سادىر جاپاروۆ قازاقستاننىڭ سىرتقى ىستەر ءمينيسترى مۇرات نۇرتىلەۋدى قابىلدادى
استانا. KAZINFORM-قىرعىزستان پرەزيدەنتى سادىر جاپاروۆ قازاقستان رەسپۋبليكاسى پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋدى قابىلدادى.
قىرعىزستان رەسپۋبليكاسى پرەزيدەنتى باسپاءسوز قىزمەتىنىڭ حابارلاۋىنشا، تاراپتار قىرعىز-قازاق كوپ جوسپارلى ىنتىماقتاستىعىن ودان ءارى دامىتۋ مەن تەرەڭدەتۋ، سونداي-اق ساۋدا-ەكونوميكالىق قىزمەتتى جانداندىرۋدىڭ وزەكتى ماسەلەلەرىن تالقىلادى. ول ءۇشىن ەكىجاقتى ىنتىماقتاستىقتىڭ كەڭ اۋقىمى بويىنشا پەرسپەكتيۆالىق جوبالاردى جۇزەگە اسىرۋدا كۇش-جىگەردى بىرىكتىرۋ ۇسىنىلدى.
قىرعىزستان باسشىسى ەكى ەل اراسىنداعى ىنتىماقتاستىقتىڭ جوعارى دەڭگەيىن قاناعاتتانۋشىلىقپەن اتاپ ءوتىپ، باۋىرلاس قىرعىزستان مەن قازاقستان اراسىندا شەشىمىن تاپپاعان ماسەلە بولماۋى كەرەكتىگىن باسا ايتتى.
قازاقستان رەسپۋبليكاسى سىرتقى ساياسي ۆەدومستۆوسىنىڭ باسشىسى مۇرات نۇرتىلەۋ قىرعىزستان رەسپۋبليكاسىنىڭ مەملەكەت باسشىسى سادىر جاپاروۆتىڭ ەلدىڭ ەكونوميكالىق جانە ينستيتۋتسيونالدىق دامۋى بويىنشا ۇستانعان باعىتى وڭ ناتيجە بەرەتىنىنە سەنىمىن ءبىلدىردى.
ونىڭ اتاپ وتۋىنشە، قازاقستان باۋىرلاس قىرعىزستانداعى وقيعالاردى ءجىتى قاداعالاپ جانە جوسپارلانعان رەفورمالاردى جۇزەگە اسىرۋدىڭ ستراتەگيالىق باعىتىن تولىق قولدايدى.
كەزدەسۋ سوڭىندا اڭگىمەلەسۋشىلەر باۋىرلاس حالىقتاردىڭ يگىلىگى ءۇشىن ەكىجاقتى قارىم-قاتىناستىڭ ودان ءارى ىلگەرى جانە جەمىستى داميتىنىنا سەنىم ءبىلدىردى.
ەسكە سالا كەتسەك، مۇرات نۇرتىلەۋ رەسمي ساپارمەن بىشكەككە كەلگەن.
ول قىرعىز رەسپۋبليكاسى سىرتقى ىستەر مينيسترلىگىنىڭ باسشىسى جەەنبەك كۋلۋبايەۆپەن كەلىسسوزدەر جۇرگىزدى. ونىڭ بارىسىندا قىرعىزستان پرەزيدەنتى سادىر جاپاروۆتىڭ قازاقستانعا رەسمي ساپارمەن كەلەتىنى بەلگىلى بولدى.
اۆتور
زارينا تۋعانبايەۆا