پرەزيدەنتتىڭ جوعارى ساپالى قۇرىلىستى قامتاماسىز ەتۋ سالاسىنداعى تاپسىرمالارىن ورىنداۋ جونىندەگى شارالار تۋرالى ونەركاسىپ جانە قۇرىلىس ءمينيسترى ەرسايىن ناعاسپايەۆ باياندادى.
الەۋمەتتىك ينفراقۇرىلىمنىڭ اۋقىمدى قۇرىلىسى اۋماقتاردى كەشەندى دامىتۋ قاعيداتى نەگىزىندە جۇزەگە اسىرىلاتىن بولادى. بۇزۋشىلىقتاردىڭ ەرتە ساتىسىندا الدىن الۋعا باسا نازار اۋدارا وتىرىپ، مەملەكەتتىك ساۋلەت- قۇرىلىس باقىلاۋى كۇشەيتىلدى. جىل باسىنان جوسپارلاۋ، جوبالاۋ جانە قۇرىلىس پروتسەستەرىنە سيفرلىق سۇيەمەلدەۋدى قامتاماسىز ەتەتىن ءبىرىڭعاي قۇرىلىس پورتالى قولدانىسقا ەنگىزىلدى. جوبالاردى ساراپتاۋ ساتىسىندا ج ي قۇرالدارىن ەنگىزۋ بويىنشا جۇمىس جۇرگىزىلۋدە.
ەلورداداعى ۋربانيستيكا ورتالىعىنىڭ تاجىريبەسىن باسقا وڭىرلەردە كەڭەيتۋ اياسىندا بارلىق وبلىستا ۋربانيستيكا سالاسىندا سالالىق ۇيىمدار قۇرىلىپ، جۇمىس ىستەپ جاتىر. اكىمدىكتەر 2026-2027 -جىلدارعا ارنالعان قالالىق كەڭىستىكتى دامىتۋعا زاماناۋي تاسىلدەردى ەنگىزۋدى، قولايلى ورتا قۇرۋدى جانە قالالاردىڭ كەلبەتىن جاقسارتۋدى كوزدەيتىن جول كارتالارىن بەكىتتى. سونىمەن قاتار جاڭا قۇرىلىس كودەكسىندە ەلدى مەكەندەردىڭ ساۋلەتتىك كەلبەتىن قالىپتاستىرۋدىڭ مىندەتتى قۇرالى رەتىندە ديزاين-كود بەكىتىلدى.
— مەملەكەت باسشىسى قازاقستاننىڭ ۇلكەن قۇرىلىس الاڭىنا، جاسامپازدىق مەكەنىنە اينالۋى قاجەتتىگىن جانە قۇرىلىستىڭ جوعارى ساپاسىن قامتاماسىز ەتۋ كەرەكتىگىن ەرەكشە اتاپ ءوتتى. وسىعان بايلانىستى ۇكىمەت قۇرىلىستى قاتاڭ باقىلاۋدى قامتاماسىز ەتۋى كەرەك. مىندەتىن ادال اتقارمايتىن مەردىگەرلەرگە قاتىستى قاتاڭ جاۋاپكەرشىلىك شارالارىن قولدانۋدى تاپسىرامىن، — دەپ اتاپ ءوتتى ولجاس بەكتەنوۆ.
ونەركاسىپ مينيسترلىگى ءوڭىر اكىمدەرىمەن بىرلەسىپ، ءاربىر قۇرىلىس نىسانىنا قاتاڭ باقىلاۋ مەن مونيتورينگ جۇرگىزۋدى، جوبالىق ستاندارتتاردى تالاپ ەتۋدى، ينفراقۇرىلىمدىق جانە الەۋمەتتىك نىساندار قۇرىلىسىنىڭ جوعارى ساپاسىن قامتاماسىز ەتۋگە ءتيىس. ۋربانيستيكا ورتالىعىنىڭ تاجىريبەسىن كەڭەيتۋ جۇمىستارىن ۇيىمداستىرۋ بويىنشا تاپسىرمالار بەرىلدى.
— اتالعان ورتالىق قالا تۇرعىندارىنا قولايلى ورتا قۇرۋ ءۇشىن ناقتى ۇسىنىستار ازىرلەيتىن، قالانىڭ كەلبەتىن جاقسارتۋعا ارنالعان ۇتىمدى شەشىمدەر مەن جوبالاردى، قالا كەڭىستىگىن دامىتۋدا زاماناۋي تاسىلدەردى دايىندايتىن ماڭىزدى قۇرىلىم بولىپ تابىلادى، — دەپ اتاپ ءوتتى پرەمەر-مينيستر.
ەسكە سالا كەتەيىك، ەندى قۇرىلىس كومپانياسى نىسانعا كەمىندە بەس جىل كەپىلدىك بەرۋگە مىندەتتى.