23-مامىر كۇنى بىشكەكتە وتەتىن بوكس كەشىندە بيبوسىنوۆ WBA Asia بەلبەۋى ءۇشىن شارشى الاڭعا شىعادى. ونىڭ قارسىلاسى - يندونەزيالىق سۋريا دحارما (4-0، 3 ك و).
ساكەننىڭ ايتۋىنشا، بۇل ايقاس ونىڭ كاسىبي مانسابىنداعى ەڭ ماڭىزدى سىناقتاردىڭ ءبىرى بولماق.
«بۇل - مەن ءۇشىن ۇلكەن مارتەبە. ءۇشىنشى كاسىبي جەكپە-جەكتە بىردەن چەمپيوندىق بەلبەۋگە تالاسۋ - وڭاي نارسە ەمەس. ونىڭ ۇستىنە، ءبىزدى تولىق 10 راۋندتىق كەزدەسۋ كۇتىپ تۇر. سوندىقتان دايىندىقتى دا سوعان ساي كۇشەيتتىك. قازىر جاتتىعۋ پروتسەسى بارىنشا قارقىندى ءوتىپ جاتىر. ەلگە WBA Asia بەلبەۋىن الىپ بەرگىم كەلەدى. باستى ماقساتىم - جانكۇيەرلەرگە ساپالى بوكس كورسەتىپ، كاسىبي رينگتەگى العاشقى تيتۋلىمدى جەڭىپ الۋ»، - دەدى بيبوسىنوۆ.
سونداي-اق ول قارسىلاسىنىڭ وسال ەمەستىگىن دە اتاپ ءوتتى. يندونەزيالىق بوكسشى وسى ۋاقىتقا دەيىن وتكىزگەن ءتورت كەزدەسۋىنىڭ بارىندە جەڭىسكە جەتكەن.
«قارسىلاس شىنىمەن مىقتى. ءبىراق ءدال وسىنداي بوكسشىلارمەن جۇدىرىقتاسۋ كەرەك. سەبەبى الداعى ۋاقىتتا قارسىلاستارىمىز ودان سايىن كۇشەيە بەرەدى. مەنىڭ تۇپكى ماقساتىم - كاسىپقوي بوكستا الەم چەمپيونى اتانۋ. قازىر سۋريا دحارمانىڭ بارلىق قىرىن مۇقيات زەرتتەپ جاتىرمىز. جەكپە-جەككە ناقتى جوسپارمەن شىعامىن جانە تەك جەڭىس ءۇشىن ايقاسامىن»، - دەدى قازاقستاندىق بىلعارى قولعاپ شەبەرى.
ەسكە سالساق، ساكەن بيبوسىنوۆ كاسىپقوي بوكستاعى دەبيۋتىن 2025-جىلدىڭ 20-شىلدەسىندە وتكىزگەن بولاتىن. سول كەشتە ول فيليپپيندىك كريستيان لەگانەنى مەرزىمىنەن بۇرىن جەڭگەن ەدى.