ساۋد ارابياسىنىڭ تاق مۇراگەرى ا ق ش مەملەكەتتىك حاتشىسىن ءوزىن كۇتۋگە ءماجبۇر ەتتى

يزرايلمەن قارىم-قاتىناستى قالپىنا كەلتىرۋ جونىندەگى كەلىسسوزدەر توقتاتىلعاننان كەيىن ساۋد ارابياسى ا ق ش- تى تاعى ەلەۋسىز قالدىردى.

Kazinform اگەنتتىگى بۇل تۋرالى Hindustan Times باسىلىمىنا سىلتەمە جاساپ حابارلايدى.

Washington Post گازەتىنىڭ حابارلاۋىنشا، ەر-ريادتا ساۋد ارابياسىنىڭ تاق مۇراگەرى مۇحاممەد بەن سالمان ا ق ش مەملەكەتتىك حاتشىسى ەنتوني بلينكەندى كەزدەسۋ ءۇشىن بىرنەشە ساعات كۇتتىردى.

كەزدەسۋ كەشكە ءوتۋى ءتيىس ەدى، ءبىراق ساۋد ارابياسىنىڭ تاق مۇراگەرى وعان كەلەسى كۇنى تاڭەرتەڭ عانا كەلدى. بۇل 7- قازاندا حاماستىڭ شابۋىلىنان كەيىن يزرايل مەن گازا سەكتورى اراسىنداعى شيەلەنىستىڭ ۋشىعۋى اياسىندا بولىپ وتىر.

Hindustan Times باسىلىمى جاريالاعان ۆيدەودا تاق مۇراگەرى حانزادا سالماننىڭ جازىقسىز جانداردىڭ ءومىرىن قيعان قاقتىعىستاردى جانە گازانى قورشاۋدى توقتاتۋ قاجەتتىگىن اتاپ كورسەتكەنى ايتىلعان. سونداي-اق حانزادا قاقتىعىستىڭ قازىرگى ۋشىعۋىن توقتاتۋعا شاقىردى.

باسىلىمنىڭ اتاپ وتۋىنشە، ساۋد ارابياسىنىڭ حاماس سودىرلارىنا قاتىستى ۇستانىمى ا ق ش ۇستانىمىنا تولىعىمەن قاراما-قايشى. ا ق ش قازان ايىنىڭ باسىنداعى جاپپاي شابۋىلدان كەيىن حاماستى جويۋ ءۇشىن يزرايلدى قولدادى.