سۋ تاسقىنى، شىركەي، قۇرىلتاي: تۇركىستان وبلىسىندا قويان جىلىندا قانداي ەلەۋلى وقيعالار بولدى

تۇركىستان وبلىسى ءۇشىن قويان جىلى توتەنشە وقيعالارعا تولى بولدى. قىستى كۇنى قاتتى بوراننان جولدار جابىلىپ، جولاۋشىلار جولدا قالسا، شىلىڭگىر شىلدەنىڭ اپتاپ ىستىعىندا ايماقتا شىركەي قاپتاپ كەتتى، دەپ حابارلايدى Kazinform.

قويان جىلى باستالىسىمەن 35000 نان استام ابونەنت جارىقسىز قالدى

جىل باستالىسىمەن قارلى بوران سالدارىنان بىرنەشە اۋىلدا ەلەكتر جەلىلەرى ءۇزىلىپ، ىستەن شىقتى. تۇركىستان قالالىق 109 ءبىرىڭعاي بايلانىس ورتالىعىنا ەلەكتر جارىعىن قايتا جاعۋ ماسەلەسىمەن 518 ابونەت حابارلاسقان. سونداي- اق، سوزاق، وتىرار، ساۋران اۋداندارىندا 35000 نان استام ابونەنت جارىقسىز قالدى.

ال، قاڭتار ايىندا جاۋعان قاتتى نوسەر وبلىستىق ماڭىزى بار ك ح-57, سوزاق- قاراتاۋ باعىتىندا ورنالاسقان كوپىردى بۇزىپ كەتتى. سىرداريا وزەنىنىڭ جاعالاۋىندا ورنالاسقان توعايلى القاپتاردى سۋ الۋ قاۋپى تۋىندادى. اۋا رايىنىڭ كۇرت سۋىتۋىنا بايلانىستى سىرداريا وزەنىنە جوعارىدان 1000 m3 سۋ تۇسكەن. سول سەبەپتى وزەن بويىندا مۇز قاتىپ، وزەن جاعاسىنداعى وزەكتەرگە سۋ جايىلعان جانە بارلىق ماگيسترالدىق كانالدار ارقىلى كولدەردى سۋ الدى.

«شاردارا» سۋ قويماسىنىڭ مەرزىمىنەن بۇرىن تولۋى دا قاۋىپ ءتوندىردى.

كومىردىڭ بولماۋىنان جىلىجايلارداعى ونىمدەر ءۇسىپ كەتتى

تۇركىستان وبلىسىندا 167 شارۋاعا تيەسەلى 36 گەكتار جىلىجايدىڭ كونسترۋكتسياسى قار سالماعىن كوتەرە الماي، جارامسىز كۇيگە ءتۇستى. سونداي- اق، ءبىرشاما جىلىجاي يەلەرى كومىردىڭ جوقتىعىنان جىلىجايلارىن جىلىتا الماعان. سالدارىنان ءپىسىپ ۇلگەرمەگەن ءونىمدى قوقىسقا تاستاۋعا ءماجبۇر بولدى.

سول سەبەپتى تۇركىستان وبلىسىندا كومىر تاسىمالداۋدا كەمشىلىكتەرگە جول بەرگەن باسشىلار سوگىس الدى.

تۇركىستان قالاسىنا ەرەكشە مارتەبە بەرۋ ماسەلەسى قارالدى

تۇركىستان قالاسىنا ەرەكشە مارتەبە بەرۋ باعىتىندا زەردەلەۋ جۇمىستارىن جۇرگىزۋ جونىندەگى جۇمىس توبى قۇرىلدى. العاشقى جيىنىن وتكىزىپ، ءبىرشاما ماسەلەلەردى ساراپقا سالدى. مادەنيەت جانە تۋريزم باسقارماسى وكىلدەرىنىڭ ۇسىنىستارى تىڭدالدى. تۇركىستان قالاسى اكىمدىگى تاراپىنان باستالعان جۇمىستار دا باياندالدى. جۇمىس توبى قۇرامىنا ەنگەن باسقارما باسشىلارى مەن وكىلدەرى، ساۋلەتشىلەر دە پىكىرلەرىن ايتتى. قوجا احمەت ياساۋي كەسەنەسىن قورعاۋ، «تۇركىستان قالاسىنا ەرەكشە مارتەبە بەرۋ» بويىنشا ۇسىنىستار جيناقتاۋ جونىندەگى باستاپقى قادامدار دا سارالاندى.

بايدىبەك اۋدانىندا 36 ۇساق مال سۋ استىندا قالدى

مول جاۋعان جاڭبىر مەن قاردىڭ جىلدام ەرۋى سالدارىنان وڭىردەگى بەس اۋداندا 20 ەلدى مەكەندى سۋ الدى. 27 كوشە مەن 234 ءۇيدىڭ اۋلاسىنا سۋ كىردى. جەرگىلىكتى اتقارۋشى ورگاندار مەن ت ج د قىزمەتكەرلەرىمەن 200 دەن استام تۇرعىن قاۋىپسىز جەرگە كوشىرىلدى. 790 ۇساق مال قۇتقارىلدى.

«شولاققورعان - شايان» جولىندا تاسقىن سۋ ءنوپىرى «Toyota Camry» كولىگىن جولدان شىعارىپ جىبەرگەن. كولىكتەگى ەكى ادام دەر كەزىندە قۇتقارىلدى. ءدال وسىنداي جاعداي ارىس قالاسىندا دا بولدى. مۇندا سۋ ورتاسىندا قالعان «نيۆا» كولىگىنەن 5 جولاۋشى قاۋىپسىز جەرگە ەۆاكۋاتسيالاندى. تۇركىستان وبلىسىنداعى سۋ تاسقىنىنان وبلىستىق ماڭىزى بار 10 نان استام اۆتوجول زاقىمدالدى. بايدىبەك اۋدانىندا 36 ۇساق مال سۋ استىندا قالدى.

كەيبىر اۋداندارىن شىركەي باستى

شىركەيدىڭ كوپتىگى سونشا، تۇرعىندار بەتتەرىن تۇمشالاپ الۋعا ءماجبۇر بولدى. الەۋمەتتىك جەلىدە جاريالانعان ۆيدەو اۆتورىنىڭ ايتۋىنشا، شىركەيلەر جۇمىرتقا اشقان قىرعاۋىلدىڭ بالاپاندارىن جەپ قويعان.

«ءتىپتى، قويان كوجەكتەرى مەن تولدەگەن سيىردىڭ بۇزاۋى جانە جىلقىلاردىڭ قۇلىندارى ءولىپ كەتىپ جاتىر»، - دەدى اۆتور.

ال، اتالعان ماسەلەگە رەسمي تۇردە جاۋاپ بەرگەن وتىرار اۋدانىنىڭ اكىمدىگى ەلدى مەكەندەردە جاندىكتەر مەن وزگە دە زيانكەستەرگە قارسى دارىلەۋ، دەزينسەكتسيالاۋ جۇمىستارى جۇرگىزىلىلىپ جاتقانىن جەتكىزدى.

سونداي- اق، شىركەيمەن كۇرەس ارىس قالاسىنىڭ اۋماعىندا دا ءجۇردى. قالا اكىمدىگى باسپا ءسوز قىزمەتىنىڭ مالىمەتىنشە، ەكى كەزەڭ بويىنشا ىسكە اساتىن جۇمىستار ادام كوپ شوعىرلاناتىن ايماقتاردان باستالعان.

ەلىمىزدەگى ەڭ ۇلكەن جىلىجاي كەشەنىنىڭ ىرگەتاسى قالاندى

كەلەس اۋدانىندا ەلىمىزدەگى ەڭ ۇلكەن جىلىجاي كەشەنىنىڭ كاپسۋلاسىن قويۋ ءراسىمى ءوتتى. 500 گەكتار اۋماقتا ورنالاساتىن ونەركاسىپتىك جىلىجايلار جوباسى «ەكو- كۋلتۋرا» كومپانياسىنىڭ قولداۋىمەن جۇزەگە اسىتى.

مۇندا نەگىزىنەن قىزاناق پەن قيار وسىرىلمەك. زاماناۋي جىلىجاي كەشەنى جىلىتۋ جۇيەسى مەن سالقىنداتۋدى، جارىق رەجيمىن، تامشىلاتىپ سۋارۋدى، اتموسفەراداعى كومىرقىشقىل گازىنىڭ مولشەرىن باسقاراتىن زاماناۋي اۆتوماتتاندىرىلعان كليماتتىق باقىلاۋ جۇيەسىمەن جابدىقتالادى.

ۇلتتىق قۇرىلتاي ءوتتى

پرەزيدەنت جانىنان قۇرىلعان ۇلتتىق قۇرىلتايدىڭ ەكىنشى وتىرىسى تۇركىستان قالاسىندا ۇيىمداستىرىلدى. ەكى كۇن بويى قوعامداعى وزەكتى ماسەلەلەردى تالقىلاعان قوعام قايراتكەرلەرى مەن پارلامەنت دەپۋتاتتارى، قوعامدىق كەڭەستەر مۇشەلەرى مەن ب ا ق باسشىلارى جانە ساراپشىلار وزىندىك ۇسىنىستارىن جەتكىزدى.

القالى جيىننىڭ العاشقى كۇنىندە «قوعامدىق كونسوليداتسيا»، «مادەنيەت. ونەر. رۋحانيات»، «ءبىلىم جانە عىلىم» جۇمىس سەكتسياسىنا بولىنگەن سالا ماماندارى ەل ىشىندەگى ماسەلەلەردى كوتەرىپ، شەشۋ جولدارىن دا ۇسىندى.

جۇمىس سەكتسيالارى وتىرىستارىنىڭ قورىتىندىسى بويىنشا ۇلتتىق قۇرىلتاي مۇشەلەرىنىڭ ۇسىنىستارىن مەملەكەتتىك ورگاندارمەن بىرلەسىپ ىسكە اسىرۋ جونىندەگى ءىس-شارالاردىڭ ارنايى جوسپارى ازىرلەنەتىن بولدى.

ال، ەكىنشى كۇنى تۇركىستانعا بارعان مەملەكەت باسشىسى بۇكىل تۇركى دۇنيەسىنە تانىمال عۇلاما قوجا احمەت ءياساۋيدىڭ جانە وسىندا جەرلەنگەن تاريحي تۇلعالاردىڭ رۋحىنا تاعزىم ەتىپ، قۇران باعىشتادى.

سودان سوڭ، ۇلتتىق قۇرىلتايدىڭ نەگىزگى وتىرىسىنا قاتىستى.

قاڭلى داۋىرىنە تيەسىلى قۇندى جادىگەرلەر تابىلدى

وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتىنىڭ ارحەولوگيالىق جاساعى «ورداباسى» مەملەكەتتىك تاريحي- مادەني قورىعىنىڭ قىزمەتكەرلەرىمەن بىرلەسە وتىرىپ، قاڭلى داۋىرىنە تيەسىلى كونە قورىم ورنىن تاپتى. اشىق اسپان استىنداعى نىسان ورداباسى اۋدانىنا قاراستى قاراسپان اۋىلى ماڭىنداعى ورنالاسقان.

قورىمداعى ءدالىزدىڭ ۇزىندىعى 8,5 مەتر بولسا، تەرەڭدىگى - 4 مەتر قۇرايدى. جەرلەۋ كامەراسىنىڭ تەرەڭدىگى - 5,2 مەتر. مامانداردىڭ ايتۋىنشا، مۇنداي تەرەڭدىكتەگى قورىمدار بۇرىن- سوڭدى بۇل ايماقتا كەزدەسپەگەن.

سونداي- اق، ارحەولوگ عالىمدار جۇرگىزگەن قازبا جۇمىستارىنىڭ بارىسىندا سارىارىق اۋىلى ماڭىنداعى ۇڭگىردەن 2 مىڭ جىل بۇرىنعى التىن سىرعا تاۋىپ العان. بۇل قۇندى اشەكەيدىڭ جەر استىندا جاتقانىنا قانشا جىل وتسە دە سىنىن جوعالتپاپتى. سونداي- اق، كونە قورىمنان 400 مونشاقتان تۇراتىن القا مەن كۇمىس ساقينا جانە كىرپىك بوياۋعا ارنالعان بۇيىمدار شىققان. ودان بولەك، قازبا جۇمىستارىنىڭ بارىسىندا كەراميكالىق زاتتار دا تابىلدى.

ءبىر اۋلەتتىڭ 11 ادامى سۋعا كەتتى: مارقۇمداردىڭ ەڭ ۇلكەنى 40 جاستا، ەڭ كىشىسى 6 دا بولعان

سۋعا باتىپ كەتكەن تۇرعىنداردىڭ بارشاسى كوكساراي اۋىلىندا تۇراتىن ءبىر اۋلەتتىڭ ادامدارى. ءتىپتى تەكتەرى دە بىردەي. مارقۇمداردىڭ ەڭ ۇلكەنى 40 جاستا بولسا، ەڭ كىشىسىنىڭ جاسى 6 دا بولعان.

وقيعا وتىرار اۋدانىنداعى سىرداريا وزەنىنەن وتەتىن كوپىر ماڭىندا بولدى. سۋعا كەتكەندەردىڭ بارلىعى 4 اعايىندىنىڭ وتباسى مۇشەلەرى، ولار تىيىم سالىنعان جەرگە شومىلۋعا بارعان.

سونداي- اق، تۇركىستان وبلىسىندا ءبىر كۇن ىشىندە 4 بالا سۋعا كەتىپ، قايتىس بولدى. وقيعا كەلەس، ورداباسى، تولەبي، جەتىساي اۋدانىندا تىركەلدى.

سارىاعاشتا 5 جاسار قىزدىڭ ءولىمى ەلدى دۇرلىكتىردى

وقيعا 13-شىلدە كۇنى بولدى. كۇدىكتى سپيرتتىك ىشىمدىك ىشكەن ماس حالدە ءوزىنىڭ ۇيىنە كەلە جاتىپ، ويناپ جۇرگەن 5 جاستاعى قىزدى اۋلاسىنا الداپ كىرگىزگەن. سودان، كۇش قولدانۋ ارقىلى جاس بالاعا سەكسۋالدىق سيپاتتاعى زورلىق- زومبىلىق ارەكەتتەردى جاساعان. ودان ءارى، اسا اۋىر قىلمىسىن جاسىرۋ ءۇشىن قىزدى اسحانا پىشاعىمەن كوكىرەگى مەن ءىش- اۋماعىنان بىرنەشە رەت شانشىلاپ-كەسكىلەپ ولتىرگەن.

سوت ۇكىمى شىمكەنت قالاسى ساۋلە ىقشاماۋدانىندا ورنالاسقان ي چ-69 مەكەمەسىندە وقىلدى.

48 جاستاعى سوتتالۋشى «ادام ءولتىرۋ» جانە «سەكسۋالدىق سيپاتتاعى زورلىق- زومبىلىق ارەكەتتەرى» بابى بويىنشا كىنالى دەپ تانىلىپ، قالعان ءومىرىن تەمىر توردىڭ ار جاعىندا وتكىزەتىن بولدى. سونداي- اق، وعان كاستراتسيا جاسالىپ، 100 ميلليون تەڭگە كولەمىندە مورالدىق وتەماقى تولەۋگە مىندەتتەلدى.

تۇركىستان وبلىسىندا 4 اۋداننىڭ اكىمى سايلاندى

تۇركىستان وبلىسىنداعى سايلاۋ وتكەن 4 اۋداندا دا ءۇش كانديداتتان باق سىنادى.

حالىقتا سايلاۋعا بەلسەندى قاتىستى. ءتىپتى، كەي سايلاۋ ۋچاسكەلەرىندە كونتسەرتتىك باعدارلاما قويىلىپ، جەرگىلىكتى ونەرپازدار اسەم اندەر ورىنداپ، كوپشىلىكتىڭ ىقىلاسىنا بولەندى. ال، ۇلتتىق كيىمدە كەلگەن اجەلەر مەن كەلىندەر ءوزارا ساباقتاستىقتىڭ ۇلگىسىن كورسەتتى.

ناتيجەسىندە بايدىبەك اۋدانىندا كاسىپكەر ازامات قارسىلاستارىن جەڭىپ شىقسا، شاردارا اۋدانىندا ءماسليحات ءتوراعاسى قىزمەتىن اتقارعان دەپۋتات جوعارى ۇپاي جينادى. ال، سوزاق، ماقتاارال اۋداندارىندا سايلاۋشىلار بۇرىن اكىم قىزمەتىن اتقارىپ كەلگەن كانديداتقا قولداۋ ءبىلدىردى.

تۇركىستاندىق شارۋالار ەكزوتيكالىق جەمىستەردى ءوسىرۋدى قولعا الا باستادى

ەلىمىزدەگى مول كولەمدە بانان وندىرەتىن العاشقى كاسىپورىن سايرام اۋدانىندا سالىندى. مۇندا تۇركيالىق «Gen group Qazaqstan» كومپانياسى 5,3 گا جەرگە جىلىجاي كەشەنىن سالىپ، بانان وتىرعىزعان. وسىرىلەتىن بانان سورتى ارنايى قازاقستاننىڭ كليماتتىق جاعدايلارىنا بەيىمدەلگەن. كاسىپورىن باسشىسى تيمۋر ۋتەشوۆ الداعى ۋاقىتتا مانگو، اۆوكادو سىندى جەمىس تۇرلەرىن ءوندىرۋدى جوسپارلاپ وتىرعاندىعىن جەتكىزدى.

قازاقستاننىڭ 20 ميلليونىنشى تۇرعىنى جەتىساي اۋدانىندا دۇنيەگە كەلدى

35 جاستاعا گۇلميرا ىزتىلەۋوۆا اسىقاتا اۋرۋحاناسىندا ءالىمحان ەسىمدى ءسابيدى دۇنيەگە اكەلدى. بۇل شاكەنوۆتەر وتباسىنداعى 4-بالا. نارەستەنىڭ سالماعى 3400 گ ر، بويى 51 س م بولىپ تۋىلعان.

اناسى گۇلميرا «جەڭىس» جالپى ورتا مەكتەبىندە بيولوگيا ءپانىنىڭ ءمۇعالىمى بولسا، اكەسى ەرعاليدىڭ تۇراقتى جۇمىسى جوق.

ازىرگە جاس وتباسى «ديپلوممەن اۋىلعا» باعدارلاماسى بويىنشا شالعايداعى اۋىلدارعا بارۋعا نيەتتەنىپ وتىر.

تۇلكىباستا توتەنشە جاعداي جاريالانىپ، كەنتاۋدا ج ە و ىستەن شىقتى

قاتتى جەلدىڭ سالدارىنان كەنتاۋ قالاسىندا 10 نىسانعا زاقىم كەلدى. ونىڭ ىشىندە 6 مەكتەپ، 1 بالاباقشا، 2 كوپ قاباتتى تۇرعىن ءۇي، 1 جىلىجايدىڭ شاتىرى ۇشىپ، تەرەزەلەرى سىنعان جانە سىرتقى قاپتامالارى ءتۇسىپ قالعان. سونداي- اق، كەنتاۋداعى جىلۋ ەنەرگو ورتالىعى 10 مينۋتقا ءوشىپ قالىپ، ءبىر قازاندىق ىستەن شىقتى. سالدارىنان قالاداعى كوپ قاباتتى تۇرعىن ۇيلەر بىرنەشە كۇنگە جىلۋسىز قالدى.

تۇلكىباس اۋدانى اكىمىنىڭ №11 شەشىمىمەن جەرگىلىكتى اۋقىمداعى تابيعي سيپاتتاعى توتەنشە جاعداي جاريالاندى.

تۇركىستان وبلىسىنىڭ كوپ بولىگىندە، اسىرەسە، تاۋلى اۋدانداردا قارلى بۇرقاسىن بولدى. اۋا-رايىنىڭ ناشارلاۋىنا بايلانىستى قاتتى جەل مەن بوران سالدارىنان رەسپۋبليكالىق جانە وبلىستىق جولداردا بەكەتتەر قويىلدى. قۇتقارۋشىلار جولدا اداسىپ كەتكەن 300 گە جۋىق ادامدى قۇتقاردى.

اۆتور

قايرات زاينيشيەۆ