سۋ تاسقىنى كەزىندە باسپاناسىز قالعان تۇرعىندار كۇن سۋىقتا دالادا قالمايدى - مينيستر

استانا. KAZINFORM - سۋ تاسقىنى كەزىندە باسپاناسىز قالعان تۇرعىندار قىستا دالادا قالمايدى. بۇل تۋرالى ۇكىمەت وتىرىسىنان كەيىنگى بريفينگتە ونەركاسىپ جانە قۇرىلىس ءمينيسترى قانات شارلاپايەۆ ايتتى.

«قازىرگى تاڭدا باتىس قازاقستان وبلىسىندا - 775، اقمولا وبلىسىندا - 331، اقتوبە وبلىسىندا - 504، اتىراۋ وبلىسىندا 100 ءۇي سالىپ جاتىرمىز. مەنىڭ ويىمشا، قىركۇيەككە دەيىن قۇرىلىس جۇمىستارىنىڭ 80 پايىزىن اياقتايمىز. بىرنەشە نىساننىڭ قۇرىلىسى 15-20 -قىركۇيەككە دەيىن سوزىلۋى مۇمكىن. باستى ماقساتىمىز - قىركۇيەكتىڭ سوڭىنا دەيىن قۇرىلىستى تولىق اياقتاۋ»، - دەدى ب ا ق وكىلدەرىنىڭ ساۋالىنا جاۋاپ بەرگەن مينيستر.

ونىڭ دەرەگىنشە، باتىس قازاقستان وبلىسىنىڭ ءبورلى اۋدانىندا 60 ءۇيدىڭ سىرىم اۋدانىندا 14 ءۇيدىڭ قۇرىلىسى تولىقتاي اياقتالدى. سىرىم اۋدانىندا قالعان ۇيلەردىڭ قۇرىلىس جۇمىستارى 25-تامىزعا دەيىن اياقتالادى.

«اقتوبە وبلىسىنداعى جاعداي جامان ەمەس. تەك ءبىر اۋىلدا قيىندىق بار. ول اۋدان ورتالىعىنان 90 شاقىرىم قاشىقتىقتا ورنالاسقان. جاڭا ورىندا نۇرا اۋىلىنىڭ ۇيلەرىن سالىپ جاتىرمىز. 15-20-قىركۇيەككە دەيىن قۇرىلىستى اياقتايمىز»، - دەدى قانات شارلاپايەۆ.

سونىمەن قاتار مينيستر بارلىق وڭىردە قۇرىلىس جۇمىستارى ۋاقىتىلى اياقتالىپ، تۇرعىندار كۇن سۋىقتا دالادا قالمايتىندىعىن باسا ايتتى.

اۆتور

مارلان جيەمباي