ساكەن بيبوسىنوۆ كاسىپقوي بوكستاعى ماقساتىن ايتتى

استانا. قازاقپارات – 20-شىلدە كۇنى ساكەن بيبوسىنوۆ بىشكەكتە 23 جاستاعى فيليپپيندىك بوكسشى كريستيان لەگانەنى (6-1-3، 4 KO) جەڭدى. جەكپە-جەك 52,1 كەلى سالماق دارەجەسىندە التى راۋندقا جوسپارلانعان بولاتىن. الايدا، ساكەن قارسىلاسىن نوكاۋتقا جىبەرىپ، كەزدەسۋدى مەرزىمىنەن بۇرىن اياقتادى.

بوكسشى Sportbugin.kz تىلشىسىنە بەرگەن سۇحباتىندا الداعى جوسپارى تۋرالى ايتىپ بەردى.

«كەزدەسۋ ءوزىمىز ويلاعانداي ءوتتى. دايىندىق كەزىندە باۋىرعا جاسالاتىن سوققىعا باسىمدىق بەرىپ، كوپ قايتالادىق. ءبىرىنشى راۋندتا تاپ وسى باۋىرعا سوققى جاساۋ ارقىلى نوكداۋن اشۋدى جوسپارلاعان ەدىك. ءبارى ءبىز قالاعانداي بولعانىنا قۋانىشتىمىن. قارسىلاسىمدى ابدەن زەرتتەدىم. بۇل جەڭىس ءوزىمدى دە، باپكەرلەر مەن جانكۇيەردى دە، وسى جەكپە-جەكتى ۇسىنعان جاپوندىق پروموۋتەرلەردى دە قۋانتىپ تاستادى.

پروموۋتەرلەر بىردەن ەكىنشى جەكپە-جەككە قاتىسۋعا ۇسىنىس جاسادى. ءبىراق بۇل تەك مەن شەشەتىن نارسە ەمەس. بوكستان ۇلتتىق قۇراما ساپىندامىن، سوندىقتان، باس باپكەردىڭ، قازاقستان بوكس فەدەراتسياسىنىڭ كەلىسىمىمەن تاڭدايتىن بولامىن. اۋەسقوي بوكستاعى كۇنتىزبەگە كەدەرگى بولمايتىن كەزدەردە عانا جۇدىرىقتاسامىن. باپكەرىم ەكى جاقتى دا الىپ جۇرەتىنىمدى ايتتى، سولاي بولۋى دا مۇمكىن»، - دەدى بيبوسىنوۆ.

وسى كەشتى ۇيىمداستىرعان جاپونيالىق پروموۋتەرلەر ساكەن بيبوسىنوۆقا جاقسى ۇسىنىستار جاساپ جاتىر.

«مەنىڭ بوكس مانەرىم ۇيىمداستىرۋشىلارعا ۇنادى. ولار مەنىڭ الەمدىك رەيتينگىدە تەز كوتەرىلۋىمە جاعداي جاساپ، مىقتى قارسىلاستارمەن كەزدەسۋ وتكىزۋگە دايىن ەكەندىكتەرىن ايتتى. ەكى-ءۇش جەكپە-جەكتەن سوڭ ازيانىڭ، ءتورتىنشى-بەسىنشى كەزدەسۋدە الەم چەمپيونى بەلبەۋىنە تالاسۋ مۇمكىندىگى بارىن ايتتى. بۇل ازىرگە الداعى ۋاقىتتىڭ ەنشىسىندەگى دۇنيە»، - دەدى بوكسشى.

كاسىبي بوكستا گونورار ماسەلەسىنىڭ ماڭىزدى ەكەنى بەلگىلى. ءبىراق بيبوسىنوۆ ءوزى ءۇشىن اقشانىڭ ماڭىزدى ەمەستىگىن ايتتى.

«ماعان اقشا ەمەس، ناتيجە ماڭىزدى. اقشا قىزىق ەمەس ماعان. كاسىبي نەمەسە اۋەسقوي بوكس بولسىن، ۇزدىك ناتيجە تىركەپ، جەتىستىككە جەتسەم - ماقساتىمنىڭ ورىندالعانى»، - دەدى ول.