سادىر جاپاروۆ جۇمىس ساپارىمەن استاناعا كەلدى
استانا. KAZINFORM - قىرعىز رەسپۋبليكاسىنىڭ پرەزيدەنتى سادىر جاپاروۆ بۇگىن، 17-قىركۇيەكتە ورتالىق ازيا مەملەكەتتەرى باسشىلارى جانە گەرمانيا فەدەرالدىق كانسلەرىنىڭ ەكىنشى كەزدەسۋىنە قاتىسۋ ءۇشىن استاناعا جۇمىس ساپارىمەن كەلدى. بۇل تۋرالى قىرعىزستان پرەزيدەنتىنىڭ باسپا ءسوز قىزمەتى حابارلايدى.
قىرعىزستان پرەزيدەنتىنىڭ ۇشاعى قازاقستان استاناسىنىڭ حالىقارالىق اۋەجايىنا قوندى.
پرەزيدەنت سادىر جاپاروۆتى پرەمەر-ءمينيستردىڭ ورىنباسارى -قازاقستان رەسپۋبليكاسى ۇكىمەتى اپپاراتىنىڭ باسشىسى عالىمجان قويشىبايەۆ جانە باسقا دا رەسمي تۇلعالار قارسى الدى.
حالىقارالىق اۋەجايدا قۇرمەتتى قاراۋىل جاساقتالدى.
ەسكە سالا كەتسەك، ساپار بارىسىندا پرەزيدەنت سادىر جاپاروۆ سونداي-اق ورتالىق ازيا ەلدەرى باسشىلارىنىڭ نەمىس كاسىپكەرلەرىمەن كەزدەسۋىنە قاتىسادى، نەمىس بيزنەس- قوعامداستىعىمەن جەكە كەزدەسۋ وتكىزەدى، گەرمانيا فەدەرالدىق كانسلەرى ولاف شولتسپەن ەكىجاقتى كەلىسسوزدەر جۇرگىزەدى.