنىن سەكرەتسياسىن تومەندەتەدى، سونىڭ ناتيجەسىندە قانداعى قانت مولشەرى ازايادى. ەكىنشىدەن، اسقازاننىڭ موتوريكاسىن تومەندەتۋ اركىلى، ادام ۇزاق ۋاكىتقا دەيىن توق جۇرەدى. ۇشىنشىدەن، ميداعى اس قورىتۋ، تابەت ورتالىعىنا اسەرى بار، وسى ورايدا ادامدا ۇزاق ۋاقىتقا دەيىن اشتىق سەزىمى تۋىندامايدى»، - دەپ ءتۇسىندىردى ەندوكرينولوگ.
ودان بولەك، بۇل ءدارى رەتسەپت بويىنشا ارىقتاۋعا ارنالماعاندىقتان جاناما اسەرى دە بار ەكەن.
«ەڭ ءجيى كەزدەسەتىنى - اسقازان، ىشەك جولدارى اۋرۋلارىنىڭ اسقىنۋى. ول دەگەنىمىز - جۇرەك اينۋ، قۇسۋ، ءىش ءوتۋ، ءىش قاتۋ، ءىشتىڭ جەلدەنۋى تاعى سول سياقتى. سونىمەن قاتار پرەپاراتتى قابىلداۋ بارىسىندا سالاۋاتتى ءومىر سالتىن ۇستانعان ابزال، وعان قوسا دۇرىس تاماقتانۋ دا ماڭىزدى. سەبەبى، پرەپاراتتى قولدانۋدى توقتاتقان جاعدايدا جوعالعان سالماق قايتا قالپىنا كەلۋ قاۋپى بار. تاعى ءبىر ەسكەرەتىن جايت، سوڭعى جۇرگىزىلگەن مەتا اناليز بويىنشا اتالعان پرەپارات پەن وعان بالاما دارىلەردى قالقانشا بەزى قاتەرلى ىسىگىنە شالدىعۋ ءقاۋپى جوعارى ەكەنى انىقتالدى»، - دەپ ەسكەرتتى مامان.
وسىلايشا ايگۇل جۇمامۇرات ارىقتاۋ مارافونىندا جەڭىمپاز بولىپ تۇرعان پرەپاراتتى دارىگەردىڭ باقىلاۋىمەن قولدانعان دۇرىس دەپ وتىر. ونىڭ ايتۋىنشا، ارىقتاۋدىڭ تابيعي جولى - دۇرىس تاماقتانۋ، سالاۋاتتى ءومىر سالتىن ۇستانۋ، ونىڭ ىشىندە سپورت تا بار جانە زيان ادەتتەردەن اۋلاق بولۋ.
Ozempic ەلىمىزدە تىركەلگەن بە؟
دەنساۋلىق ساقتاۋ مينيسترلىگىنىڭ رەداكسيا جولداعان ساۋالعا جاۋابىندا بىلاي دەلىنگەن:
«قازاقستان رەسپۋبليكاسىندا مەملەكەتتىك تىزىلىمدە Ozempic® (منن سەماگلۋتيد) دارىلىك پرەپاراتى تىركەلگەن. ءوندىرۋشى دانيا ەلىنىڭ Novo Nordisk فارماتسيەۆتيكالىق كومپانياسى».
رەسمي اقپاراتتا ايتىلعانداي، پرەپاراتتىڭ مولشەرى (دوزا) 1,5 م ل جانە 3 م ل بولىپ ەكىگە بولىنەدى جانە ولاردىڭ ەلىمىزدە تىركەلۋ مەرزىمى بار. اتاپ ايتقاندا، 1,5 م ل دوزا Ozempic® پرەپاراتى 17.09.2025 -جىلعا دەيىن، ال 3 م ل 04.09.2025 -جىلعا دەيىن تىركەلگەن.
پرەپاراتتى مەديتسينالىق قولدانۋ جونىندەگى نۇسقاۋلىققا سايكەس:
- ەرەسەك پاتسيەنتتەردە 2 ءتيپتى قانت ديابەتىن باقىلاۋ قاناعاتتانارلىقسىز جاعدايعا جەتكەندە ديەتا ءۇشىن جانە فيزيكالىق بەلسەندىلىكتى ارتتىرۋعا قوسىمشا قولدانۋعا؛
- مەتفورميندى نۇسقاۋلىق ورىنسىز تاعايىندالعان كەزدە توزىمسىزدىككە نەمەسە قارسى كورسەتىلىمدەرگە بايلانىستى مونوتەراپيا رەتىندە؛
- قانت ديابەتىنەن ەمدەۋ بارىسىندا باسقا ءدارى- دارمەككە قوسىمشا پرەپارات رەتىندە. باسقا پرەپاراتتار قاتارىنا مەتفورمين، تيازوليدينديوندار، 2 ءتيپتى ناتري- گليۋكوزا كوترانسورتەر ينگيبيتورلارى (NGLT-2) ) نەمەسە ينسۋلين.
«Ozempic® دارىلىك پرەپاراتى دارىگەردىڭ رەتسەپتى بويىنشا بەرىلەدى جانە فارماتسيەۆتيكالىق قىزمەت ەتۋگە ءتيىستى ليتسەنزياسى بار ءدارىحانالاردا عانا ساتىلۋى ءتيىس. سونداي- اق، رۇقساتى بار ءدارىحانالار رەتسەپت بويىنشا پرەپاراتقا قاتىستى قوسىمشا شارتتاردى، سونىڭ ىشىندە پرەپاراتتى قولدانار الدىندا رەتسەپتى قاتاڭ ساقتاۋى كەرەك»، - دەپ تولىقتىردى مينيسترلىكتەن.
وسىلايشا، Ozempic® پرەپاراتىن قانت ديابەتىمەن كۇرەستە بولسىن، ارىقتاۋ ءۇشىن بولسىن دارىگەردىڭ نۇسقاۋىنسىز قولدانۋعا بولمايدى، ياعني تەك رەتسەپت بويىنشا ساتىلادى. وسى ورايدا ەلوردانىڭ بىرنەشە ءدارىحاناسىن ارالاپ، Ozempic® پرەپاراتى ساتىلا ما دەپ سۇراپ كورگەن ەدىك. ءبىز بارعان ءدارىحانالار (4 ءدارىحانا - رەد. ) پرەپاراتتىڭ ساتىلىمدا جوق ەكەنىن ايتتى.
ودان بولەك، ونلاين ساۋدا قىزىپ تۇرعان زامان عوي دەپ ينتەرنەتتەن قاراپ كوردىك، i-teka.kz ءدارىحانالار جانە ءدارى- دارمەك انىقتاما قىزمەتىندە Ozempic® پرەپاراتى ەركىن ساتىلىمدا بار بولىپ شىقتى. باعاسى 58000 تەڭگەدەن باستالىپ 120000 تەڭگەگە دەيىن بارادى. ونىڭ ىشىنە 1 م گ (0,68 م گ، 1,34 م گ نەمەسە 2,68 م گ سەماگلۋتيد) ينەكتسيا ءۇشىن ەرىتىندى، شپريتس ينەسىمەن قوسا بەرىلەدى.
اۆتور
داۋلەت ىزتىلەۋ