ساعىنىش ءشولى
« الا قۇيىن داۋىل... ارىستان ەكەۋىن دە الا قۇيىن داۋىل الدى -ارتىنا قاراتپاي ۇشىرىپ بارادى ەكەن.تەرگە مالشىنعان بۇبىش الدەكىمدى داۋىستاپ شاقىرعان كۇيى ساندىراقتاپ جاتىپ وياندى ».
اشىلعان ەسىكتىڭ سىقىرى ەستىلدى. ءالسىز جانارىمەن ەسىككە ۇمىتتەنە قارادى.
سومكەسىن سۇيرەتە ىشكە كىرگەن جارقىناي ەكەن.
- اپا، شولدەگەن جوقسىڭ با؟ شاي دەمدەيىن.
- شولدەدىم. ءشول قىسقالى قاشان... قانشا كوكتەم، قانشا كۇز؟ سارتاپقا اينالعان ساعىنىش ءشولى. ءديدارىم... ءديدارىڭدى ءبىر كورۋگە ءزار بولدىم-اۋ. انا جۇرەگى سىزداپ قويا بەردى.
كوڭىلى وياۋ. كوزى جۇمۋلى.
بايقاماي وتكىزىپ العان باقىتتى كەزى. اقكوڭىل، ادال ارىستانى. وتىز جەتىگە تولماي-اق... ماڭگىلىك ومىرگە اتتانىپ كەتتى. ارتىندا اڭىراپ التى بالا قالدى. ارىستان وتە باۋىرمال ەدى. بالاجان ەدى. ىسكەر ەدى. اۋىلداعى ماشينا، تراكتور دەگەندەرىڭدى جوندەۋدە الدىنا ادام سالماۋشى ەدى. قايسى ءبىرىن ايتايىن. اڭ اۋلاۋعا قۇمار ەدى.
بىردە... ايدارمەن بىرگە اڭعا شىعىپ سودان ورالمادى. دوسى ايدار اڭ ەكەن دەپ ارىستاندى اتىپ جىبەرگەن كورىنەدى. دۇشپانى ەمەس دوسىنىڭ قولىنان قازا تاپتى. وسىلايشا ءبۇبىش بار اۋىرتپالىقتى ارقالاپ جەسىر اتانىپ قالا بەردى.
دارىگەر ءبۇبىش ەل جاراسىن ەمدەگەنىمەن ءومىر بويى ءوز جاراسىن ەمدەيتىن جان تاپپادى. بار مەدەتى بالالارى ەدى.
ءديدارى جوعارى وقۋ ورنىن بىتىرگەندەگى قۋانعانى... وركەنى دە ءوستى.
باقىتسىزدىقتىڭ ءبارى دە سول ءبىر ەرتە كوكتەمدە باستالىپ ەدى. جول اپاتى. ماشينە جۇرگىزىپ وتىرعان وركەن بولعاندىقتان دا ءىستى بولىپ كەتە باردى. شىن مانىسىندە ماشينە وركەندىكى جۇرگىزگەن قۇربى قىزى. اراشالاپ الماق بولعان ءديدار كوپ سەندەلدى. سوت دەگەنىڭدى كىم بىلگەن سۇراق-جاۋاپ ابدەن مەزى ەتتى. كىرمەگەن ەسىكتەرى جوق. ءديدار جيعان-تەرگەنىن قۇتقارىپ بەرەم دەگەندەرگە شاشۋمەن بولدى. ولەردەي جاقسى كورەتىن وركەنىن تەمىر توردىڭ ار جاعىنا قيمادى.
اكەدەن ولىدەي، باۋىردان تىرىدەي ايىرىلعان ءديدار ىشىمدىككە سالىندى. سوسىن...
وركەنى ايىپتالعان ايىبىن وتەپ شىقتى. ال ءديدارى ءالى جوق.
ءيا، ءالى جوق. قاڭعىپ كەتكەن. بىرەۋلەر ءۇرجاردان، بىرەۋلەر سەمەيدەن، ەندى بىرەۋلەر الماتىدان كورگەندىگىن ايتادى. ولمەگەن جانعا سول دا مەدەت.
وكىنىشتەن وزەگى ورتەنگەن وركەن بىرنەشە رەت ىزدەپ تاۋىپ كەلدى. امال نە توقتامايدى. ونىڭ ايتۋىنشا وزگەلەر تۇسىنبەيتىن ءوز الەمى بار.
ءبۇبىشتى اۋرۋ مەڭدەگەلى بەرى جاقىندارى جينالىپ ءديداردى تاعى دا ىزدەستىرە باستادى.
جارقىناي ءديدارىنىڭ كىشى قىزى. اكەسىن ىزدەپ جۇرگەنىن ەستىگەندە جانارىنا تولعان جاستى ەشكىمگە كورسەتپەي توگىپ-توگىپ الادى.
ەسىك سىقىرى تاعى ەستىلدى. ەسىكتەن ءديدارى كورىندى. ءديدارى...
وعان ىلەسە وركەن كىرىپ كەلەدى.
- اناشىم!..
- اناشىم!..
ەسىككە قاراعان بويى ءبۇبىش ءۇنسىز قالدى. بالالارىنىڭ داۋىسىنا ءۇن قاتپادى.
اكە قۇشاعىنا ەنىپ ۇلگەرمەگەن جارقىناي ەندى اجەسىنە قاراي ۇمتىلدى.
-اجە!
سارتاپ بولعان ساعىنىش ءجىبى ءۇزىلىپ ... ەسىككە قاراپ بالاسىن كۇتكەن بويدا ءبۇبىش ماڭگىلىك ومىرگە اتتانىپ تا كەتكەن ەدى...