سۋ تاسقىنى جۇقپالى اۋرۋعا سەبەپ بولۋى مۇمكىن

پەتروپاۆل. KAZINFORM - سۋ تاسقىنى كەزىندە قولايسىز ەپيدەميولوگيالىق جاعداي تۋىنداۋى مۇمكىن. جۇقپالى اۋرۋدىڭ الدىن الۋ ءۇشىن جەكە باس گيگيەناسىنان بولەك قاراپايىم قاۋىپسىزدىك ەرەجەلەرىن ساقتاعان ءجون.

سولتۇستىك قازاقستان وبلىسىنىڭ سانيتاريالىق- ەپيدەميولوگيالىق باقىلاۋ دەپارتامەنتىنىڭ تەحنيكالىق رەگلامەنتتەردىڭ تالاپتارىن باقىلاۋ ءبولىمىنىڭ باسشىسى مارينا داۆلەتبايەۆانىڭ ايتۋىنشا، جايىلعان سۋدان كەلەر قاۋىپ كوپ. ماتەريالدىق شىعىننان بولەك، تاسقىن سۋ ءتۇرلى اۋرۋدىڭ تارالۋىنا سەبەپ بولۋى مۇمكىن. سونىڭ ىشىندە گەپاتيت، تىرىسقاق، ءىش سۇزەگى، ديزەنتەريا، لەپتوسپيروز، تۋليارەميا، قۇرتتار، برۋتسەللەز، سالمونەللەز سەكىلدى جۇقپالى اۋرۋلار بار.

«سۋ ارقىلى بەرىلەتىن ۆيرۋستىق اۋرۋلاردىڭ ىشىندە ەنتەروۆيرۋستار، ا گەپاتيتى ءجيى كەزدەسەدى. تاسىعان وزەن، كول سۋى جايىلىپ، قالدىق ءۇشىن قازىلعان شۇڭقىرلاردى، دارەتحانالاردى، اۋلانى شايىپ، قۇدىققا قۇيىلۋى مۇمكىن. سوندىقتان سۋ تاسىعان ۋاقىتتا قايناتىلماعان سۋ ىشكەن دەنساۋلىققا زيان. جارامدىلىق مەرزىمى جەتكىلىكتى بوتەلكەدەگى سۋدىڭ قورىن جاساڭىز. ونى سۋمەن شايىپ كەتپەيتىن بيىك جەردە ساقتاڭىز. ءىشۋ جانە تاماق ءپىسىرۋ ءۇشىن تەك وسى بوتەلكەدەگى نەمەسە قايناتىلعان سۋدى پايدالانىڭىز»، - دەيدى مارينا داۆلەتبايەۆا.

تاسقىن سۋعا مالىنعان تاماق ونىمدەرىن، ماسەلەن جەرتولەدە جاتقان كوكونىستەردى پايدالانۋ دا قاۋىپتى. كوكونىستەر مەن جەمىستەردى شيكى تۇردە جەگەن كەزدە ولاردى بوتەلكەدەگى نەمەسە قايناتىلعان سۋمەن جاقسىلاپ شايىپ جۋعان ءجون.

«جەكە گيگيەنا ەرەجەلەرىن قاتاڭ ساقتاڭىز، ياعني دارەتحاناعا بارعاننان كەيىن، جانۋارلاردى ۇستاعاننان كەيىن، تاماق دايىنداماس بۇرىن جانە تاماقتانار الدىندا قولىڭىزدى سابىنمەن مۇقيات جۋىڭىز. اۋرۋدىڭ العاشقى بەلگىلەرىن بايقاعان جاعدايدا ءوزىڭىزدى- ءوزىڭىز ەمدەمەي، دەرەۋ دەنساۋلىق ساقتاۋ مەكەمەسىنە مەديتسينالىق كومەككە جۇگىنىڭىز»، - دەيدى سانيتار دارىگەر.

سۋ تاسقىنى وتكەننەن كەيىن دە قاۋىپسىزدىكتى ۇمىتپاعان ءجون.

«اۋلانى تاسقىن سۋ اكەلگەن قوقىستاردان تازارتىپ، كەيىن ونى قاتتى تۇرمىستىق قالدىقتار پوليگونىنا اپارىڭىز. قولدانىستا قۇدىق بار بولسا، ونداعى لاستانعان سۋدى سورعىزىپ، ءىشىن دەزينفەكتسيالاۋ كەرەك، بۇل اسىرەسە ساياجاي جانە اۋىل تۇرعىندارىنا ءۇشىن اسا ماڭىزدى. ەسىك الدىندا جۇمىس ىستەگەندە ينفەكتسيا قولمەن اعزاعا ەنبەۋى ءۇشىن قولعا قولعاپ كيگەن ءجون، سونداي-اق، جۇمىس كەزىندە تاماق ىشپەڭىز جانە تەمەكى شەكپەڭىز. ءۇي ۋچاسكەسىن جيناۋ بارىسىندا ينفەكتسيا شاڭمەن اعزاعا تۇسپەۋى ءۇشىن جۇمىستاردى ورىنداۋ كەزىندە اۋزىڭىز بەن مۇرنىڭىزدى مەديتسينالىق ماسكامەن نەمەسە داكە تاڭعىشپەن جابىڭىز. سۋ باسقان جەرلەردە ورنالاسقان بۇلاقتاردان سۋ ءىشۋ قاۋىپتى جانە تۇرمىستىق قاجەتتىلىكتەر ءۇشىن تابيعي سۋ قويمالارىنىڭ سۋىن پايدالانباڭىز. ىشۋگە بوتەلكەدەگى سۋدى پايدالانۋدى ۇسىنامىز»، - دەيدى مامان.

بۇعان دەيىن س ق و- دا 87 ەلدى مەكەندى سۋ باسۋ قاۋپى بار ەكەنىن ايتقان ەدىك.

ءوڭىردىڭ ءبىرقاتار اۋداندارىندا ورنالاسقان شاعىن وزەندەردىڭ سۋ دەڭگەيى كوتەرىلىپ كەلەدى. ال شاعالالى وزەنىندە ءبىر تاۋلىكتە سۋ دەڭگەيى بىردەن 1,5 مەترگە ارتتى.

28-ناۋرىز كۇنى س ق و- عا پرەمەر- مينيستر ولجاس بەكتەنوۆ كەلىپ، وبلىستىڭ سۋ تاسقىنىنا دايىندىعىن كوردى.