سۋ تاسقىنى ەلىمىزدىڭ سۋ شارۋاشىلىعىنا قالاي اسەر ەتتى

استانا. KAZINFORM - سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ بيىلعى تاسقىننىڭ ەلىمىزدىڭ سۋ شارۋاشىلىعىنا اسەرى تۋرالى ايتتى.

«سۋ تاسقىنىنىڭ سالدارى عانا ەمەس، ەكونوميكا سالالارىنىڭ قاجەتتىلىكتەرى ءۇشىن قويمالاردا 12 ميلليارد تەكشە مەتردەن استام سۋ جينالدى. وتكەن جىلى سۋ تاسقىنى كەزەڭىندە سۋ قويمالارىنان جالپى سۋ اعىزۋ شامامەن 13 ميلليارد تەكشە مەتردى قۇراسا، بيىل ءبىر ايدا 36 ميلليارد تەكشە مەتردەن استى. بۇل بيىلعى سۋ تاسقىنىنىڭ اۋقىمدىلىعىن كورسەتەدى. تاسقىن كەزىندە سۋ شارۋاشىلىعى نىساندارى توپان سۋمەن كۇرەسە ءبىلدى، وسىلايشا سوڭعى جىلدارى سۋ تاپشى وبەكتىلەرگە تاسقىندى جىبەرۋ مۇمكىندىگى تۋدى»، - دەدى نۇرجان نۇرجىگىتوۆ ۇكىمەت وتىرىسىندا بايانداما جاساپ.

ودان ءارى مينيستر ەلىمىزدەگى سۋ قويمالارىنداعى جاعدايعا توقتالدى.

«ق. ساتبايەۆ اتىنداعى كانال ارقىلى سۋ تولتىرىلاتىن استانا سۋ قويماسىنا تاسقىن سۋ جىبەرىلىپ، 2 ميلليارد تەڭگەدەن استام قاراجات ۇنەمدەلدى. سونداي-اق، تاسقىن كوپتەن بەرى سۋ كەلمەگەن جەرلەرگە باعىتتالىپ، ەكولوگيالىق جاعدايدى جاقسارتتى دەۋگە بولادى. باتىس قازاقستان وبلىسىنىڭ قامىس-سامار كولدەرىنە 80 ميلليون تەكشە مەتر سۋ جىبەرىلدى. ۇلىتاۋ وبلىسىنان قىزىلوردا وبلىسىنا 839 ميلليون تەكشە مەتر سۋ جىبەرىلدى. تاريحتا العاش رەت سارىسۋ وزەنى ارقىلى قىزىلوردا وبلىسىنىڭ كول جۇيەلەرىنە سۋ جەتكىزىلدى. جىل باسىنان بەرى بالقاش كولىنە 12 ميلليارد تەكشە مەتر سۋ، ونىڭ ىشىندە سۋ تاسقىنى كەزىندە 3,3 ميلليارد تەكشە مەتر، كاسپي تەڭىزىنە 7,4 ميلليارد تەكشە مەتر سۋ جونەلتىلدى»، - دەيدى ول.

اۆتور

داۋلەت ىزتىلەۋ