سۋ تاسقىنى: وڭىرلەردەگى قازىرگى جاعداي قالاي

استانا. KAZINFORM - توتەنشە جاعدايلار مينيسترلىگى توتەنشە جاعدايلاردى جويۋ دەپارتامەنتىنىڭ باستىعى قاھارمان ورازالين ەل اۋماعىنداعى سۋ تاسقىنىنىڭ جاعدايى تۋرالى سوڭعى مالىمەتتەرمەن ءبولىستى.

«سۋ تاسقىنى باستالعالى بەرى ازاماتتىق قورعانىستىڭ كومەگىمەن 62 مىڭعا جۋىق ادام، ونىڭ ىشىندە 15 مىڭنان استام بالا جانە 45 مۇمكىندىگى شەكتەۋلى ازامات ءقاۋىپسىز جەرگە جەتكىزىلدى. ۋاقىتشا ورنالاسۋ پۋنكتەرىنە 13 مىڭنان استام ادام، ونىڭ ىشىندە 6800 گە جۋىق بالا ەۆاكۋاتسيالاندى. توتەنشە جاعدايلار قورعانىس مينيسترلىگى جانە ۇلتتىق ۇلاننىڭ اۋە كەمەلەرىمەن 2607 ادام، ونىڭ ىشىندە 760 بالا قاۋىپسىز جەرگە ورنالاستىرىلدى. توتەنشە جاعدايلار مينيسترلىگى جانە جەرگىلىكتى اتقارۋشى ورگانداردىڭ كومەگىمەن 7 ميلليون تەكشە مەتردەن استام سۋ سورىلدى، سونىمەن قاتار 911 مىڭنان استام قاپ، 907 توننا ينەرتسيا ماتەريال توسەلدى. بۇگىندە قۇتقارۋ جۇمىستارىنا 900 مىڭنان استام ادام، 2 مىڭ بىرلىك تەحنيكا جانە 500 گە جۋىق ءجۇزۋ، سۋ ايداۋ قۇرالدارى جۇمىلدىرىلدى»، - دەدى قاھارمان ورازالين ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ودان بولەك، قۇتقارۋ جۇمىستارىنا قورعانىس مينيسترلىگى جانە ۇلتتىق ۇلاننىڭ 10 اۋە كەمەسى تارتىلعان.

«قازىرگى ۋاقىتتا اتىراۋ، اقتوبە، اقمولا، قوستاناي، سولتۇستىك قازاقستان وبلىسى جانە پاۆلودار وبلىسىندا 3365 جەكە تۇرعىن ءۇي، 200 اۋلا اۋماعى جانە 1059 ساياجاي سۋ استىندا قالدى. سونداي-اق، رەسپۋبليكالىق، وبلىستىق جانە جەرگىلىكتى ماڭىزى بار سۋ شايعان 85 اۆتوجول جانە سۋ جۇرگەن 135 جول رەسپۋبليكالىق شتابتىڭ باقىلاۋىندا»، - دەيدى ول.