ساۋد ارابياسىنىڭ سۇڭقارلار ۇلتتىق ورتالىعى ۇيىمداستىراتىن كورمە 1-10 قازان ارالىعىندا ەر-رياد قالاسىنىڭ سولتۇستىگىندەگى مالحام اۋدانىندا ورنالاسقان ەر-رياد كورمە جانە كونگرەسس ورتالىعىندا وتەدى.
ۇيىمداستىرۋشىلاردىڭ مالىمەتىنشە، بيىل كورمەگە اڭشىلىق جانە سپورتتىق اتىس قارۋىنا ماماندانعان 11 كومپانيا قاتىسادى. بۇل وتكەن جىلعى كورسەتكىشتەن 37,5 پايىزعا كوپ. سونىمەن قاتار پنيەۆماتيكالىق قارۋ وندىرەتىن 4 كومپانيا جانە جابدىقتار مەن كەرەك-جاراق جەتكىزەتىن 9 كومپانيا ونىمدەرىن ۇسىنادى.
كورمە اياسىندا اڭشىلىق پەن سپورتتىق اتىسقا ارنالعان قارۋ-جاراق، وق-ءدارى، پنيەۆماتيكالىق قارۋ، قاۋىپسىزدىك قۇرالدارى، جەكە قورعانىس جابدىقتارى، قارۋدى ساقتاۋ، تازالاۋ جانە تەحنيكالىق قىزمەت كورسەتۋگە ارنالعان قۇرالدار كورسەتىلەدى.
شاراعا الەمنىڭ جەتەكشى كومپانيالارىنا تيەسىلى 181 دەن استام حالىقارالىق برەند قاتىسادى. ۇيىمداستىرۋشىلار بۇل جەرگىلىكتى جانە شەتەلدىك كومپانيالارعا اڭشىلىق پەن سپورتتىق اتىس اۋەسقويلارىمەن بايلانىس ورناتىپ، ونىمدەرىن تانىستىرۋعا مۇمكىندىك بەرەتىنىن اتاپ ءوتتى.
«بارشاعا ارنالعان تاجىريبە» تاقىرىبىنداعى حالىقارالىق كورمە سۇڭقارشىلىق پەن اڭشىلىقتان بولەك، تابيعات اياسىنداعى دەمالىس جانە شىتىرمان وقيعالى تۋريزم باعىتتارىن دا قامتيدى.
كورمە ساۋد ارابياسى مەن شەتەلدەن كەلگەن سالا ماماندارىن، كومپانيا وكىلدەرىن جانە اۋەسقويلاردى ءبىر الاڭعا جينايدى.
بۇعان دەيىن سولتۇستىك قازاقستان وبلىسىندا 2026-2027 -جىلعى اڭشىلىق ماۋسىمىنىڭ مەرزىمدەرى جاريالاندى.
ريزابەك نۇسىپبەك ۇلى