سۋ تاسقىنى: اقتوبەدە جايساڭباي اۋىلىنىڭ تۇرعىندارى ءالى قايىقپەن قاتىناپ ءجۇر

اقتوبە. KAZINFORM - اقتوبە وبلىسى ىرعىز اۋدانى جايساڭباي اۋىلىنىڭ تۇرعىندارى ءۇش ايدان بەرى قايىقپەن قاتىناپ ءجۇر. اۋىلدا سۋ دەڭگەيى ءوز مولشەرىنەن 1 مەتر تۇسكەنىمەن، ءالى 70-80 س م كەتۋى كەرەك. تۇرعىندار كەيدە قايىققا بەنزين قۇيۋ ءۇشىن ءوز قالتاسىنان اقشا شىعارادى. مۇندا جانار- جاعارمايدىڭ ءليترى - 250 تەڭگە.

ىرعىز اۋدانىنداعى جايساڭباي اۋىلىندا تاسجول قاتىناسى مامىر ايىندا ءۇزىلدى. سودان بەرى مۇندا توتەنشە جاعدايلار قىزمەتى كەزەكشىلىك قۇرىپ، تۇرعىنداردى سۋدان وتكىزۋ مىندەتىن العان. قازىر اۋىلدا ەكى ماتورلى قايىق بار.

- سۋ دەڭگەيى ءتۇسىپ كەلەدى. ءوز ارناسىنان شامامەن 1 مەتر 88 س م دەيىن كوتەرىلىپ ەدى. سونىڭ 1 مەترى ءتۇستى. ەندى 70 س م تۇسسە دەپ وتىرمىز. ءبىر ايدىڭ كولەمىندە ءوز ارناسىنا ءتۇسۋى مۇمكىن. تۇرعىندار اۋىلعا جاقىن ماڭعا دەيىن كولىكپەن كەلەدى، ال وتكەلدەن قايىققا ءمىنىپ وتەدى، - دەدى جايساڭباي اۋىلدىق وكرۋگىنىڭ اكىمى رۋسلان قوبانوۆ.

بۇل اۋىل قازىر ارال سەكىلدى سۋ ورتاسىندا تۇر. بارلىعى 74 ۇيدە 400 دەن استام ادام تۇرادى.

- قايىقپەن تاسىمالداۋ تاڭەرتەڭ ساعات 6:00-دە باستالادى. سودان كەشكى 20:00-21:00-گە دەيىن جۇمىس ىستەيدى. ءبىر باعىتقا 45 مينۋت ۋاقىت كەرەك. ەكى ارالىققا 1 ساعات 30 مينۋت جۇمسايدى. قازىر جول اشۋ ءۇشىن سۋدى بوگەۋگە بولمايدى. ەگەر سۋدى بوگەسە، اۋىل سۋعا كەتۋى مۇمكىن. جايساڭبايدا جارتى اي ءتارىزدى سۋ وتەتىن ەدى. سۋ كوپ بولىپ، قاراما-قارسى جاعىنا ءوتىپ، اۋىل ورتادا قالىپ تۇر. بىرنەشە شاقىرىمدىق جەرگە ەشتەڭە ىستەي المايمىز، - دەدى رۋسلان قوبانوۆ.

اۋىل تۇرعىندارى قايىقپەن قاتىناۋ قيىندىق تۋعىزاتىنىن، ءار رەيس ءۇشىن جانار-جاعارماي ساتىپ الاتىنىن ايتتى.

- اۋىلداعى قاتىناس قيىن ەكەنى جاسىرىن ەمەس. الدىمەن قايىققا بەنزين قۇيامىز. ونىڭ 1 ليترى 250 تەڭگە. ءبىر باعىت ءۇشىن 10 ليتر كەرەك. 1 قايىققا 8 ادامنان ارتىق المايدى. كەيدە قاجەت بولسا 2-3 ادام بولىپ كەتەمىز. سودان تۇسكەن سوڭ كولىك تە كەرەك. ۋاز كولىگىنە 50-60 مىڭ بەرەمىز. وندا 10-12 ورىن بار. مۇنىڭ ءبارى اۋىل ادامدارى ءۇشىن شىعىن بولىپ تۇر. تاماق تاسۋ دا وڭعايعا سوقپايدى مۇندايدا، - دەدى اۋىل تۇرعىنى بازارگۇل بەكەتايەۆا.

اقتوبە وبلىستىق ت ج د باسپا ءسوز قىزمەتىنىڭ حابارلاۋىنشا، قازىر ەكى قايىق قىزمەت ەتىپ ءجۇر. ت ج د قىزمەتكەرىنىڭ اس-سۋى مەن بەنزيندى جەرگىلىكتى اتقارۋشى ورگان بەرۋى ءتيىس. ال اۋىل اكىمدىگى كەي كەزدە تۇرعىندار ءوز قالتاسىنان اقشا شىعارىپ، بەنزين الاتىنىن جاسىرمادى.

- سۋ تاسقىنى بولعان كەزدە جانار-جاعارماي توننالاپ كەلدى. ءبىر كۇندە 300-500 ليتر بەنزين تۇتىندى. ماۋسىم ايىندا 500 ليتر بەردى. شىلدەدە مەن ەڭبەك دەمالىسىندا بولعان سوڭ ناقتى بىلمەيمىن. تۇرعىندار جانىمىزداعى ءتاۋىپ اۋىلىنا قوناققا بارادى. ونىڭ ءبارىن تولەپ بەرۋى كەرەك پە؟ قازىر توتەنشە جاعدايلار قىزمەتكەرلەرىن باسپانامەن قامتىپ وتىرمىز. وسى ادامدارعا دەپ اكىمدىكتەن اقشا بولمەدى. ونى مەن ءوز ەڭبەكاقىمنان بەرەمىن بە؟ بەنزين جەتكىلىكسىز، - دەدى جايساڭباي اۋىلدىق وكرۋگىنىڭ اكىمى رۋسلان قوبانوۆ.

اۆتور
التىناي ساعىندىقوۆا