سالماعى جارتى كەلىگە جۋىقتايتىن 100 جىلداعى ەڭ ۇلكەن الماز تابىلدى

استانا. قازاقپارات - رەسمي وكىلدەر تاستىڭ قۇنىن انىقتاۋعا نەمەسە قالاي ساتىلاتىنىن شەشۋگە ءالى ەرتە ەكەنىن ايتتى.

بوتسۆانادان تابىلعان كەيىنگى 100 جىلداعى ەڭ ۇلكەن الماز بۇكىل الەمگە تانىستىرىلدى. ەل پرەزيدەنتى جۇدىرىقتاي اسىل تاستى رەسمي ءىس-شارادا كورسەتتى، دەپ حابارلادى apnews.com.

بوتسۆانا ۇكىمەتىنىڭ مالىمەتىنشە، 2492 كاراتتىق الىپ الماز - الەمدە شاحتادان تابىلعان ەڭ ۇلكەن ەكىنشى تاس. بۇل 1905 -جىلدان بەرى تابىلعان ەڭ ۇلكەن الماز بولىپ وتىر.

ازىرشە اتاۋى جوق المازدى بوتسۆانا پرەزيدەنتى موكگۆەتسي ماسيسي كەڭسەسىندە الەمگە تانىستىردى. سالماعى جارتى كەلىگە جۋىقتايدى جانە العاشقىلاردىڭ ءبىرى بولىپ ماسيسي ونى قولىنا ۇستادى.

«بۇل - تاڭعالارلىق نارسە»، - دەدى ماسيسي. «مەن مۇندايدى كورگەنىمە قۋانىشتىمىن».

رەسمي وكىلدەر تاستىڭ قۇنىن انىقتاۋعا نەمەسە قالاي ساتىلاتىنىن شەشۋگە ءالى ەرتە ەكەنىن ايتتى. 2016 -جىلى بوتسۆانانىڭ سول شاحتاسىنان تابىلعان باسقا ءبىر كىشىگىرىم الماز 63 ميلليون دوللارعا ساتىلعان بولاتىن، بۇل - وڭدەلمەگەن اسىل تاستىڭ رەكوردتىق باعاسى.