ساۋدا سالاسى 1,5 ميلليون ادامدى جۇمىسپەن قامتىپ وتىر - مينيسترلىك
استانا. KAZINFORM - ق ر ساۋدا جانە ينتەگراتسيا مينيسترلىگى ءبىرىنشى جارتىجىلدىققا ارنالعان ساۋدا سالاسىنداعى نەگىزگى كورسەتكىشتەردى جاريالادى. ۆەدومستۆونىڭ مالىمەتىنشە، اتالعان كەزەڭدە ساۋدا سالاسى تۇراقتى ءوسىمدى ساقتاپ، ەل ەكونوميكاسىنىڭ ءىرى سەكتورلارىنىڭ ءبىرى رەتىندە قالىپ وتىر.
- ساۋدا سالاسى ەلىمىزدىڭ جالپى ىشكى ءونىمىنىڭ شامامەن 19 پايىزىن قۇرايدى. بۇگىندە سالادا 1,5 ميلليوننان استام ادام جۇمىسپەن قامتىلعان. رەسپۋبليكا اۋماعىندا 748545 كاسىپكەرلىك سۋبەكتىسى، 626 بازار جانە 142 مىڭنان استام بولشەك ساۋدا نىسانى جۇمىس ىستەپ تۇر.
2025 -جىلدىڭ ءبىرىنشى جارتىجىلدىعىنىڭ قورىتىندىسى بويىنشا ساۋدانىڭ ناقتى كولەم يندەكسى جوسپارلانعان 8 پايىزدىڭ ورنىنا 8,4 پايىزعا جەتتى. ساۋدا كولەمى نومينالدى ماندە 31,4 تريلليون تەڭگەنى قۇرادى. ونىڭ ىشىندە كوتەرمە ساۋدانىڭ نكي 109,2 پايىز نەمەسە 21,2 تريلليون تەڭگە، بولشەك ساۋدانىڭ ن ك ي 106,6 پايىز نەمەسە 10,1 تريلليون تەڭگە بولدى. بۇل كورسەتكىشتەر وتكەن جىلدىڭ سايكەس كەزەڭىمەن سالىستىرعاندا جوعارى، - دەلىنگەن اقپاراتتا.
مينيسترلىك شيكىزاتتىق ەمەس ەكسپورتتى دامىتۋدى باستى باسىمدىقتاردىڭ ءبىرى رەتىندە اتاپ ءوتتى. 2025 -جىلدىڭ قاڭتار- ءساۋىر ايلارىندا وڭدەۋ ونەركاسىبى سەكتورىنداعى تاۋار اينالىمى 25 ميلليارد ا ق ش دوللارىن، ونىڭ ىشىندە ەكسپورت كولەمى 7,8 ميلليارد دوللاردى قۇرادى. وسى كەزەڭدە كۇنباعىس مايىنىڭ ەكسپورتى 69,5 پايىزعا، جانۋارلارعا ارنالعان ازىق 2,5 ەسەگە، وڭدەلمەگەن جانە جارتىلاي وڭدەلگەن التىن ەكسپورتى 52,7 پايىزعا ارتتى. قازاقستاندىق ونىمدەردىڭ نەگىزگى ەكسپورت نارىقتارى - رەسەي، قىتاي، وزبەكستان، تۇركيا، قىرعىزستان، تاجىكستان، ا ق ش، نيدەرلاند، فرانسيا جانە جاپونيا.
- ساۋدا- ەكونوميكالىق ميسسيالار يران (تەگەران)، ۆەنگريا (بۋداپەشت، قىتاي (شيان، چۋڭچيڭ) جانە اۋعانستاندا (كابۋل) ۇيىمداستىرىلدى. ميسسيالارعا 100 دەن استام قازاقستاندىق ەكسپورتتاۋشى قاتىسىپ، ازىق-تۇلىك، اگروونەركاسىپ، مەتاللۋرگيا، حيميا، قۇرىلىس، مەديتسينا جانە لوگيستيكا سالالارىنداعى ونىمدەرىن ۇسىندى. ناتيجەسىندە جالپى سوماسى 333 ميلليون ا ق ش دوللارى جانە 15 ميلليون ەۋرو بولاتىن كوممەرتسيالىق كەلىسىمدەرگە قول قويىلدى، - دەپ جازدى ۆەدومستۆودان.
مينيسترلىك ەكسپورتتىق اكسەلەراتسيا باعدارلاماسىن ءساتتى ىسكە اسىرۋدا. بۇگىندە 120 كومپانيا ەكسپورتتىق قىزمەتىن جەدەل دامىتۋ ۇستىندە. ولارعا كەڭەس بەرۋ، سۇيەمەلدەۋ جانە شىعىنداردى وتەۋ تۇرىندە كەشەندى قولداۋ كورسەتىلۋدە. سونداي-اق، وتاندىق كاسىپكەرلەردىڭ حالىقارالىق كورمەلەرگە، سونىڭ ىشىندە شاڭحايداعى يمپورتتىق كورمەگە قاتىسۋى ۇيىمداستىرىلۋدا.
ەكسپورتتى قولداۋدىڭ قولدانىستاعى شارالارى دا ۇزدىكسىز جەتىلدىرىلىپ كەلەدى. بۇل - جاڭا ەكسپورتقا باعدارلانعان كاسىپورىنداردى دامىتۋعا جانە ولاردىڭ حالىقارالىق نارىقتاردا باسەكەگە قابىلەتتى بولۋىنا جول اشادى.
- تۇتىنۋشىلاردىڭ قۇقىقتارىن قورعاۋ سالاسىندا دا جۇيەلى جۇمىس جۇرگىزىلۋدە. 2025 -جىلدىڭ العاشقى التى ايىندا كوميتەت پەن ونىڭ اۋماقتىق بولىمشەلەرىنە 27889 ءوتىنىش ءتۇستى. سونىڭ ناتيجەسىندە تۇتىنۋشىلارعا 881,4 ميلليون تەڭگە قايتارىلدى، - دەلىنگەن دەرەكتە.