ساۋديالىق ينجەنەر تاق مۇراگەرىنىڭ قيمىلىن ەمودزي رەتىندە ۇسىندى
استانا. KAZINFORM - ساۋد ارابياسىنىڭ ينجەنەرى ءالي ءال-ماترافي تاق مۇراگەرى مۇحاممەد بين سالماننىڭ ا ق ش پرەزيدەنتى دونالد ترامپقا جاساعان قيمىلىنان شابىت الىپ، جاڭا ەمودزي ازىرلەدى، دەپ جازادى The National.
اتالعان قيمىل اراب ينتەرنەت كەڭىستىگىندە جاپپاي تارالدى. ول ترامپتىڭ ساۋد ارابياسىنا رەسمي ساپارى كەزىندە ەر- ريادتاعى ينۆەستيتسيالىق فورۋمدا سيرياعا سالىنعان سانكتسيالاردى الىپ تاستايتىنىن جاريالاعان ساتتە تۇسىرىلگەن بولاتىن.
كوپشىلىك قول شاپالاقتاعان كەزدە مۇحاممەد بين سالمان كۇلگەن كۇيى ەكى قولىن كەۋدەسىنە قويىپ، اراب مادەنيەتىنە ءتان شىنايى العىس ءبىلدىرۋ بەلگىسىن جاسادى.
- بۇل العىس ءبىلدىرۋدىڭ اياقاستى تۋعان شىنايى يشاراتى بولدى. كوپتەگەن ساۋديالىق وسى ساتتەن ۇلكەن اسەر الدى. مەن ونى ماڭگى ەستە قالدىرۋىم كەرەك دەپ شەشتىم، - دەدى ءال-ماترافي.
ونىڭ ەمودزيى - اق ءتۇستى تحوب (ءداستۇرلى اراب كيىمى) مەن قىزىل-اق شەماگ (كۋفيا) كيگەن، كۇلىمسىرەگەن، قولدارىن كەۋدە تۇسىندا ايقاستىرعان ەر ادام بەينەسى. ءال-ماترافيدىڭ ايتۋىنشا، بۇل ەمودزي قاراپايىم «راقمەت» ەمەس، «شىن كوڭىلدەن شىققان العىس» سيمۆولى.
باعدارلاماشى بۇل ءەمودزيدى حالىقارالىق ەمودزي ستاندارتتارىن بەلگىلەيتىن Unicode كونسورتسيۋمىنا رەسمي تۇردە ۇسىنعان. ونىڭ سوزىنشە، تەحنيكالىق تۇرعىدا جاساعاننان قاراعاندا ءوتىنىمدى راسىمدەۋ الدەقايدا كۇردەلى بولعان جانە بەكىتۋ پروتسەسى ەكى جىل نەمەسە ودان دا كوپ ۋاقىت الۋى مۇمكىن.
- جاپونداردا - كيمونو، ۇندىلەردە - ساري، فرانسۋزداردا - باگەت بار، ال بىزدە ساۋد ارابياسى مەن اراب مادەنيەتىن كورسەتەتىن بىردە-ءبىر ەمودزي جوق، - دەپ اتاپ ءوتتى ينجەنەر.
ول بۇل باستاما ساۋد ارابياسى مادەنيەتىنە جانە مۇحاممەد بين سالماننىڭ قىزمەتىنە دەگەن قىزىعۋشىلىقتى ارتتىرعانىنا قۋانىشتى ەكەنىن ءبىلدىردى.
- مەن ءۇشىن ەڭ ۇلكەن ماراپات - بۇل مەنىڭ باستاماما ساۋديالىقتار مەن بۇكىل ايماق حالقىنىڭ بىلدىرگەن ماحابباتى مەن قولداۋى. مۇنداي اسەر كۇتپەگەن ەدىم، - دەدى ول.
ءال-ماترافيدىڭ X جەلىسىندەگى جازباسى 3,6 ميلليوننان استام قارالىم جيناپ، جۇزدەگەن رەت بولىسىلگەن. بۇل ونىڭ ەڭ تانىمال جۇمىستارىنىڭ ءبىرى بولدى. ول قازىرگى تاڭدا كيبەرقاۋىپسىزدىك سالاسىنا ماماندار دايىندايتىن تۋۆايك اكادەمياسىندا وقۋ باعدارلامالارىن ازىرلەۋ باعىتىن باسقارادى.
ينجەنەردىڭ ايتۋىنشا، بۇل باستاما ءبىر عانا ەمودزيمەن شەكتەلمەيدى - ول ساۋد ارابياسىنىڭ مادەني بەينەسىن جاھاندىق سيفرلىق كەڭىستىكتە كورسەتۋگە باعىتتالعان.
ول الەۋمەتتىك جەلىلەردە Unicode ستاندارتتارىندا اراب نەمەسە ساۋديالىق مادەنيەتتى كورسەتەتىن ەمودزيلەردىڭ (شەماگ، شىنىاياق، ۇلتتىق تاعامدار جانە ت. ب. ) جوق ەكەنىن اتاپ ءوتتى.
- باسقا مادەنيەتتەر ەمودزي تۇرىندە تانىستىرىلعان: كيمونو، ساري، باگەت نەمەسە بوستاندىق ءمۇسىنى بار. ال ءبىزدىڭ مادەنيەت ءالى دە كولەڭكەدە قالىپ وتىر، - دەپ جازدى ول.
ينجەنەر وقىرمانداردى بۇل باستامانى قولداۋعا، سونداي-اق وزدەرىنىڭ ەمودزي يدەيالارىن ۇسىنۋعا شاقىردى.
وسىدان بۇرىن ا ق ش پەن ساۋد ارابياسى قورعانىس سالاسىندا 142 ميلليارد دوللارلىق كەلىسىمگە قول قويعانى حابارلاندى.