سادىر جاپاروۆ قىرعىزستان ءانۇرانىن وزگەرتۋ باستاماسىن قولدادى

بىشكەك. KAZINFORM - قىرعىزستان پرەزيدەنتى سادىر جاپاروۆ «كابار» اگەنتتىگىنە بەرگەن سۇحباتىندا جوگوركۋ كەنەش سپيكەرى نۇرلانبەك شاكيەۆتىڭ مەملەكەتتىك ءانۇراندى وزگەرتۋ تۋرالى ۇسىنىسىنا قاتىستى پىكىرىن ءبىلدىردى، دەپ حابارلايدى Kazinform مەنشىكتى ءتىلشىسى.

قىرعىز باسشىسى بۇل يدەيانى قولداۋ قاجەت دەپ سانايدى.

«ءانۇراندى وزگەرتسەك جاقسى بولار ەدى. ونى جاڭارتساق، نەسى جامان؟ قازىرگى ءانۇرانىمىز وسىدان 33 جىل بۇرىن تاۋەلسىزدىك العان تۇستا جازىلعان. ءانۇران اۆتورلارى ەل ازاتتىق پەن تاۋەلسىزدىككە قول جەتكىزىپ، قىرعىز حالقىنىڭ تاعدىرى سولاردىڭ قولىندا ەكەنىن قۋانىشپەن، تولقۋمەن جازدى. سودان بەرى 33 جىل ءوتتى. ءبىز تولىققاندى مەملەكەتكە اينالدىق. ءبىزدى بۇكىل الەم بىلەدى. ءجۇز جىلدان كەيىن ازاتتىق الىپ، تاۋەلسىز ەل بولدىق دەپ جىرلاي بەرمەكپىز بە؟ تاۋەلسىز مەملەكەت ەكەنىمىزدى، بەس مىڭ جىلدىق تاريحى بار حالىق ەكەنىمىزدى جىرلاپ، جاستاردى، بولاشاق ۇرپاقتى جىگەرلەندىرەتىن ءانۇران نەگە جازباسقا؟ ارينە، قازىرگى ءانۇرانىمىز ۇمىتىلمايدى. ول رەسپۋبليكامىزدىڭ تۇڭعىش ءانۇرانى رەتىندە تاريح مۇراعاتىندا قالادى»، - دەدى ول.

سادىر جاپاروۆ بۇعان دەيىن كەيبىر دەماگوگتار مەن پوپۋليستەردىڭ دە تۋدى وزگەرتۋ يدەياسىنا قارسى بولعانىن ەسكە سالدى.

«قازىرگى تۋىمىز جامان با؟ ول بۇرىنعىمەن سالىستىرعاندا جاقسىراق بولدى. ەسكى جالاۋداعى كۇن سيمۆولى نە كۇنباعىسقا، نە «اعاش تىلگىشكە» ۇقسايتىن. ەندى بۇل كۇن ساۋلەسى ەكەنى بىردەن بەلگىلى بولدى. ول جارقىراپ تۇر»، - دەپ ءتۇسىندىردى پرەزيدەنت.

بۇعان دەيىن جوگوركۋ كەنەش سپيكەرى نۇرلانبەك شاكيەۆ قىرعىزستان ءانۇرانىن قايتا جازۋدى ۇسىنعانى حابارلانعان بولاتىن.

ەسكە سالا كەتسەك، قىرعىزستان پرەزيدەنتى سادىر جاپاروۆ «ق ر مەملەكەتتىك رامىزدەرى تۋرالى» ق ر زاڭىنا وزگەرىستەر مەن تولىقتىرۋلار ەنگىزۋ تۋرالى» 20-جەلتوقساندا جوگوركۋ كەنەش قابىلداعان زاڭعا قول قويدى.