سۋديا جانات ابەنوۆا سوت وتىرىسىنا قاتىسۋشىلارعا سوت زالىنداعى ءتارتىپتى ءتۇسىندىرىپ، سوت تورەلىگىنە قانداي دا ءبىر قىسىم كورسەتۋگە جول بەرىلمەيتىنىن ەسكەرتتى.
سۋديانىڭ ايتۋىنشا، سوت وتىرىسىنىڭ اشىقتىعىن ساقتاۋ ماقساتىندا ب ا ق وكىلدەرى مەن تىڭداۋشىلارعا ارنالعان ارنايى زالدا تىكەلەي ترانسلياتسيا ۇيىمداستىرىلعان. ول دىبىس-بەينەجازبا جانە فوتو ءتۇسىرىلىم ءتارتىبى ق ر قىلمىستىق-پروتسەستىك كودەكسىنىڭ 345-بابىمەن رەتتەلەتىنىن ايتتى. سوت زالىندا ۇيالى تەلەفون ارقىلى وزگە جازبا جاساۋعا جانە ترانسلياتسيا جۇرگىزۋگە تىيىم سالىنادى.
جانات ابەنوۆا سوت بيلىگىنىڭ تاۋەلسىزدىگىن اتاپ ءوتىپ، سوتتىڭ تەك كونستيتۋتسيا مەن زاڭعا باعىناتىنىن ەسكەرتتى. سونداي-اق ىسكە قاتىستى ب ا ق پەن الەۋمەتتىك جەلىلەردە جاريالانعان پىكىرلەر مەن باعالاۋلار سوتقا قىسىم كورسەتۋ رەتىندە قاراستىرىلاتىنىن مالىمدەدى.
سۋديا جۋرناليستەر مەن الەۋمەتتىك جەلى قولدانۋشىلارىن سوت پروتسەسىن جاريالاۋدا جاۋاپكەرشىلىك تانىتىپ، تەكسەرىلمەگەن اقپارات پەن ارانداتۋشى مالىمدەمەلەردى تاراتپاۋعا شاقىردى. ونىڭ ايتۋىنشا، مۇنداي جاريالانىمدار قوعامدا ىسكە قاتىستى ءبىرجاقتى كوزقاراس قالىپتاستىرۋى مۇمكىن.
سونىمەن قاتار سوت وتىرىسىنا قاتىسۋشىلار مەن تىڭداۋشىلارعا ءتارتىپ بۇزىپ، سۋديانىڭ تالابىنا باعىنباعان جاعدايدا زالدان دەرەۋ شىعارىلاتىنى، سوتتى قۇرمەتتەمەگەنى ءۇشىن ق ر قىلمىستىق-پروتسەستىك كودەكسىنىڭ 346-بابىنا سايكەس جاۋاپقا تارتىلاتىنى ەسكەرتىلدى.
ەسكە سالا كەتەيىك، سانجار بوقايەۆ بيىل ناۋرىزدا ۇستالىپ، ءبىرقاتار قىلمىس جاسادى دەگەن كۇدىككە ءىلىندى. وعان قاتىستى قىلمىستىق ءىس قىلمىستىق كودەكستىڭ 190، 188، 218، 340 جانە 274-باپتارى بويىنشا قارالىپ جاتىر.