ساپاسىز جول كەسىرىنەن اپاتقا ۇشىراعان ورالدىق جۇرگىزۋشى اكىمدىكتەن اقشا ءوندىرىپ الدى
ورال. KAZINFORM - ورال قالاسىنىڭ تۇرعىنى قالالىق تۇرعىن ءۇي- كوممۋنالدىق شارۋاشىلىق، جولاۋشىلار كولىگى جانە اۆتوموبيل جولدارى بولىمىنەن ماتەريالدىق زالال ءوندىرۋ جونىندە سوتقا جۇگىندى.
ورال قالاسىنىڭ №2 سوتىندا قارالعان ءىس ماتەريالدارىنان بەلگىلى بولعانىنداي، ءابىلقايىر حان داڭعىلى مەن س. دات ۇلى كوشەسى جولدارىنىڭ تالاپقا ساي بولماۋى سالدارىنان جول-كولىك وقيعاسى بولىپ، تۇرعىننىڭ كولىگىنە زاقىم كەلگەن.
ب ق و سوتىنان تۇسكەن مالىمەتكە قاراعاندا، وسىعان وراي تالاپكەر جاۋاپكەردىڭ جولداردى كۇتىپ ۇستاۋ جونىندەگى تالاپتاردى ورىنداماۋىنان كەلتىرىلگەن زالال سوماسىن 787948 تەڭگە كولەمىندە باعالادى.
«سوت ءىستى زەردەلەگەن كەزدە جولداردى كۇتىپ ۇستاۋ تالاپتارىنىڭ بۇزىلۋ فاكتىسى اكىمشىلىك قۇقىق بۇزۋشىلىق تۋرالى ءىستىڭ ماتەريالدارىمەن راستالعان. دەگەنمەن ساراپشى قورىتىندىسىنا سايكەس تالاپكەردىڭ اۆتوكولىگىن جوندەپ-قالپىنا كەلتىرۋ جۇمىستارىنىڭ قۇنى 603680,31 تەڭگە بولدى. وسىعان بايلانىستى سوت تالاپتى ءىشىنارا قاناعاتتاندىردى. اتالمىش مەملەكەتتىك مەكەمەدەن تالاپكەردىڭ پايداسىنا 603680 تەڭگە مولشەرىندە ماتەريالدىق زالال جانە 6037 تەڭگە مەملەكەتتىك باج تولەۋ بويىنشا سوت شىعىسى ءوندىرىلدى. شەشىم زاڭدى كۇشىنە ەنگەن جوق»، دەپ حابارلادى ۆەدومستۆودان.
ەسكە سالا كەتەيىك، بۇدان بۇرىن ب ق و- دا 5 ميلليون تەڭگە اليمەنت تولەمەگەن تۇرعىننىڭ سوتتالعانىن جازعان بولاتىنبىز.
اۆتور
عايساعالي سەيتاق