بۇل وقيعا كۇللى مۇسىلمان الەمىن ءدۇر سىلكىندىردى. اراب الەمى حۋسيتتەرگە قارسى كۇش بىرىكتىرۋگە ءبىرتابان جاقىن تۇر. ال يەمەندىك كوتەرىلىسشىلەر كەيىنگى ەكى كۇندە ساۋديانىڭ 5 اۋەجايى مەن ءبىر مۇناي ءوندىرۋ كەشەنىنە بالليستيكالىق زىمىران اتىپ، درون ۇشىردى. ساۋد ارابياسى جاريالاعان بەينەجازبادا كورول حاليد اۋەجايىنا جاسالعان سوققىنىڭ اۋىر سالدارى كورسەتىلگەن. اسىرەسە يحرام حالىندە جۇرگەندەردىڭ جانۇشىرىپ، جان-جاققا قاشقانى جانە كەيبىرىنىڭ وقيعا ورنىندا ءتىل تارتپاي كەتكەنى انىق اڭعارىلادى.
دەرەككە قاراعاندا، بۇل - زىمىران شابۋىلىنان ەڭ كوپ زيان شەككەن ءۇشىنشى تەرمينال. 8 ەلدىڭ ازاماتى قازا تاۋىپ، 300-دەن استامى جارالانعان جەر. كوبى قاسيەتتى مەككە مەن ءماديناعا كىشى قاجىلىق پارىزىمەن اتتانعاندار. قازىر ولاردىڭ ءحالىن جەرگىلىكتى دارىگەرلەر تولىق باقىلاۋدا ۇستاپ وتىر. دەنساۋلىق ساقتاۋ سالاسىنا جاۋاپتىلار ءار ناۋقاستىڭ ءتيىستى كومەك العانىن ءجىتى قاداعالاۋدا.
سالەح ءالحاتلان، «Gulf» زەرتتەۋ ورتالىعى ءتوراعاسىنىڭ باس كەڭەسشىسى:
- ولار مەككە مەن ءماديناعا كىشى قاجىلىق پارىزىن وتەۋگە بار جاتقاندار ەدى. بۇل - حۋسيتتەردىڭ ادەيى جاساعان قىلمىسى. مۇنى ءبىز عانا ەمەس، الەم ەلدەرى ايىپتايدى. ەل ۇكىمەتى ازاماتتار مەن شەتەلدىكتەردىڭ قاۋىپسىزدىگىن ساقتاۋ ءۇشىن بار كۇش-جىگەرىن جۇمساپ جاتىر. لاڭكەستىككە ۇيىمنىڭ ارەكەتىن جاۋاپسىز قالدىرۋعا بولمايدى. يران بارىنشا قولداپ، قارۋ- جاراقپەن قامتىپ كەلسە دە ساۋد ارابياسى نەگىزگى ۇستانىمىنان اينىمايدى.
حۋسيتتەر بۇل شابۋىلدى تولىقتاي جاۋاپكەرشىلىگىنە الدى. سونداي-اق كورولدىكتىڭ تاعى 4 اۋەجايى مەن Saudi Aramco كومپانياسىنىڭ ەنەرگەتيكالىق نىسانىنا سوققى جاسالعانىن جاريا ەتتى. يەمەندىك كوتەرىلىسشىلەردىڭ رەسمي وكىل: «ەگەر رياد اسكەري ۇشاقتارىن ساناداعى حامدان مەن ساۋرا اۋداندارىنا جونەلتۋىن دوعارماسا، جاعداي وسىلاي جالعاسا بەرەدى»، - دەدى.
ال كورولدىك بيلىگى حالىقارالىق قاۋىمداستىقتى حۋسيتتەرگە قارسى تىزە قوسىپ ارەكەت ەتۋگە شاقىرىپ وتىر. اسىرەسە تۇركيا مەن پاكىستاننان ناقتى قادامدار كۇتەدى. ساراپشىلار سوزىنە سەنسەك، بۇل جاعدايدا ازاماتتىق ينفراقۇرىلىمعا جاسالعان شابۋىلدى ايىپتاۋ جەتكىلىكسىز.
انۆار گارگاش، ب ا ءا پرەزيدەنتىنىڭ ديپلوماتيالىق ماسەلەلەر جونىندەگى كەڭەسشىسى:
- ساۋد ارابياسىنىڭ قاۋىپسىزدىگى مەن ەگەمەندىگى - ءبىزدىڭ دە قاۋىپسىزدىگىمىز. شىعاناق ەلدەرىنىڭ تۇراقتىلىعى ءبىر-بىرىمەن تىعىز بايلانىستى. ءبىز قازىر بارلىعىمىز نىساناعا اينالدىق. ءوڭىر مەملەكەتتەرى قورعانىس سالاسىنداعى ىنتىماقتاستىقتى كۇشەيتىپ، ورتاق قاۋىپسىزدىكتى قامتاماسىز ەتۋ ءۇشىن بىرلەسىپ ارەكەت ەتۋى كەرەك.
رەسمي رياد اۋە قاتىناسى جاقىن ارادا قالپىنا كەلۋگە ءتيىس دەيدى. ال ازىرگە اراب جەرىندەگى شەتەلدىكتەردىڭ ەشبىرى اۋەجاي ماڭىنا بارماۋ كەرەگى ەسكەرتىلدى. قانداي دا كومەك قاجەت بولسا، ديپلوماتيالىق ميسسيا وكىلدىكتەرىنە جۇگىنۋ شارت. ساۋدياداعى كورول حاليد اۋەجايىنا كەشە دە شابۋىل جاسالدى. الايدا ەلدىڭ قورعانىس جۇيەسى بىرنەشە زىمىراندى دارىتپاي قاعىپ تۇسىرگەنمەن تەرمينالدان تاعى قويۋ قارا ءتۇتىن كوتەرىلگەن ەدى.
اراب باسىلىمدارىنىڭ حابارلاۋىنشا، حۋسيتتەر جاقىن ارادا مەككە مەن ماديناعا شابۋىل جاساۋى ابدەن ىقتيمال. ازىرگە ەلدىڭ باسىم بولىگىندە ۇشاق قاتىناسى تەجەلىپ تۇر. مىڭداعان شەتەلدىك ءىرى قالالاردان شىعا الماي قالدى.