سۋ تاسقىنىنان زارداپ شەككەن ۇيلەردى جوندەۋگە 257 ميلليارد تەڭگە قاجەت

استانا. KAZINFORM - سۋ تاسقىنىنان زارداپ شەككەن ۇيلەردى جوندەۋگە 257 ميلليارد تەڭگە قاجەت. بۇل تۋرالى ۇكىمەت وتىرىسىندا پرەمەر- ءمينيستردىڭ ورىنباسارى قانات بوزىمبايەۆ ايتتى.

«ۇكىمەت سۋ تاسقىنى سالدارىن جويۋ جانە زارداپ شەككەن ازاماتتارعا جان-جاقتى كومەك كورسەتۋ بويىنشا جۇمىستى جالعاستىرىپ وتىر. شامامەن 67 مىڭ ادام ءوز ۇيلەرىنە ورالدى، ەۆاكۋاتسيالىق پۋنكتتەردەگى 3664 تۇرعىنعا بارلىق قاجەتتى كومەك كورسەتىلۋدە. سۋ تاسقىنى باستالعاننان بەرى بارلىعى 12086 تۇرعىن ءۇي مەن 7380 جالعىز باسپانا ساياجاي قۇرىلىستارى سۋ استىندا قالدى. جالپى زارداپ شەككەن وڭىرلەردە 18228 تۇرعىن ءۇي زەرتتەلدى. بۇل - 94 پايىز. 15651 نىسان بويىنشا باعالاۋ اياقتالدى. بۇل - 81 پايىز»، - دەدى ۇكىمەت باسشىسىنىڭ ورىنباسارى.

ونىڭ اتاپ وتۋىنشە، قازىرگى ۋاقىتتا زەرتتەۋ قورىتىندىلارىنا سايكەس 9306 باسپانا قالپىنا كەلەتىن ساناتقا جاتقىزىلدى. 8190 باسپانا قالپىنا كەلتىرىلمەيتىن ساناتقا جاتقىزىلىپ، ولار بويىنشا قايتالاما نارىقتان 5714 باسپانا ساتىپ الۋ جانە 2576 تيپتىك جوبادا باسپانا قۇرىلىستارى جوسپارلانعان.

«جالپى، تۇرعىن ءۇيدى قالپىنا كەلتىرۋگە شامامەن 257 ميلليارد تەڭگە قاجەت. قازىرگى ۋاقىتتا 6176 وتباسى جالپى سوماسى 40 ميلليارد تەڭگەگە باسپانا جوندەۋگە جانە قالپىنا كەلتىرۋگە وتەماقى الدى. زارداپ شەككەن ايماقتاردا بۇگىندە 3414 وتباسىنا قيراعان تۇرعىن ءۇيدىڭ ورنىنا جاڭا ۇيلەر مەن پاتەرلەر ساتىپ الىندى نەمەسە وتەماقى تولەندى. زارداپ شەككەن ازاماتتارعا ارنالعان 2500 جاڭا باسپانا قۇرىلىسى جۇرگىزىلۋدە. 33321 وتباسى 12 ميلليارد تەڭگەدەن استام سوماعا 100 ا ە ك مولشەرىندە ءبىرجولعى تولەم الدى. بۇل جۇمىس قاراعاندى، پاۆلودار، اقمولا، اباي جانە ۇلىتاۋ وبلىستارىندا تولىق اياقتالدى. اقتوبە، باتىس قازاقستان، سولتۇستىك قازاقستان، قوستاناي، اتىراۋ وبلىستارىندا تولەمدەر جالعاسۋدا»، - دەدى قانات بوزىمبايەۆ.

اۆتور

مارلان جيەمباي