ساعات بەلدەۋىنىڭ اۋىسۋى: مينيستر ساعات نەشەدە ۇيىقتايتىنىن ايتتى

استانا. KAZINFORM - ونەركاسىپ جانە قۇرىلىس ءمينيسترى قانات شارلاپايەۆ جانە وقۋ-اعارتۋ ءمينيسترى عاني بەيسەمبايەۆ ۇكىمەتتەگى بريفينگتە ساعات بەلدەۋىنىڭ اۋىسۋى تۋرالى سۇراقتارعا جاۋاپ بەردى.

«ەگەر مەديتسينا ماماندارى قازىرگى جاعداي دەنساۋلىققا وتە زيان ەكەنىن ايتىپ، قازاقستانعا بىرنەشە ساعات بەلدەۋى قاجەت دەسە، ۇكىمەت ساعات تىلىنە وزگەرىس ەنگىزە مە؟ ساعات 16:30-دا كۇننىڭ باتۋى جونىندە وزدەرىڭىز نە ويلايسىزدار جانە ساعات نەشەدە ۇيقىعا جاتاسىزدار؟»، - دەپ سۇراق قويدى تىلشىلەر لاۋازىمدى تۇلعالارعا.

ءوز كەزەگىندە عاني بەيسەمبايەۆ ەش بولجام جاساماۋدى جانە مەديتسينالىق زەرتتەۋلەردى كۇتۋدى ۇسىندى.

«جۇمىس باستىلىق پەن قاعاز باستىلىقتى ەسكەرسەك، ساعات 23:00-دەن ەرتە ۇيىقتامايمىن»، - دەدى وقۋ-اعارتۋ ءمينيسترى.

ونەركاسىپ ءمينيسترى قانات شارلاپايەۆ تا ارىپتەسىنىڭ پىكىرىن قولدادى.

«الدىمەن زەرتتەۋ ناتيجەلەرىن كۇتىپ، ناقتى ناتيجەلەرگە سۇيەنىپ، وسى ماسەلەگە قايتا ورالامىز. ال مەنىڭ قاي ۋاقىتتا ۇيىقتاپ-وياناتىنىم - كەشىرىڭىز، بۇل مەنىڭ جەكە شارۋام. بۇل مەنىڭ قىزمەتتىك مىندەتتەرىمدى ورىنداۋىما ەش كەدەرگى كەلتىرمەيدى، سوندىقتان بۇل سۇراققا جاۋاپ بەرمەيمىن»، - دەدى ق. شارلاپايەۆ.

اۆتور
ايجان سەرىكجان قىزى