«رەسپۋبليكا بويىنشا 7048 جەكە تۇرعىن ءۇي مەن 2834 اۋلا اۋماعىنان سۋدىڭ باعىتى بۇرىلىپ، سۋ سورىلدى، 38859 ادام ۇيلەرىنە ورالدى. 6707 ادام ەۆاكۋاتسيالاۋ پۋنكتتەرىن پانالاۋدا. ەۆاكۋاتسيالىق پۋنكتتەردە توتەنشە جاعدايلار دەپارتامەنتتەرىنىڭ، ت ج م اپاتار مەديتسيناسى ورتالىعىنىڭ پسيحولوگتارى مەن مەديتسينالىق قىزمەتكەرلەرى تۇرعىندارعا كەڭەس، قولداۋ كورسەتىپ جاتىر»، - دەدى ت ج م رەسمي وكىلى اسقار ءشارىپ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، اتىراۋ، اقتوبە، باتىس قازاقستان، سولتۇستىك قازاقستان وبلىستارىندا سۋ تاسقىنىنا قارسى ءىس-شارالار، سۋ تاسقىنى سالدارىن جويۋ جانە حالىققا كومەك كورسەتۋ جۇمىستارى جالعاسىپ جاتىر.
«اۆاريالىق- قۇتقارۋ جانە سۋ تاسقىنىنا قارسى جۇمىستارعا 19 مىڭنان استام ادام، 2 694 تەحنيكا، 327 سۋ سورۋ قۇرالى جانە 231 ءجۇزۋ قۇرالى جانە 7 اۋە كەمەسى جۇمىلدىرىلدى»، - دەيدى مينيسترلىكتىڭ رەسمي وكىلى.