سۋ تاسقىنى كەزىندە قۇتقارۋشىلار قانشا ەڭبەكاقى الدى

استانا. KAZINFORM - سۋ تاسقىنى كەزىندە ت ج مينيسترلىگى قۇتقارۋشىلارىنىڭ ورتاشا جالاقىسى 334 مىڭ تەڭگەنى قۇرادى. بۇل تۋرالى سالا ءمينيسترى شىڭعىس ءارىنوۆ ايتىپ بەردى.

ءمينيستردىڭ ايتۋىنشا، بۇعان دەيىن ت ج م جەدەل-قۇتقارۋ بولىمشەلەرىنىڭ قىزمەتكەرلەرىنە ۇستەمەاقى قاراستىرىلعان:

- كۇتۋ رەجيمىندە بولعانى ءۇشىن جانە اتتانۋعا تۇراقتى دايىندىعى ءۇشىن - 25 پايىز؛

- دەنساۋلىق پەن ومىرگە زيان كەلتىرۋ ءقاۋىپ- قاتەرىمەن بايلانىستى جۇمىس ءۇشىن - 70 پايىز؛

- ومىرگە ءقاۋىپ توندىرەتىن توتەنشە جاعدايلاردا جۇمىس ىستەگەن ءاربىر ساعات ءۇشىن - 300 پايىز؛

- جوعارى جانە تومەن تەمپەراتۋرادا جۇمىس ىستەگەن ءاربىر ساعات ءۇشىن - 100 پايىز؛

- سۋ استىندا اپاتتىق-قۇتقارۋ جۇمىستارىن جۇرگىزگەنى ءۇشىن - 100 پايىز؛

- قازا تاپقانداردىڭ دەنەلەرىمەن جۇمىس ىستەۋگە بايلانىستى پسيحوەموتسيونالدى جۇكتەمە ءۇشىن - 100 پايىز؛

- شىبىن-شىركەي جانە باسقا دا قاۋىپتى جاندىكتەردىڭ تارالۋ ايماقتارىندا جۇمىس ىستەگەنى ءۇشىن - 15 پايىز.

«ەگەر ولار وسى جىكتەمەگە ساي كەلسە، سايكەسىنشە قوسىمشا اقى تولەنەدى. وسىلايشا اي سايىن ولار ءارتۇرلى جالاقى الىپ كەلەدى. ءبىز جاقىن ارادا قانداي وقيعالار بولاتىنىن بولجاي المايمىز. سۋ تاسقىنى كەزىندە قوسىمشا اقىنى ەسەپكە العاندا، ورتاشا جالاقى 334 مىڭ تەڭگەنى قۇرادى»، - دەپ جاۋاپ بەردى شىڭعىس ءارىنوۆ.