ساعات 23:45 تەگى جاعداي: قاراعاندىدا 13 كەنشىنى ىزدەستىرۋ جالعاسىپ جاتىر

ءورتتىڭ سوڭى جارىلىسقا ۇلاسقان اپاتتان سوڭ كوستەنكو شاحتاسىندا قالىپ قويعان 13 كەنشىنى تابۋ مۇمكىن بولماي جاتىر، دەپ حابارلايدى Kazinform.

«13 شاحتەر ءالى تابىلمادى. ولاردى ىزدەستىرۋ جۇمىستارى ءتۇنى بويى جالعاسادى. قۇتقارۋشىلار ولاردى انىقتاۋ ءىس-قيمىلدارىن توقتاتقان جوق»، - دەدى كاسىبي اسكەريلەندىرىلگەن اپاتتىق-قۇتقارۋ قىزمەتتەرىنىڭ رەسپۋبليكالىق ورتالىق شتابى قاراعاندى فيليالى ديرەكتورىنىڭ ءبىرىنشى ورىنباسارى گەننادي سيلينسكي Kazinform تىلشىسىنە بەرگەن سۇحباتىندا.

ەسكە سالايىق، 28- قازان كۇنى تۇنگى ساعات 02.33 تە قاراعاندى وبلىسىنداعى كوستەنكو اتىنداعى شاحتادا ءورت بولدى. جەر استىندا 252 ادام بولعان، ولاردىڭ 205 ءى بىردەن جوعارى شىعارىلدى.

ساعات 17.33 تەگى مالىمەت بويىنشا 33 كەنشىنىڭ دەنەسى تابىلدى، 13 ادام ىزدەستىرىلىپ جاتىر. 20 جۇمىسشى اۋرۋحاناعا جەتكىزىلدى.

كەيىن «ارسەلورميتتال تەمىرتاۋ» ا ق- عا تيەسىلى 8 شاحتانىڭ جۇمىسى ۋاقىتشا توقتاتىلدى.

كەشقۇرىم بريفينگ وتكىزگەن توتەنشە جاعدايلار ءمينيسترى سىرىم ءشارىپحانوۆ جەر استىندا قالعان 13 كەنشىنى ءتىرى تابۋعا ءۇمىت وتە از ەكەنىن ءمالىم ەتتى.

مەرت بولعان كەنشىلەردىڭ جەكە باسىن انىقتاۋ قيىنعا ءتۇسىپ جاتقانى ايتىلۋدا.

پرەزيدەنت ق. توقايەۆ 29- قازاندى جالپىۇلتتىق ازا تۇتۋ كۇنى ەتىپ جاريالايتىن وكىمگە قول قويدى.

مەملەكەت باسشىسى قاسىم-جومارت توقايەۆ ۇكىمەتكە «ارسەلورميتتالتەمىرتاۋ» كومپانياسىمەن ينۆەستيتسيالىق ىنتىماقتاستىقتى توقتاتۋ تۋرالى تاپسىرما بەردى. كەيىن ۇكىمەتتىڭ باسپا ءسوز قىزمەتى «ارسەلورميتتال تەمىرتاۋ» ا ق- نىڭ مەنشىك قۇقىعىن ق ر مەنشىگىنە قايتارۋ تۋرالى كەلىسىمشارتتىڭ اياقتالۋعا جاقىن ەكەنىن ءمالىم ەتتى.