«سۋ تاسقىنىنا دايىن بولۋدى سۇرايمىز»: ورال تۇرعىندارىنا ەسكەرتۋ جاريالاندى

  ورال. KAZINFORM - ورال قالاسى تۇسىندا وزەندەردە سۋ دەڭگەيى كوتەرىلۋى ىقتيمال.

ورال قالاسى اكىمدىگىنەن الىنعان اقپاراتقا قاراعاندا، «قازسۋشار» ر م ك ب ق و فيليالىنىڭ مالىمەتىنە سايكەس جاقىن كۇندەرى شاعان، دەركول، جايىق وزەندەرىندە سۋ دەڭگەيى كوتەرىلىپ، قاۋىپتى شەكتەن اسۋى مۇمكىن.

سالدارىنان وزەن جايىلمالارىندا ورنالاسقان باۋ-باقشا سەرىكتەستىكتەرى، ونداعى تۇرعىنجايلار زارداپ شەگۋى مۇمكىن.

«تۇرعىنداردان سۋ تاسقىنىنا دايىن بولۋدى، قاجەتتى ءىس-شارالاردى قولعا الۋدى، سۋ تاسقىنىنا دەيىن الدىن الا قاۋىپسىز جەرگە كوشۋدى سۇرايمىز. سۋ تاسقىنى قاۋپى تۋرالى الدىن الا حابارلانعان كەزدە راديو، تەلەديدار، ينتەرنەتتەگى اقپاراتتى قاداعالاڭىز. گاز، ەلەكتر قۋاتىن جانە سۋدى ايىرىپ، قۇجاتتاردى سۋ وتكىزبەيتىن پاكەتكە سالىڭىز. اقشانى، كيىم، تاماق جانە ءدارى-دارمەكتى دايىنداپ، باعالى زاتتار مەن جيھازداردى سۋدان قاۋىپسىز جەرلەرگە ورنالاستىرىڭىز. ءۇي جانۋارلارىن جىپتەن بوساتىڭىز جانە ولاردى قاۋىپسىز جەرگە اپارىڭىز. ەگەر سۋ تاسقىنى ورىن السا، ءدارى-دارمەك، ازىق-تۇلىك، سۋ قورىن جانە العاشقى كومەك جيناعىن الىڭىز. سۋ تاسقىنى ايماعىنان شىعىپ، ەۆاكۋاتسيالىق ورىنعا بارىڭىز. مۇمكىندىك بولسا، سۋدا قالعان ادامدارعا شۇعىل تۇردە كومەكتەسىڭىز. ەگەر ەۆاكۋاتسيالاۋ مۇمكىن بولماسا، 101 نەمەسە 112 نومىرىنە قوڭىراۋ شالىڭىز جانە ورنالاسقان جەرىڭىز تۋرالى حابارلاڭىز. مۇمكىندىگىنشە تەزىرەك جاقىن ماڭداعى قاۋىپسىز بيىك ورىنعا (جوعارعى قاباتتار، شاتىر) ورنالاسىڭىز. كومەك كەلگەنگە دەيىن ۇيدە بولىڭىز، بەلگى بەرىڭىز (كۇندىز - اق نەمەسە ءتۇرلى-ءتۇستى ماتەريالمەن، تۇندە - فونارمەن)»، - دەلىنگەن رەسمي حابارلامادا.

ەسكە سالا كەتەيىك، بۇدان بۇرىن باتىس قازاقستان وبلىسىندا 430 دان استام ۇيگە سۋ كىرگەنىن جازعان بولاتىنبىز.

سونداي-اق باتىس قازاقستان وبلىسىندا 18 جولدى تاسقىن سۋ شايىپ كەتتى.