سۋ تاسقىنىنا جول بەرگەن ەشبىر لاۋازىمدى تۇلعا جاۋاپقا تارتىلماعان - دەپۋتات
استانا. KAZINFORM - ءماجىلىس دەپۋتاتى ابزال قۇسپان ەلىمىزدەگى سۋ تاسقىنىنىڭ سەبەپ- سالدارىنا قاتىستى ماسەلەنى كوتەرىپ، ەلىمىزدىڭ باس پروكۋرورى بەرىك اسىلوۆقا دەپۋتاتتىق ساۋال جولدادى.
«بيىلعى سۋ تاسقىنى - ەلىمىز تاۋەلسىزدىك العالى بولعان ونىنشى ءىرى سۋ اپاتى. الايدا وسى كەزگە دە دەيىن سۋ تاسقىنىنىڭ الدىن الماعانى نەمەسە سالعىرتتىق تانىتىپ، جول بەرگەنى ءۇشىن ەشبىر جوعارى لاۋازىمدى تۇلعا جاۋاپكەرشىلىككە تارتىلماعان. بۇل جەردە مەن جەرگىلىكتى اتقارۋشى ورگاننىڭ، ياعني اكىمدەردىڭ جاۋاپكەرشىلىگى تۋرالى ايتىپ وتىرمىن. وزەن بويىنداعى سۋ جايىلمالارىنان جەر بەرگەن، ساياجايلاردى تۇرعىن ۇيگە اينالدىرعان، ياعني جارىق، گاز تارتىپ، ازاماتتاردى تۇراقتى تىركەۋگە رۇقسات بەرگەن، ول - ۇكىمەت ەمەس، جەرگىلىكتى اتقارۋشى ورگان، ياعني اكىمدىكتەر»، - دەدى ابزال قۇسپان ءماجىلىستىڭ جالپى وتىرىسىندا.
ونىڭ ايتۋىنشا، كەلگەن شىعىن سالماعىن ۇنەمى مەملەكەت موينىنا الادى.
«قىلمىستىق كودەكستىڭ 3-بابىندا اسا ءىرى زالال جانە اۋىر زارداپ دەگەن ۇعىم بار، بيىل سۋ تاسقىنىندا مەملەكەت تە، ازاماتتار دا اسا ءىرى كولەمدە شىعىنعا ۇرىندى. پرەزيدەنت سۋ تاسقىنىنا بايلانىستى باس پروكۋراتۋراعا ناقتى تاپسىرما بەردى. وسى ورايدا ءبىر توپ دەپۋتات بولىپ ب ق و جانە اتىراۋ وبلىسىنىڭ قۇلسارى قالاسىنداعى جاعدايعا كوز جەتكىزىپ كەلدىك. اتالعان وڭىردەگى جاعدايلارعا قاتىستى تەكسەرۋدى باس پروكۋراتۋرا دەڭگەيىندە كەشەندى تۇردە ۇيىمداستىرۋ قاجەت دەپ ەسەپتەيمىن»، - دەيدى ول.
سونداي-اق، حالىق قالاۋلىسى قولىندا دالەلدەۋشى فاكتىلەردىڭ بارىن ايتتى.
«قۇلسارىدا جەرگىلىكتى بەلسەندىلەر، وبلىستىق، اۋداندىق ءماسليحات دەپۋتاتتارى جەم وزەنى بويىنداعى زاڭسىز سالىنعان بوگەتتەر تۋرالى ماسەلەنى بىلتىر كوتەرگەن. ءبىراق جەرگىلىكتى ورگاندار مەن پروكۋراتۋرا تاراپىنان ەشقانداي قولداۋ تابا الماعان، سول سەبەپتى ولارعا سەنبەيدى. بارلىق ءتيىستى قۇجاتتار، فاكتىلەر مەنىڭ قولىمدا بار»، - دەدى ا. قۇسپان.