ولجاس بەكتەنوۆ شينجاڭ-ۇيعىر اۆتونوميالىق اۋدانىندا ساۋدا وكىلدىگىن اشۋدى تاپسىردى

استانا. KAZINFORM - بۇگىن ۇكىمەت وتىرىسىندا ق ر پرەمەر-ءمينيسترى ولجاس بەكتەنوۆ مينيسترلىككە شينجاڭ-ۇيعىر اۆتونوميالىق اۋدانىندا ساۋدا وكىلدىگىن اشۋعا تولىق ازىرلىكتى قامتاماسىز ەتۋدى تاپسىردى.

«قازاقستان ورتالىق ازيا ەلدەرىنە ازىق-تۇلىك ونىمدەرىن تابىستى ەكسپورتتاپ وتىر. ال مەتاللۋرگيا ءوندىرىسىنىڭ تاۋارلارىن تاياۋ كورشىلەرىمىزگە، ەۋروپاعا دا، باسقا ەلدەرگە دە جىبەرەمىز. وتاندىق ءونىمدى وتكىزۋ نارىعىن كەڭەيتۋ قاجەت. ول ءۇشىن شەتەلدە ەكسپورتتى بارىنشا ءتيىمدى ۇسىنا ءبىلۋىمىز كەرەك. وسى ماسەلەگە بايلانىستى كەيبىر سەرىكتەس ەلدەرگە ساۋدا وكىلدەرى جىبەرىلۋدە. الايدا بۇل جۇمىس باياۋ ءجۇرىپ جاتىر جانە ونى بارىنشا كۇشەيتۋ قاجەت. مىسالى، وتكەن اپتادا قىتاي حالىق رەسپۋبليكاسى مەملەكەتتىك كەڭەسى پرەمەرىنىڭ ورىنباسارى ەكەۋىمىز قىتايمەن ساۋدا قاتىناستارىن كەڭەيتۋ ماسەلەلەرىن جان-جاقتى تالقىلادىق. بۇل باعىتتىڭ پەرسپەكتيۆاسى جوعارى. وسىعان بايلانىستى ساۋدا، سىرتقى ىستەر جانە قارجى مينيسترلىكتەرىنە 1-شىلدەگە دەيىن بەيجىڭگە ساۋدا وكىلدەرىن جىبەرۋدى جانە شينجاڭ- ۇيعىر اۆتونوميالىق اۋدانىندا ساۋدا وكىلدىگىن اشۋعا تولىق ازىرلىكتى قامتاماسىز ەتۋدى تاپسىرامىن»، - دەدى و. بەكتەنوۆ.

ونىڭ ايتۋىنشا، ورتاشا جانە جوعارى دەڭگەيدە وڭدەلگەن تاۋارلار ەكسپورتىن قولداۋعا باسا نازار اۋدارۋ قاجەت. ول ءۇشىن ەكسپورتتى قولداۋدىڭ قولدانىستاعى باعدارلامالارىن كۇشەيتۋدىڭ، يننوۆاتسيالاردى ىنتالاندىرۋ مەن وندىرىستەردى كەڭەيتۋدىڭ ماڭىزى زور. مۇندا وتاندىق تاۋار وندىرۋشىلەردى قولداۋ شارالارىنىڭ ءرولى ماڭىزدى بولۋعا ءتيىس جانە بۇل شارالار قازىر پىسىقتالىپ جاتىر.

«جالپى بىزگە ساۋدا ساياساتىندا تىڭ ءارى باتىل تاسىلدەر قاجەت. وسىعان بايلانىستى ساۋدا جانە ينتەگراتسيا مينيسترلىگىنە مىناداي تاپسىرمالار بەرەمىن. بىرىنشىدەن، سىرتقى ىستەر جانە ونەركاسىپ مينيسترلىكتەرىمەن، سونداي-اق باسقا دا مۇددەلى مەملەكەتتىك ورگاندارمەن جانە ۇيىمدارمەن بىرگە 1 اي مەرزىمدە قازاقستاندىق تاۋارلار ەكسپورتىنىڭ نارىقتارىن ءارتاراپتاندىرۋ ماسەلەسىن پىسىقتاسىن، ال بيىلعى 1-تامىزعا قاراي شيكىزاتتىق ەمەس ەكسپورت كولەمىن ودان ءارى ۇلعايتۋ جونىندەگى ناقتى ءىس-قيمىل جوسپارىن ەنگىزسىن. ەكىنشىدەن، سىرتقى ىستەر مينيسترلىگىمەن جانە سالالىق مينيسترلىكتەرمەن بىرگە ەكسپورتقا باعدارلانعان ەلدەردە يمپورتتاۋشىلارعا قويىلاتىن تالاپتارعا ۇدايى مونيتورينگ جۇرگىزىپ، ءوز كاسىپكەرلەرىمىزدى جۇيەلى تۇردە ۋاقتىلى حاباردار ەتىپ تۇرۋ قاجەت. سوندا ءبىزدىڭ وندىرۋشىلەر شەتەلدىك نارىقتاردىڭ كەز كەلگەن تالاپتارىنا جەدەل جاۋاپ بەرە الاتىن بولدى»، - دەدى پرەمەر-مينيستر.

مۇنىمەن قوسا ۇكىمەت باسشىسى ەكسپورتتاۋشىلار ءۇشىن كەدەرگىلەردى ازايتۋدى، اسىرەسە ەل ىشىندە جانە شەتەلدەردە اكىمشىلىك ءارى كەدەندىك راسىمدەردى وڭايلاتۋ مەن تسيفرلاندىرۋ بويىنشا تۇراقتى جۇمىستى اتقارۋدى تاپسىردى. بۇل جۇمىسقا ورتالىق جانە جەرگىلىكتى مەملەكەتتىك ورگاندار عانا ەمەس، شەتەلدەردەگى ەلشىلىكتەر مەن وكىلدىكتەر دە تولىق كولەمدە اتسالىسۋى ءتيىس.

«كولىك مينيسترلىگى شيكىزاتتىق ەمەس تاۋارلاردى ءتيىمدى ەكسپورتتاۋ ءۇشىن قاجەت كولىك-لوگيستيكالىق ينفراقۇرىلىمدى ودان ءارى جەتىلدىرۋى قاجەت»، - دەدى و. بەكتەنوۆ.

اۆتور
رۋسلان عابباسوۆ