سۋ تاسقىنى: اتىراۋداعى ميالى اۋىلىنان 559 تۇرعىن ەۆاكۋاتسيالاندى

اتىراۋ. KAZINFORM - اتىراۋ وبلىسىنداعى ميالى اۋىلىندا تۇرعىنداردى ءىشنارا ەۆاكۋاتسيالاۋ جۇرگىزىلىپ جاتىر. كۇندىزگى ساعات 17:45-تەن بەرى 559 ادام ەۆاكۋاتسيالاندى.

اتىراۋ وبلىستىق توتەنشە جاعدايلار دەپارتامەنتىنىڭ قوعاممەن بايلانىس توبىنان ءمالىم ەتكەندەي، ەۆاكۋاتسيالاۋ ويىل وزەنىنەن تاسقىن سۋدىڭ تونۋىنە بايلانىستى قولعا الىنعان.

«ويىل وزەنىنىڭ سۋى ارناسىنان اسىپ، ميالى اۋىلىنا قاۋىپ ءتوندىردى. وسىعان بايلانىستى ساعات 17:45-تە اۋىل تۇرعىندارىن قاۋىپسىز ورىندارعا ەۆاكۋاتسيالاۋ باستالدى. كەشكى ساعات 20:30-عا دەيىن ميالى اۋىلىنىڭ 559 تۇرعىنى كوشىرىلدى. ونىڭ ىشىندە 327 بالا بار»، - دەپ حابارلادى دەپارتامەنتتىڭ قوعاممەن بايلانىس توبى.

قىزىلقوعا اۋدانىنىڭ اكىمدىگى اۋىل تۇرعىندارى ءۇشىن ەكى مەكتەپ پەن ءبىر بالا باقشانى دايىندادى. ماسەلەن، ح. دوسمۇحامەد ۇلى اتىنداعى ورتا مەكتەپكە 210 ادام، ونىڭ ىشىندە 124 بالا، ى. شورەكوۆ اتىنداعى مەكتەپ- گيمنازياسىعا 79 ادام، ونىڭ ىشىندە 53 بالا، «نۇر- شۋاق» بالاباقشاسىنا 270 ادام، ونىڭ ىشىندە 150 بالا ورنالاستىرلعان.

تۇرعىنداردى ەۆاكۋاتسيالاۋعا توتەنشە جاعدايلار دەپارتامەنتىنىڭ 12 قىزمەتكەرى، 2 تەحنيكاسى، جەرگىلىكتى اتقارۋشى ورگاننان 6 قىزمەتكەر مەن 4 تەحنيكا جۇمىلدىرىلدى.

«قىزىلقوعا اۋدانىنا سۋ باسۋ قاۋپىنە بايلانىستى 31-ناۋرىزدا ساعات 19:15-تە اتىراۋ وبلىستىق توتەنشە جاعدايلار دەپارتامەنتىنىڭ كۇشتەرى مەن قۇرالدارى كومەك كورسەتۋگە جىبەرىلدى. قوسىمشا كومەك توبىندا 60 قىزمەتكەر، 5 تەحنيكا بار»، - دەپ ءمالىم ەتتى دەپارتامەنتتى قوعاممەن بايلانىس توبىنان.

ەسكە سالا كەتەلىك، بۇعان دەيىن اتىراۋ وبلىسىنداعى ءبىر اۋداندا توتەنشە جاعداي جاريالانعانىن جازعان ەدىك.

اۆتور
جولداسبەك شوپەعۇل