سۋ تاسقىنى: 18651 ادام ۇيلەرىنە ورالدى

استانا. KAZINFORM - سۋ تاسقىنى قاۋىپتى وڭىرلەردە اۆاريالىق- قۇتقارۋ جۇمىستارى، سۋ تاسقىنىنا قارسى ءىس-شارالار، سۋ تاسقىنى سالدارىن جويۋ جۇمىستارى ءالى جالعاسىپ جاتىر. سۋ تاسقىنىنا قارسى ءىس-شارالاردىڭ ناتيجەسىندە 18651 ادام ءوز ۇيلەرىنە ورالعان.

ورتالىق كوممۋنيكاتسيالار قىزمەتىندە وتكەن بريفينگتە ق ر ت ج م ازاماتتىق قورعانىس جانە اسكەري بولىمدەر كوميتەتىنىڭ اعا وفيتسەرى ەراسىل سايپاش سۋ تاسقىنى باستالعالى بەرى 117694 ادام، ونىڭ ىشىندە 43931 بالا قۇتقارىلىپ، ەۆاكۋاتسيالانعانىن ايتتى.

«قازىر 6887 ادام، ونىڭ ىشىندە 3166 بالا ەۆاكۋاتسيالاۋ پۋنكتەرىن قونىس ەتكەن. 4216 تۇرعىن ءۇي مەن 2698 اۋلا اۋماعىنان سۋدىڭ باعىتى بۇرىلدى. 10,1 ميلليوننان استام تەكشە مەتر ەرىگەن قار سۋى سورىپ شىعارىلدى، 3,2 ميلليون قاپشىق جانە 1,4 ميلليوننان استام توننا ينەرتتى ماتەريال توسەلدى»، - دەدى ول.

بەلگىلى بولعانداي، اقتوبە، قوستاناي، اقمولا، اتىراۋ، سولتۇستىك قازاقستان وبلىستارىندا 5718 جەكە تۇرعىن ءۇي، 1130 اۋلا اۋماعى ءالى سۋ استىندا قالۋدا.

اقتوبە، قوستاناي، باتىس قازاقستان، اقمولا، قاراعاندى، اتىراۋ، سولتۇستىك قازاقستان جانە ۇلىتاۋ وبلىستارىندا جەرگىلىكتى اۋقىمداعى 38 ت ج ارەكەت ەتەدى.

ت ج م ازاماتتاردى سۋ تاسقىنى كەزەڭىندە قاۋىپسىزدىك شارالارىن ساقتاۋعا، ۇيلەردەن جانە ەۆاكۋاتسيالاۋ پۋنكتتەرىنەن ءتيىستى رۇقساتسىز كەتپەۋگە شاقىرادى جانە بالالاردى قاراۋسىز قالدىرماۋدى ەسكەرتەدى.