سۋ تاسقىنى: اقتوبەدە تاعى ءبىر اۋىل تاراتىلۋى مۇمكىن

اقتوبە. KAZINFORM - اقتوبە وبلىسى ىرعىز اۋدانىنىڭ مامىر اۋىلى تاراتىلۋى مۇمكىن. قازىر بۇل اۋىلدا سۋعا كەتكەن 25 ءۇي يەسىنىڭ تەڭ جارتىسىنا جۋىعى كوشۋگە شەشىم قابىلداعان. جەرگىلىكتى اكىمدىك قالعاندارىنا سارىوبا جەرىندە سالىنىپ جاتقان نۇرا اۋىلىنا قونىستانۋعا ۇسىنىس ايتتى.

ىرعىز اۋدانىندا بارلىعى 125 ءۇي سالىنىپ جاتىر. سونىمەن بىرگە 33 ءۇي ساتىپ الىندى. ال 7 ءۇي قايتا قالپىنا كەلتىرۋگە جارامدى. ءۇي قۇرىلىسى جۇمىستارىن بارلىعى 16 مەردىگەر مەكەمە اتقارىپ جاتىر. ىرعىز اۋدانى بويىنشا نۇرا، مامىر، بەلشەر اۋىلدارىندا تاسقىن سۋ ۇيلەرگە كىرىپ، بۇزدى. قازىرگى كەزدە نۇرالىقتار كوشەتىن سارىوبادا قۇرىلىس ءجۇرىپ جاتىر. ال مامىر اۋىلىندا ءبىر اي بۇرىن ءۇي قاعىزىعى قاعىلعانىمەن، تۇرعىندار مەن اكىمدىك ءبىر توقتامعا كەلە الماي وتىر.

- مامىر اۋىلىنا قاتىستى شەشىم ءالى تولىق شىقپادى. جاڭا وقۋ جىلىندا مۇندا 15 بالا قالايىن دەپ تۇر. سول 15 وقۋشىعا 1، ءارى كەتكەندە 2 مۇعالىم ساباق بەرەدى. اۋىلدا 22 مۇعالىم بولسا، سونىڭ 20 سى جۇمىسسىز قالايىن دەپ تۇر. جۇمىسى جوق ادام كوشكىسى كەلەدى. ول جاققا جاڭادان ءۇي سالعانىمەن قايتا كوشىپ كەتسە، ءتيىمسىز شەشىم بولادى. وسى جايتتى اۋدان اكىمى حالىقپەن كەزدەسۋدە ءتۇسىندىردى. تۇرعىندار العاشقىدا كوشەۋگە كەلىسىم بەرىپ، قولحات دا جازدى. سول باعىتتا جۇمىس ىستەي باستاعاندا قايتا كەلىپ، «اۋىلدا قالامىز، اۋىلدى جوعالتقىمىز كەلمەيدى» دەپ جاتىر. اقتوبە وبلىستىق ءبىلىم باسقارماسى، دەنساۋلىق ساقتاۋ باسقارماسى، مادەنيەت باسقارماسى وكىلدەرىنىڭ قاتىسۋىمەن تاعى دا كەزدەسۋ بولادى. قايتا ويلانىپ، شەشىم شىعارادى، - دەدى ىرعىز اۋدانى اكىمىنىڭ ورىنباسارى اسقار ءۋالي.

ايتا كەتەيىك، مامىر اۋىلىندا بارلىعى 36 ءۇي بولدى. ونىڭ 26 ى سۋعا كەتتى.

- مامىر اۋىلىنان كوشەمىز دەگەن ادامداردىڭ ءبىر بولىگى اۋدان ورتالىعى، ءبىر بولىگى سارىوبا جەرىندەگى نۇرا اۋىلىنا قونىس اۋدارادى دەپ كەلىسىلدى. سول كەلىسىم قالسا دەپ ويلايمىز. ال ەگەر سول اۋىلدا قالامىز دەسە، ءۇي سالىپ، قۇرىلىستى اياقتاۋ قيىنعا سوعادى. ۇسىنىستىڭ ايتىلعانىنا، كەلىسىم بەرگەنىنە ءبىر اي بولدى، - دەدى اسقار ءۋالي.

ەسكە سالساق، بۇعان دەيىن ويىل اۋدانىنىڭ ەكپەتال اۋىلى تاراتىلدى. ول اۋىلدىڭ تۇرعىندارى اۋدان ورتالىعىنا قونىس اۋداردى.

اۆتور
التىناي ساعىندىقوۆا