ساۋد ارابياسى مۇناي جەتكىزۋدىڭ بالاما باعىتىن ىسكە قوستى

استانا. KAZINFORM - ساۋد ارابياسى تاياۋ شىعىستاعى جاعدايدىڭ ۋشىعۋىنا بايلانىستى مۇناي جەتكىزۋدىڭ بالاما باعىتتارىن ىسكە قوستى، دەپ حابارلايدى حالىقارالىق ب ا ق.

Yeni Safak مالىمەتتەرىنە سايكەس، پارسى شىعاناعىنداعى نەگىزگى مۇناي تاسىمال ءدالىزى سانالاتىن ورمۋز بۇعازىنداعى ىركىلىستەرگە بايلانىستى ەل شيكى مۇناي ەكسپورتىن قىزىل تەڭىز جاعالاۋىنداعى يانبۋ پورتى ارقىلى جۇزەگە اسىرۋعا كوشكەن.

بۇل باعىت ەلدىڭ شىعىسىنداعى مۇناي كەن ورىندارىن باتىستاعى پورتپەن بايلانىستىراتىن «شىعىس- باتىس» مۇناي قۇبىرى ارقىلى قامتاماسىز ەتىلەدى. اتالعان ينفراقۇرىلىم ورمۋز بۇعازىن اينالىپ وتۋگە مۇمكىندىك بەرەدى جانە جەتكىزىلىمدەردىڭ ۇزدىكسىزدىگىن ساقتاۋدا ماڭىزدى ءرول اتقاراتىنىن جازدى Euronews.

ساراپشىلاردىڭ ايتۋىنشا، سوڭعى اپتالاردا يانبۋ پورتى ارقىلى مۇناي جونەلتۋ كولەمى كۇرت ارتقان. بۇعان وڭىردەگى اسكەري- ساياسي شيەلەنىس پەن تەڭىز جولدارىنىڭ قاۋىپسىزدىگىنە قاتىستى تاۋەكەلدەردىڭ كۇشەيۋى اسەر ەتكەن (Anadolu Ajansi) .

سونىمەن قاتار بۇل بالاما باعىت تولىق كولەمدە ورمۋز بۇعازى ارقىلى وتەتىن تاسىمالدى الماستىرا المايدى. الەمدە كۇن سايىن شامامەن 20 ميلليون باررەل مۇناي وسى بۇعاز ارقىلى وتسە، بالاما قۇبىرلاردىڭ جالپى وتكىزۋ مۇمكىندىگى الدەقايدا تومەن.

وسىعان قاراماستان، ساۋد ارابياسى مۇناي جەتكىزىلىمدەرىن تۇراقتى ۇستاۋ ءۇشىن ەكسپورت باعىتتارىن ءارتاراپتاندىرۋعا تىرىسىپ وتىر. يانبۋ پورتى قازىرگى جاعدايدا نەگىزگى لوگيستيكالىق حابقا اينالىپ، جاھاندىق نارىقتاعى جەتكىزىلىمدەردىڭ ۇزىلمەۋىنە مۇمكىندىك بەرىپ وتىر.

جالپى العاندا، قالىپتاسقان جاعداي الەمدىك ەنەرگيا نارىعىنا ايتارلىقتاي اسەر ەتىپ، مۇناي باعاسىنىڭ قۇبىلۋىنا جانە جەتكىزۋ تىزبەكتەرىنىڭ قايتا قۇرىلۋىنا سەبەپ بولىپ وتىر.

ايتا كەتەيىك، ساۋد ارابياسى قاقتىعىس باستالماي تۇرىپ-اق، يران ورمۋز بۇعازىن جاۋىپ تاستاۋى مۇمكىن دەگەن قاۋىپپەن تاياۋ شىعىستان 100 ميلليون باررەلدەن استام مۇناي شىعارىپ العان.